.jpg)
សំរាមដែលត្រូវបានគេវេចខ្ចប់ដាក់ក្នុងស្បោង ត្រូវបានដាក់នៅលើចិញ្ចើមផ្លូវក្នុងខណ្ឌជ្រោយចង្វារពីយប់ថ្ងៃទី ២០ វិច្ឆិកា។ ហុង មិនា
ភ្នំពេញៈ ក្រសួងបរិស្ថានបានវាយតម្លៃខ្ពស់ចំពោះសកម្មភាព និងការគ្រប់គ្រងទុកដាក់សំរាមនៅតាមទីសាធារណៈ និងទីរមណីយដ្ឋាននានាទូទាំងប្រទេស នាឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុករយៈពេល ៣ ថ្ងៃ ប៉ុន្តែការចោលសំរាមផ្តេសផ្តាស់នៅតែមាន។
លោក នេត្រ ភក្ត្រា អ្នកនាំពាក្យក្រសួងបរិស្ថានប្រាប់ ភ្នំពេញ ប៉ុស្តិ៍ នៅថ្ងៃទី ២១ វិច្ឆិកាថា៖ «យើងមិនទាន់មានតួលេខជារួមទាក់ទងនឹងសំរាមទូទាំងប្រទេសក្នុងរយៈពេល ៣ ថ្ងៃនោះទេ គ្រាន់ជាការវាយតម្លៃជារួមដែលយើងទទួលបានពីតំបន់ និងខេត្តនានា គឺការគ្រប់គ្រងសំណល់រឹងសំរាមគឺគ្រប់គ្រងបានល្អ ហើយប្រជាពលរដ្ឋក៏បានចូលរួមក្នុងការសម្អាតផងដែរ»។
ជាមួយនឹងការវាយតម្លៃខ្ពស់នេះលោកក៏បានលើកឡើងថា ការគ្រប់គ្រងសំរាមនៅតាមតំបន់ និងទីរមណីយដ្ឋាននានាដែលទទួលបានលទ្ធផលល្អជាងមុនក៏ព្រោះមានការចូលរួមពីទីភ្នាក់ងាររបស់ក្រសួង និងអាជ្ញាធរពាក់ព័ន្ធសម្រាប់ប្រចាំការ ដើម្បីគ្រប់គ្រងការទុកដាក់សំរាម ខណៈពលរដ្ឋក៏បានចូលរួមបានយ៉ាងល្អផងដែរ។
យ៉ាងណាក្តីលោក នេត្រ ភក្ត្រា អះអាងថា ទោះក្នុងពេល ៣ ថ្ងៃនេះនៅតាមតំបន់ និងរមណីយដ្ឋាននានា មានលក្ខណៈល្អប្រសើរ ប៉ុន្តែក៏នៅមានប្រជាពលរដ្ឋមួយចំនួនតូច បានទុកដាក់សំរាមមិនត្រឹមត្រូវ និងចោលសំរាមពាសវាលពាសកាលដដែល។
កាលពីថ្ងៃទី ១៩ ខែវិច្ឆិកា ក្រសួងបរិស្ថានបានផ្សព្វផ្សាយវីដេអូអប់រំខ្លីមួយ ដោយអំពាវនាវដល់ប្រជាពលរដ្ឋឱ្យរៀបចំដំណើរកម្សាន្តដោយគ្មានប្រើប្រាស់ប្លាស្ទិក ដោយក្នុងនោះបានណែនាំឱ្យប្រជាពលរដ្ឋផ្លាស់ប្តូរទម្លាប់ថ្មីដោយប្រើប្រាស់នូវឧបករណ៍ដែលអាចប្រើប្រាស់បានច្រើនដង ជំនួសឱ្យការប្រើប្លាស្ទិកវិញ។
តាមរបាយការណ៍របស់ក្រសួងទេសចរណ៍ក្នុងរយៈពេល ៣ ថ្ងៃនៃបុណ្យអុំទូក មានភ្ញៀវចេញដើរកម្សាន្តជាង ៩០ ម៉ឺននាក់ ក្នុងនោះភ្ញៀវជាតិមានចំនួន ៨៩៩ ៨៦៩ នាក់ និងភ្ញៀវបរទេសផ្ទៃក្នុង ១០ ២៨១ នាក់ ខណៈរាជធានីភ្នំពេញ ខេត្តសៀមរាប និងខេត្តព្រះសីហនុ មានចំនួនភ្ញៀវទេសចរច្រើនជាងគេ។
លោក ឃឹម ហ្វីណង់ អភិបាលស្រុកបន្ទាយស្រី ដែលជាស្រុកគំរូមួយក្នុងការគ្រប់គ្រងសំរាម នៅខេត្តសៀមរាបបានប្រាប់ភ្នំពេញប៉ុស្តិ៍នៅថ្ងៃទី ២១ វិច្ឆិកាថា ការដែលចំនួនភ្ញៀវទេសចរមានការកើនឡើងបែបនេះហើយបានធ្វើឱ្យស្រុកបន្ទាយស្រីក្នុងរយៈពេល ៣ ថ្ងៃនេះ គឺចាប់ពីថ្ងៃទី ១៨ ដល់ថ្ងៃទី ២០ វិច្ឆិកា សំរាមមានការកើនឡើង ៣ ដង។ ការកើនឡើងនៃចំនួនសំរាមនេះ គឺដោយសារតែមានការកើនឡើងនូវចំនួនភ្ញៀវទេសចរមានចំនួនច្រើនបានមកកម្សាន្តនៅក្នុងស្រុក ខណៈថ្ងៃធម្មតា សំរាមដែលប្រមូលជាទូទៅមានប្រមាណ ១០ តោនក្នុង ១ ថ្ងៃៗ។
យ៉ាងណា លោក ឃឹម ហ្វីណង់ បញ្ជាក់ថា បើទោះជាចំនួនសំរាមមានការកើនឡើង ប៉ុន្តែភ្ញៀវទេសចរដែលមកកម្សាន្ត គឺបានចូលរួមទុកដាក់សំរាមបានល្អជាងមុន ខណៈភ្ញៀវទេសចរ ភាគតិចប៉ុណ្ណោះ ដែលនៅតែបន្តបោះសំរាមចោលពាសវាលពាសកាល និងទុកដាក់សំរាមមិនបានត្រឹមត្រូវ។
លោកបន្តថា៖ «សម្រាប់ខ្ញុំ សំរាមដែលនៅរាយប៉ាយដូចពីមុនៗ គឺមានការថយចុះជាងពីមុនច្រើន ដោយសារតែតំបន់យើងជាតំបន់ដែលស្អាតស្រាប់ផង ហើយណាមួយ យើងមានកម្មកររបស់សហគមន៍រង់ចាំ ដើម្បីសម្អាត ព្រោះបើមិនមានអ្នកចាំសម្អាតនោះទេ គឺកន្លែងដែលស្អាតនឹងក្លាយជាកន្លែងកខ្វក់ ហើយវានឹងធ្វើឱ្យអ្នកដំណើរគិតថា កន្លែងទាំងហ្នឹង គឺកន្លែងចោលសំរាម»។
លោក ឃឹម ហ្វីណង់ នៅតែទទូចដល់ប្រជាពលរដ្ឋគ្រប់រូបសូមចូលរួមវេចខ្ចប់សំរាមដែលខ្លួនបានប្រើប្រាស់រួច និងនាំយកទៅចោលនៅកន្លែងទុកដាក់សំរាមឱ្យបានត្រឹមត្រូវដោយកុំទុកចោលពាសវាលពាសកាល ដែលធ្វើឱ្យប៉ះពាល់បរិស្ថាន និងសុខភាព ជាពិសេសធ្វើឱ្យប៉ះពាល់ដល់ទីរមណីយដ្ឋានកម្សាន្តនានាទៀតផង។
បើតាមរបាយការណ៍របស់ក្រសួងបរិស្ថានបានឱ្យដឹងថាបរិមាណសំរាមសរុបដែលបានបង្កើតឡើងនៅកម្ពុជាក្នុង ១ ថ្ងៃៗមានជាង ១ ម៉ឺនតោនដែលបើគិតសរុបគឺស្មើនឹងជិត ៤ លានតោនក្នុង ១ ឆ្នាំ ហើយសំរាមទាំងនោះ ៦៥ ភាគរយជាសំណល់សរីរាង្គ ២០ ភាគរយជាសំណល់ថង់ប្លាស្ទិក និងនៅសេសសល់គឺជាសំណល់រឹង និងសំណល់ផ្សេងទៀត៕
