.jpg)
ជនជាតិថៃ និងបក្ខពួក ១៥ នាក់ត្រូវចាប់ខ្លួន ក្រោយបង្កហិង្សា និងផ្ទុះអាវុធ បណ្ដាលឱ្យសមត្ថកិច្ច ៣ នាក់រងរបួសពេលចុះបង្ក្រាប ស្ថិតក្នុងភូមិសាស្ត្រសង្កាត់ក្រុងប៉ោយប៉ែត ខេត្តបន្ទាយមានជ័យ។ FB
បន្ទាយមានជ័យៈ ជនជាតិថៃ និងបក្ខពួកចំនួន ១៥ នាក់ត្រូវបានចាប់ខ្លួន និងសមត្ថកិច្ច ៣ នាក់រងរបួស ក្រោយពីការបង្ក្រាបទៅលើមនុស្ស ២ ក្រុមដែលបានបង្កអំពើហិង្សា នៅម៉ោង ១២:០៥ នាទី ឈានចូលថ្ងៃទី ២១ ខែវិច្ឆិកា នៅក្នុងកន្លែងផឹកស៊ី នៅក្នុងហាងមួយមានឈ្មោះ កុងតឺន័រទឹកពុះ ស្ថិតក្នុងភូមិសាស្ត្រសង្កាត់ក្រុងប៉ោយប៉ែត ខេត្តបន្ទាយមានជ័យ។ យោងតាមអាជ្ញាធរមូលដ្ឋាន។
លោក គាត ហ៊ុល អភិបាលក្រុងប៉ោយប៉ែតបានប្រាប់ភ្នំពេញប៉ុស្តិ៍ថា កម្លាំងសមត្ថកិច្ចកំពុងបន្តស្រាវជ្រាវតាមចាប់ខ្លួនអ្នកដែលពាក់ព័ន្ធមួយចំនួនទៀតដែលបានគេចខ្លួន។ ទោះយ៉ាងណាលោកមិនបានប្រាប់ឱ្យដឹងពីមូលហេតុដែលនាំឱ្យកើតមានអំពើហិង្សារហូតដល់មានការផ្ទុះអាវុធតតាំងជាមួយកម្លាំងសមត្ថកិច្ចនោះទេ។
លោកបានបញ្ជាក់ថា៖ «តាមសេចក្ដីរាយការណ៍បឋមនៅក្នុងហេតុការណ៍នោះ កម្លាំងសមត្ថកិច្ចយើង ៣ នាក់រងរបួស ហើយក្រុមជនអន្ធពាល ១៥ នាក់ត្រូវបានចាប់ខ្លួនបញ្ជូនទៅកាន់បញ្ជាការដ្ឋានកងរាជអាវុធហត្ថក្រុងប៉ោយប៉ែត ដើម្បីសួរចម្លើយ។ ប៉ុន្តែរហូតមកទល់ពេលនេះ ខ្ញុំនៅមិនទាន់ទទួលបានរបាយការណ៍ជាលាយលក្ខណ៍អក្សរពីកម្លាំងសមត្ថកិច្ចជំនាញនៅឡើយទេ»។
លោក គាត ហ៊ុល បានអំពាវនាវឱ្យកម្លាំងសមត្ថកិច្ចជំនាញចាត់វិធានការឱ្យបានម៉ឺងម៉ាត់បំផុត ដោយមិនត្រូវឱ្យជនពាក់ព័ន្ធណាម្នាក់រួចខ្លួនឡើយ។
ជុំវិញករណីនេះ លោក នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែត និងលោក បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យមិនអាចទាក់ទងស្នើសុំការអធិប្បាយតាមទូរស័ព្ទបានទេ កាលពីថ្ងៃអាទិត្យ។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានប្រាប់ភ្នំពេញ-ប៉ុស្តិ៍ថា ករណីនេះ លោកក៏នៅមិនទាន់ទទួលបានសេចក្ដីរាយការណ៍លម្អិតពីកម្លាំងកងរាជអាវុធហត្ថខេត្តបន្ទាយមានជ័យដែរ។
លោកថ្លែងថា៖ «ព័ត៌មានហ្នឹង ខ្ញុំបានឃើញគេផ្សាយតាម Facebook និង Website ក្នុងស្រុកមួយចំនួនថា សមត្ថកិច្ចយើង ៣ នាក់បានរងរបួស ក្នុងនោះមានម្នាក់រងរបួសធ្ងន់ ដោយត្រូវគ្រាប់កាំភ្លើងធ្លាយពីថ្ពាល់ម្ខាងទៅម្ខាង ត្រូវបញ្ជូនទៅព្យាបាលនៅមន្ទីរពេទ្យខេត្ត ប៉ុន្តែឈ្មោះអ្វីខ្លះនោះ ខ្ញុំក៏នៅមិនទាន់ដឹងដែរ ព្រោះនៅពេលនេះ កងរាជអាវុធហត្ថខេត្តបន្ទាយមានជ័យនៅមិនទាន់រាយការណ៍លម្អិតមកខ្ញុំដែរ»។
លោក អេង ហ៊ី បាននិយាយថា យោងតាមព័ត៌មានបឋមពីថ្នាក់ខេត្ត មុនពេលកម្លាំងសមត្ថកិច្ចប្រដាប់អាវុធខេត្តបន្ទាយមានជ័យសម្រេចចិត្តផ្ទុះអាវុធបង្ក្រាបក្រុមជនអន្ធពាលជនជាតិថៃ និងបក្ខពួកនាពេលនោះ គឺមានសេចក្ដីរាយការណ៍ពីប្រជាពលរដ្ឋថា មានករណីប្រើអំពើហិង្សាមួយបង្កឡើងដោយជនជាតិថៃចំនួន ២ ក្រុម ដែលបានទៅផឹកស៊ីនៅក្នុងហាងកុងតឺន័រទឹកពុះស្ថិតក្នុងភូមិសាស្ត្រសង្កាត់ក្រុងប៉ោយប៉ែត ខេត្តបន្ទាយមានជ័យ។ នៅក្នុងវិវាទនោះ គូទំនាស់ទាំង ២ ក្រុមបានយកដបស្រាគប់ដាក់គ្នា ហើយវាយប្រតាយប្រតប់គ្នា និងផ្ទុះអាវុធដាក់គ្នា បន្ទាប់មកកម្លាំងសមត្ថកិច្ចចុះទៅអន្តរាគមន៍បង្ក្រាប ហើយក៏ត្រូវក្រុមជនអន្ធពាលបាញ់ឱ្យត្រូវរបួសធ្ងន់-ស្រាល ៣ នាក់ ទើបកម្លាំងសមត្ថកិច្ចបង្ខំចិត្តបំផ្ទុះអាវុធឡើងលើជាច្រើនគ្រាប់ ដើម្បីគ្រប់គ្រងស្ថានការណ៍ និងបង្ក្រាបចាប់ក្រុមជនអន្ធពាលទាំងនោះបាន ១៥ នាក់៕
