.jpg)
ជនសង្ស័យម្នាក់ត្រូវបានចាប់ខ្លួន ពាក់ព័ន្ធករណីរំលោភសម្លាប់យុវតីសិស្សសាលា នៅស្រុកចំការលើ ខេត្តកំពង់ចាម កាលពីថ្ងៃទី ២០ វិច្ឆិកា។ រូបថត ហ្វេសប៊ុក
កំពង់ចាមៈ ជនសង្ស័យម្នាក់ត្រូវបានសមត្ថកិច្ចនគរបាលខេត្តកំពង់ចាមចាប់ខ្លួននៅថ្ងៃទី ២២ ខែវិច្ឆិកា ករណីរំលោភសេពសន្ថវៈ ហើយសម្លាប់យុវតីជាសិស្សសាលាម្នាក់ បន្ទាប់ពីប្រព្រឹត្តបាន ២ ថ្ងៃ នៅភូមិ ១១ ឃុំចំការអណ្តូង ស្រុកចំការលើ ខេត្តកំពង់ចាម។
លោកស្រី អៀម វណ្ណី ស្នងការរងទទួលផែនការងារនគរបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តកំពង់ចាម ប្រាប់នៅរសៀលថ្ងៃទី ២២ ខែវិច្ឆិកា ថាជនសង្ស័យឈ្មោះ ម៉ាប់ កំសត់ អាយុ ១៦ ឆ្នាំ រស់នៅភូមិ-ឃុំកើតហេតុខាងលើត្រូវបានកម្លាំងនគរបាលខេត្តកំពង់ចាមចាប់ខ្លួនបាននៅថ្ងៃទី ២២ ខែវិច្ឆិកា ខណៈដែលជនសង្ស័យម្នាក់នេះព្យាយាមរត់គេចខ្លួន បន្ទាប់ពីរូបគេប្រព្រឹត្តបទល្មើសរំលោភសម្លាប់យុវតីរងគ្រោះ។
លោកស្រីថ្លែងថា៖ «រឿងនេះសមត្ថកិច្ចយើងចាប់បានម្នាក់ ប៉ុន្តែខ្ញុំមិនទាន់អាចប្រាប់លម្អិតបានទេ ព្រោះកម្លាំងជំនាញរបស់យើងនៅបន្តស្រាវជ្រាវបទល្មើសនេះបន្ថែមទៀត។ យើងកំពុងមមាញឹកធ្វើការងារនេះ»។
លោក ប៉ែន ទៀងចំរើន អធិការនគរបាលស្រុកចំការលើឱ្យដឹងនៅរសៀលថ្ងៃទី ២២ ខែវិច្ឆិកា ថា ជនសង្ស័យបានបង្កបទល្មើសកាលពីរសៀលថ្ងៃទី ២០ ខែវិច្ឆិកា ឆ្នាំ ២០២១។ សាកសពយុវតីរងគ្រោះក៏ត្រូវបានក្រុមគ្រួសារតាមរកឃើញនៅក្នុងចម្ការពោត ដែលជាទីកន្លែងជនល្មើសប្រព្រឹត្ត បន្ទាប់ពីជនរងគ្រោះមិនឃើញវិលត្រឡប់មកផ្ទះវិញពេលចេញពីសាលារៀន។
លោកប្រាប់ថា៖ «ចំពោះព័ត៌មានលម្អិតយ៉ាងណានោះ ខ្ញុំមិនទាន់ប្រាប់បានទេ។ ព្រោះសមត្ថកិច្ចយើងនៅបន្តបេសកកម្មនេះទៀត។ ករណីនេះស្ថិតក្នុងការស្រាវជ្រាវបន្តទៀត»។
ទោះយ៉ាងណា បើតាមមន្ត្រីនគរបាលប៉ុស្តិ៍ចំការអណ្តូង ១ រូបដែលស្នើសុំមិនឱ្យបញ្ចេញឈ្មោះបានប្រាប់នៅរសៀលថ្ងៃទី ២២ ខែវិច្ឆិកា ថា យុវតីរងគ្រោះឈ្មោះ ឌ.អ.ជ. អាយុ ១៦ ឆ្នាំបានទៅសាលារៀន ប៉ុន្តែនាងបានបាត់មិនឃើញត្រឡប់មកផ្ទះវិញដូចសព្វដង។ ដូច្នេះទើបក្រុមគ្រួសាររបស់យុវតីនាំគ្នាដើររករហូតប្រទះឃើញសាកសពនៅក្នុងចម្ការពោតស្ថិតក្នុងភូមិ ១១ ឃុំចំការអណ្តូង ស្រុកចំការលើ។ ចំណែកជនសង្ស័យត្រូវបានសមត្ថកិច្ចតាមចាប់ខ្លួនរហូតដល់ខេត្តកំពង់ធំ។
មន្ត្រីដដែលនោះបានបញ្ជាក់ថា៖ «ពេលនេះសមត្ថកិច្ចជំនាញកំពុងបន្តសាកសួរជនសង្ស័យនៅឡើយ ដើម្បីរកអ្នកពាក់ព័ន្ធ»៕
វីដេអូ៖
