ភ្នំពេញៈ សិស្សប្រឡងសញ្ញាបត្រមធ្យមសិក្សាបឋមភូមិថ្នាក់ទី ៩ (ឌីប្លូម) នៅរាជធានីភ្នំពេញនៅឆ្នាំនេះ ជាង ៩៥ ភាគរយបានប្រឡងជាប់ក្នុងចំណោមសិស្សសរុប ១៥ ៣១៣ នាក់ ខណៈក្រសួងអប់រំ យុវជន និងកីឡាបានដាក់ចេញនូវបទប្បញ្ញត្ដិ និងកម្រិតវិន័យ ចំពោះបេក្ខជនប្រឡងបាក់ឌុបដែលនឹងប្រព្រឹត្តទៅនៅថ្ងៃទី ២៧ ខែធ្នូខាងមុខ។
លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ ថ្លែងនៅថ្ងៃទី ២២ វិច្ឆិកាថា លទ្ធផលប្រឡងសញ្ញាបត្រមធ្យមសិក្សា បឋមភូមិ សម័យប្រឡងថ្ងៃទី ១៥-១៦ វិច្ឆិកា ២០២១ មានមណ្ឌលប្រឡងសរុបចំនួន ៦៣ មណ្ឌលត្រូវជា ៦៤៧ បន្ទប់។
ចំនួនបេក្ខជនចុះឈ្មោះប្រឡងសរុបចំនួន ១៥ ៣១៣ នាក់ ស្រី ៧ ៨៣២ នាក់។ បេក្ខជនមកប្រឡងសរុប ១៤ ៥០៦ នាក់ ស្រី ៧ ៤៩៨ នាក់។ ក្នុងនោះបេក្ខជនប្រឡងជាប់ សរុប ១៣ ៧០៩ នាក់ ស្រី ៧ ១៨៦ នាក់ គិតជាភាគរយ សរុបចំនួន ៩៤,៥១ ភាគរយ ស្រី ៩៥,៨៤ ភាគរយ។
លោក ហែម ស៊ីណារ៉េត បានបញ្ជាក់ថា៖ «ដំណើរការប្រឡងសញ្ញាបត្រមធ្យមសិក្សាបឋមភូមិឆ្នាំនេះ គ្រប់មណ្ឌលដំណើរការធម្មតា ពុំមានបញ្ហាអ្វីគួរឱ្យកត់សម្គាល់ទេ។ តាមមណ្ឌលប្រឡងនីមួយៗបានអនុវត្តតាមការណែនាំបានល្អប្រសើរ។ គ្រប់ច្រកចូលក្នុងមណ្ឌលមានឧបករណ៍បាញ់អាល់កុល និងវាស់កម្ដៅ»។
លោក រស់ សុវាចា អ្នកនាំពាក្យក្រសួងអប់រំ ថ្លែងនៅថ្ងៃទី ២២ វិច្ឆិកាថា ជាទូទៅលទ្ធផលប្រឡងឌីប្លូមត្រូវចេញផ្សាយជូនចាប់ពីម៉ោង ៨:០០ នាទី ព្រឹក ថ្ងៃ ២២ វិច្ឆិកា ឆ្នាំ ២០២១ នៅតាមមណ្ឌលប្រឡង និងតាមប្រព័ន្ធអនឡាញរបស់មណ្ឌលប្រឡង។
លោកបញ្ជាក់ថា៖«អាស្រ័យលើការរៀបចំរបស់គ្រឹះស្ថាននីមួយៗ ការផ្សាយលទ្ធផលប្រឡងឌីប្លូមអាចមានម៉ោងផ្សព្វផ្សាយផ្សេងគ្នា»។
លោកបានឱ្យដឹងថា ជាទូទៅ ដំណើការប្រឡងឌីប្លូមមានរយ:ពេលសរុបចំនួន ២ ថ្ងៃ គឺកាលពីថ្ងៃ ១៥ និងទី ១៦ វិច្ឆិកា ហើយបានបញ្ចប់ដោយមានលទ្ធផលអាចទទួលយកបានតាមការគ្រោងទុក។
ដូចឆ្នាំកន្លងមកដែរ បេក្ខជនប្រឡងឌីប្លូមមួយចំនួនតូចដែលអវត្តមាន ក្នុងអំឡុងពេលប្រឡងនេះដោយសារមូលហេតុបុគ្គល។ រីឯការប្រឡងឌីប្លូមបានបន្តអនុវត្តតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបានស្របនឹងវិធានការសុវត្ថិភាពសុខភាព។
លោក សុវាចា បន្តថា ក្រសួងអប់រំសូមថ្លែងអំណរគុណជូនចំពោះបុគ្គលិកអប់រំគ្រប់លំដាប់ថ្នាក់ បេក្ខជនប្រឡងឌីប្លូមមាតាបិតា និងគ្រប់ភាគីពាក់ព័ន្ធដែលបានចូលរួមរៀបចំ និងគាំទ្រដំណើរការប្រឡងឌីប្លូមនៅឆ្នាំនេះ ដោយបានអនុវត្តខ្ជាប់ខ្ជួននូវនីតិវិធីប្រឡង និងវិធានការសុវត្ថិភាពសុខភាព ដើម្បីទប់ស្កាត់ការឆ្លងកូវីដ ១៩។
បើតាមលោក សុវាចា បេក្ខជនប្រឡងឌីប្លូមឆ្នាំនេះមានចំនួនសរុប ១៦២ ៥៨៩ នាក់ (នារី ៨៧ ៨៧១ នាក់)។ មណ្ឌលប្រឡងមានចំនួន ១ ៧២២ និងបន្ទប់ប្រឡងមានចំនួន ៧ ៣២៧។
យ៉ាងណាក្តី មន្ទីរអប់រំ ខេត្ដត្បូងឃ្មុំ បន្ទាយមានជ័យ ឧត្ដរមានជ័យ និងកោះកុង បានឱ្យដឹងថា មណ្ឌលប្រឡងកំពុងបូកសរុបលទ្ធផលមិនទាន់រួចរាល់សព្វគ្រប់នៅឡើយទេ កាលពីថ្ងៃទី ២២ វិច្ឆិកាហើយអាចនឹងរួចរាល់នៅថ្ងៃទី ២៣ វិច្ឆិកា។
ដោយឡែក លោក ហង់ជួន ណារ៉ុន រដ្ឋមន្ដ្រី ក្រសួងអប់រំ យុវជន និងកីឡា នៅថ្ងៃទី ២២ វិច្ឆិកាបានប្រកាសដាក់ចេញនូវបទប្បញ្ញត្ដិ និងកម្រិតវិន័យ ចំពោះបេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡងថ្ងៃទី ២៧ ធ្នូ ឆ្នាំ ២០២១។
សេចក្តីប្រកាសនេះមានគោលដៅ រក្សារបៀបរៀបរយក្នុងការប្រឡងសញ្ញាបត្រមធ្យមសិក្សាទុតិយភូមិ លើកកម្ពស់ការថែទាំសុខភាព និងសុវត្ថិភាព សម្រាប់គណៈមេប្រយោគ គណៈកម្មការនានា និងបេក្ខជន ក្នុងបរិបទនៃការឆ្លងរាលដាលជំងឺកូវីដ ១៩ និងជំងឺឆ្លងផ្សេងៗ។
សេចក្តីប្រកាសនេះ ក៏កំណត់អំពីសកម្មភាពសម្រាប់បេក្ខជនដែលត្រូវអនុវត្តក្នុងការប្រឡងសញ្ញាបត្រមធ្យមសិក្សាទុតិយភូមិ។ កំណត់អំពីសកម្មភាពដែលមិនត្រូវអនុវត្ត និងកម្រិតវិន័យ ចំពោះបេក្ខជនដែលប្រព្រឹត្តខុសឆ្គង ក្នុងការប្រឡងសញ្ញាបត្រមធ្យមសិក្សាទុតិយភូមិបាក់ឌុបនេះផងដែរ៕
វីដេអូ៖