.jpg)
ការលក់អាវរងានៅផ្សារទួលទំពូងកាលពីពេលកន្លងមក។ ហុង មិនា
ភ្នំពេញៈ ក្រសួងធនធានទឹក និងឧតុនិយមនៅថ្ងៃទី ២២ ខែ វិច្ឆិកា ឆ្នាំ ២០២១ បានប្រកាសថា រដូវរងាឆ្នាំនេះសីតុណ្ហភាពនឹងធ្លាក់ចុះមកនៅក្នុងកម្រិត ១៥ អង្សាសេ ជាពិសេសនៅតំបន់ជួរភ្នំ និងខ្ពង់រាបឦសានជាអ្វីដែលមន្ត្រីអំពាវនាវឱ្យប្រជាពលរដ្ឋបង្កើនការថែទាំសុខភាពឱ្យបានល្អ ពិសេសត្រូវយកចិត្តទុកដាក់ថែទាំសុខភាពកុមារតូចៗ និងមនុស្សចាស់ជរា។
តាមរយៈសេចក្ដីប្រកាសនោះ ក្រុមជំនាញអាកាសធាតុបានពិនិត្យឃើញថា នៅពេលនេះឥទ្ធិពលខ្យល់ពីតំបន់ស៊ីបេរីកំពុងរុញច្រានទ្រនុងសម្ពាធខ្ពស់ពីប្រទេសចិនឱ្យធ្លាក់ចុះមកក្រោមហើយបន្តរំកិលចុះមកគ្របដណ្ដប់លើប្រទេសកម្ពុជា ធ្វើឱ្យសីតុណ្ហភាពក្នុងរដូវរងានៅកម្ពុជាឆ្នាំនេះ ដែលចាប់ផ្ដើមពីខែធ្នូ ឆ្នាំ ២០២១ ដល់ខែកុម្ភៈ ឆ្នាំ ២០២២ អាចនឹងធ្លាក់ចុះមកនៅកម្រិតពី ១៧ ដល់ ១៥ អង្សាសេសម្រាប់តំបន់ជួរភ្នំដងរែក និងខ្ពង់រាបឦសាន។ ចំណែកនៅតាមបណ្ដារាជធានីខេត្តមួយចំនួនទៀតអាចនឹងធ្លាក់មកនៅចន្លោះពី ១៩ ដល់ ១៨ អង្សាសេ។
ទន្ទឹមនឹងនេះ លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានប្រាប់ ភ្នំពេញ ប៉ុស្តិ៍ថា រដូវរងាឆ្នាំនេះចែកចេញជា ២ វគ្គ។ វគ្គទី ១ ចាប់ផ្ដើមពីសប្ដាហ៍ទី ១ ដល់សប្ដាហ៍ទី ៣ នៃខែធ្នូឆ្នាំ ២០២១ ដែលក្នុងអំឡុងពេលនេះ អាកាសធាតុត្រជាក់នឹងកើតមានដោយអន្លើដោយមានថ្ងៃខ្លះសីតុណ្ហភាពអាចនឹងធ្លាក់ចុះដល់ ១៧ អង្សាសេសម្រាប់តំបន់ជួរភ្នំដងរែក និងខ្ពង់រាបឦសាន ហើយសម្រាប់នៅរាជធានីភ្នំពេញ និងបណ្ដាខេត្តមួយចំនួនទៀតមានថ្ងៃខ្លះសីតុណ្ហភាពអាចនឹងធ្លាក់ចុះរហូតដល់ ១៩ អង្សាសេ។
ចំណែកវគ្គទី ២ ចាប់ផ្ដើមពីសប្ដាហ៍ទី៤ នៃខែធ្នូឆ្នាំនេះ ដល់ខែកុម្ភៈឆ្នាំ ២០២២ អាកាសធាតុត្រជាក់នឹងកើតមានដោយអន្លើជាថ្មីម្ដងទៀត ប៉ុន្តែមានរយៈពេលវែងជាងវគ្គទី ១ ដែលក្នុងអំឡុងពេលនេះ មានថ្ងៃខ្លះសីតុណ្ហភាពអាចនឹងធ្លាក់ចុះដល់ ១៥ អង្សាសេសម្រាប់តំបន់ជួរភ្នំដងរែក និងខ្ពង់រាបឦសាន ហើយសម្រាប់នៅរាជធានីភ្នំពេញ និងខេត្តមួយចំនួនទៀតមានថ្ងៃខ្លះសីតុណ្ហភាពអាចនឹងធ្លាក់ចុះរហូតដល់ ១៨ អង្សាសេ។
លោកបានបញ្ជាក់ថា៖ «ក្នុងស្ថានភាពបែបនេះសូមបងប្អូនប្រជាពលរដ្ឋបង្កើនការថែទាំសុខភាពឱ្យបានល្អ ពិសេសត្រូវយកចិត្តទុកដាក់ថែទាំសុខភាពកុមារតូចៗ មនុស្សចាស់ជរា និងស្ត្រីដែលទើបសម្រាលកូនរួចថ្មីៗ ព្រោះពួកគាត់ងាយនឹងកើតមាននូវជំងឺឆ្លងផ្សេងៗ»។
ជុំវិញករណីនេះ លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានប្រាប់ ភ្នំពេញ ប៉ុស្តិ៍ថា ជាទូទៅ ពេលអាកាសធាតុត្រជាក់មកដល់ មនុស្សវ័យចំណាស់តែងមានកម្ដៅរាងកាយតិច ដោយសារការរំលាយអាហារក្នុងរាងកាយយឺត និងសកម្មភាពរាងកាយមានតិច ឬចុះថយដែលអាចធ្វើឱ្យសីតុណ្ហភាពក្នុងរាងកាយថយចុះជាងធម្មតា។
ដូច្នេះមនុស្សវ័យចំណាស់ក៏មានហានិភ័យដែរដែលអាចបណ្តាលឱ្យមានគ្រោះថ្នាក់ដល់អាយុជីវិត ដោយសារតែរាងកាយត្រូវឆ្លើយតបជាមួយភាពត្រជាក់ ជាពិសេសអ្នកមានជំងឺទឹកនោមផ្អែម និងជំងឺបេះដូង។
លោកស្រីបានបញ្ជាក់ថា៖ «ដើម្បីការពារសុខភាពផ្ទាល់ខ្លួន និងក្រុមគ្រួសារឱ្យបានល្អ និងចៀសផុតពីជំងឺតម្កាត់ដែលអាចកើតមានជាយថាហេតុបណ្តាលមកពីអាកាសធាតុចុះត្រជាក់នេះ ចាំបាច់ត្រូវស្លៀកពាក់អាវក្រាស់ៗ រុំកនឹងកន្សែង ពាក់មួក និងស្រោមដៃរងា ដើម្បីការពារកុំឱ្យធាតុត្រជាក់ប៉ះខ្លួនប្រាណដោយចំហធ្វើយ៉ាងណាឱ្យមានការរក្សាកម្ដៅក្នុងខ្លួនធម្មតា»។
យ៉ាងណាក៏ដោយ អ្នកស្រីបានណែនាំឱ្យស្វែងរកការព្យាបាលវេជ្ជសាស្ត្រនៅគ្រឹះស្ថានសុខាភិបាល ដែលនៅជិតបំផុតប្រសិនបើពលរដ្ឋមានរោគសញ្ញា ពិបាកដកដង្ហើម គ្រុនក្តៅក្អក ឈឺក និងឈឺសាច់ដុំ ឬមានបញ្ហាសុខភាពផ្សេងទៀត។
លោកស្រីក៏បានអំពាវនាវដល់កងកម្លាំងប្រដាប់អាវុធទាំង ៣ ប្រភេទ (កងទ័ព នគរបាល និងកងរាជអាវុធហត្ថ) ដែលកំពុងឈរជើងនៅតាមតំបន់ព្រំដែន ពិសេសនៅតំបន់ជួរភ្នំដងរែក និងខ្ពង់រាបឦសានបង្កើនការថែទាំសុខភាពឱ្យបានល្អ ដើម្បីចៀសផុតពីជំងឺឆ្លងនានា។
ជុំវិញករណីនេះ លោកឧត្ដមសេនីយ៍ឯក ស្រី ឌឹក មេបញ្ជាការរងកងទ័ពជើងគោក និងជាមេបញ្ជាការកងពលធំអន្តរាគមន៍លេខ ៣ បានប្រាប់ភ្នំពេញប៉ុស្តិ៍ថា កាលពីថ្ងៃទី ១៤ ខែ វិច្ឆិកា ឆ្នាំ ២០២១ លោកបានចែកអាវរងាចំនួន ១០ ៥១៩ អាវ ដែលជាអំណោយរបស់លោកនាយករដ្ឋមន្ត្រី ហ៊ុន សែន និង ភរិយា ជូនដល់កងកម្លាំងចំនួន ២៥ អង្គភាពដែលកំពុងឈរជើងការពារព្រំដែនកម្ពុជា-ថៃ នៅសមរភូមិទិសទី ១ ប្រាសាទព្រះវិហារ។
លោកបានបញ្ជាក់ថា៖ «បងប្អូនកងកម្លាំងប្រដាប់អាវុធយើងបានទទួលអាវរងា ដែលជាអំណោយដ៏ថ្លៃថ្លារបស់សម្ដេចតេជោរួចរាល់ហើយ»។
កាលពីថ្ងៃទី ១៨ ខែវិច្ឆិកា ថ្មីៗនេះ លោកនាយករដ្ឋមន្ត្រី ហ៊ុន សែន បានអំពាវនាវដល់ពលរដ្ឋឱ្យបង្កើនការថែទាំសុខភាពឱ្យបានល្អក្នុងរដូវរងាដែលនឹងមកដល់នាដើមខែធ្នូខាងមុខនេះ។
លោកបានមានប្រសាសន៍ថា៖ «រដូវរងាតែងនាំមកនូវជំងឺផ្សេងៗ ជាពិសេសផ្តាសាយហើយផ្តាសាយនៅក្នុងពេលកំពុងកើតមានជំងឺកូវីដ ១៩ នេះ វាងាយនាំទៅដល់ការឆ្លងនៃជំងឺកូវីដ ១៩ ពិតប្រាកដ។ ដូច្នេះ ជារួម សារមួយនេះខ្ញុំសំដៅអំពាវនាវជូនចំពោះប្រជាពលរដ្ឋរបស់យើងយកចិត្តទុកដាក់ការពារសុខភាពក្នុងរយៈពេលនៃរដូវរងា រដូវរំហើយនេះ ដែលធម្មតាតែងតែមានជំងឺឆ្លង»៕
វីដេអូ៖
