.jpg)
តំបន់ព្រៃកោងកាង នៅឃុំទឹកថ្លា ស្រុកព្រៃនប់ ខេត្តព្រះសីហនុ។ រូបថត សហការី
ព្រះសីហនុៈ មន្ទីររៀបចំដែនដី នគរូបនីយកម្ម និងសំណង់ ខេត្ដព្រះសីហនុ កំពុងរៀបចំឯកសារឆ្លើយតបចំពោះការចោទប្រកាន់ទៅលើ លោក ចេង ស្រុង ដែលជាប្រធានមន្ទីរនេះបានចេញប្លង់រឹងឱ្យទៅសាច់ញាតិលើដីរដ្ឋក្នុងតំបន់ការពារព្រៃកោងកាងចំនួន ៧ បណ្ណស្មើនឹងទំហំដីជាង ៣០ ហិកតា ស្ថិតនៅភូមិព្រែកសង្កែ ឃុំទឹកថ្លា ស្រុកព្រៃនប់ ខេត្តព្រះសីហនុ។ នេះបើតាមអ្នកនាំពាក្យរដ្ឋបាលខេត្ដព្រះសីហនុ។
ការប្រកាសថា នឹងឆ្លើយតបរបស់រដ្ឋបាលខេត្ដព្រះសីហនុនេះ ក្រោយពីប្រជាសហគមន៍ និងអង្គការសង្គមស៊ីវិលនៅក្នុងខេត្ដព្រះសីហនុមួយចំនួនបានរិះគន់ និងស្នើឱ្យអាជ្ញាធរពាក់ព័ន្ធមានចំណាត់ការ និងដកហូតដីព្រៃកោងកាងរបស់រដ្ឋមកវិញ។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុបានថ្លែងថា៖ «ករណីនេះ គឺមន្ទីរជំនាញលោកកំពុងរៀបចំឯកសារក្នុងការឆ្លើយតបត្រឡប់ទៅវិញ»។
លោក រីម មុសើ តំណាងប្រជានេសាទ និងគណៈកម្មការសហគមន៍នេសាទព្រៃនប់ ២ បានប្រាប់ឱ្យដឹងថា ប្រជាពលរដ្ឋមានការព្រួយបារម្ភជាខ្លាំងចំពោះការបាត់បង់ ព្រៃកោងកាង ជាជម្រកជីវចម្រុះសម្រាប់ប្រជានេសាទអាស្រ័យផល ហើយពួកគាត់ស្នើសុំឱ្យអាជ្ញាធរពាក់ព័ន្ធជួយទប់ស្កាត់បទល្មើសកាប់បំផ្លាញព្រៃកោងកាងនេះតទៅទៀត ដើម្បីរក្សាទុកព្រៃលិចទឹកឱ្យពលរដ្ឋក្រីក្រប្រកបរបរចិញ្ចឹមជីវិតប្រចាំថ្ងៃ។
លោកថ្លែងថា៖ «ប្រជាពលរដ្ឋទាំងនោះក៏បានទទូចស្នើសុំរាជរដ្ឋាភិបាល ដកហូតឬលុបចោលបណ្ណកម្មសិទ្ធិគ្របលើដីព្រៃកោងកាងរបស់សហគមន៍នេសាទព្រៃនប់ ២ និងសំណូមពរដល់អង្គភាពប្រឆាំងអំពើពុករលួយ ពិនិត្យមើលភាពមិនប្រក្រតីនៃការលួចចេញប្លង់រឹងទាំង ៧ បណ្ណគ្របលើដីព្រៃកោងកាង ដែលឈានទៅការបំផ្លាញបរិស្ថាននៃជីវចម្រុះធនធានធម្មជាតិដ៏កម្រនៅកម្ពុជា»។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) ស្នើសុំឱ្យក្រសួងស្ថាប័នពាក់ព័ន្ធពន្លឿន និងចាត់វិធានការតាមផ្លូវច្បាប់ក្នុងការដកហូតព្រៃកោងកាងនៅតំបន់ដែលមានភាពមិនប្រក្រតីនោះទុកជាសម្បត្តិរដ្ឋវិញស្របតាមច្បាប់រដ្ឋធម្មនុញ្ញច្បាប់ជលផល ភូមិបាល ឆ្នាំ ២០០១ និងអនុក្រឹត្យ រួមទាំងឯកសារពាក់ព័ន្ធនានាបង្ហាញថា ដីសាធារណៈរបស់រដ្ឋមិនអាចក្លាយទៅជាកម្មសិទ្ធិឯកជនឡើយ។
លោកថ្លែងថា៖ «ដោយមើលឃើញការឆក់ឱកាសនិយមបំផ្លាញធនធានធម្មជាតិ ដ៏គួរឱ្យព្រួយបារម្ភនៃតំបន់ព្រៃកោងកាង អង្គការ CNRO ចាត់ទុកថា សហគមន៍តំបន់ព្រៃនប់ ២ ជាកន្លែង សួនកោងកាងអាពាហ៍ពិពាហ៍។ កាលជំនាន់ លោក យន្ត មីន ជាអភិបាលខេត្ត គឺតែងតែចុះទៅជួយដាំកោងកាងនៅទីនោះ ជាពិសេសគូស្នេហ៍ដែលបានរៀបការហើយនៅក្នុងតំបន់ហ្នឹងត្រូវតែទៅដាំដើមកោងកាងឱ្យបាន ១ ដើមទុកជានិមិត្តរូបការពារធនធានធម្មជាតិ»។
លោក ចេង ស្រុង ប្រធានមន្ទីររៀបចំដែនដី និងនគរូបនីយកម្មខេត្តព្រះសីហនុ មិនបានឆ្លើយតបលើករណីនេះទេ កាលពីថ្ងៃទី ២២ វិច្ឆិកានេះ ក្រោយពីឃើញសារតាមបណ្ដាញតេឡេក្រាមរបស់ ភ្នំពេញ ប៉ុស្ដិ៍៕
