.jpg)
ក្មេងប្រុសរងគ្រោះ កំពុងសម្រាកព្យាបាលនៅមន្ទីរពេទ្យឯកជន។ រូបថត សហការី
ភ្នំពេញៈ សមត្ថកិច្ចជំនាញខណ្ឌកំបូល កំពុងបន្តសាកសួរជនសង្ស័យឈ្មោះ វ៉ន វុទ្ធី ជាមន្ត្រីយោធាកងអន្តរាគមន៍ឆត្រយោង ៩១១ ដើម្បីកសាងសំណុំរឿងបញ្ជូនទៅតុលាការ ករណី វ៉ៃ និងចាប់បោកក្មេងប្រុសម្នាក់អាយុ ១៥ ឆ្នាំ សន្លប់ កាលពីល្ងាចថ្ងៃទី ២០ វិច្ឆិកា។ អ្នកនាំពាក្យក្រសួងការពារជាតិថ្លែងថា ករណីនេះមិនទាក់ទងនឹងច្បាប់យោធានោះទេ ដូច្នេះគឺត្រូវទុកឱ្យតុលាការស៊ីវិលជាអ្នកសម្រេច។
លោក ឈឹម សាវុធ អធិការរងទទួលផែនព្រហ្មទណ្ឌខណ្ឌកំបូលបានប្រាប់ភ្នំពេញប៉ុស្តិ៍នៅថ្ងៃទី ២២ វិច្ឆិកាថា បន្ទាប់ពីបានចាប់ឃាត់ខ្លួនមន្ត្រីយោធារូបនេះ សមត្ថកិច្ចជំនាញបានធ្វើការសាកសួរ និងត្រៀមបញ្ជូនជនសង្ស័យទៅតុលាការ ដើម្បីបន្តនីតិវិធីតាមផ្លូវច្បាប់។ លោកបញ្ជាក់ថា៖ «ហើយរឿងចរចាគ្នា ខាងសមត្ថកិច្ចអត់លូកដៃទេ បើខាងភាគីគាត់ត្រូវរ៉ូវគ្នា ឬឯកភាពគ្នាត្រង់កន្លែងណាមួយជារឿងរបស់ភាគីសងខាង»។
លោកថ្លែងថា សមត្ថកិច្ច មិនលូកដៃធ្វើការសម្របសម្រួលរវាងគ្រួសារជនសង្ស័យ និងគ្រួសារជនរងគ្រោះនោះទេ ព្រោះសមត្ថកិច្ចគ្រាន់តែទទួលបានបណ្តឹង ហើយត្រូវកសាងសំណុំរឿងទៅតាមអង្គហេតុ ចំពោះអ្វីដែលមានបទល្មើសប៉ុណ្ណោះ។
ទោះយ៉ាងណា លោក សាវុធ មិនទាន់បញ្ជាក់ពីពេលវេលាច្បាស់លាស់ដែលត្រូវបញ្ជូនជនសង្ស័យទៅតុលាការនៅឡើយទេ ដោយលោកគ្រាន់តែនិយាយថា នឹងបញ្ជូនសំណុំរឿងទៅតាមដំណាក់កាល។
លោកថា៖ «ដោយសារជាប់រវល់ធ្វើរឿងបទឧក្រិដ្ឋ ធ្វើរឿងឃាតកម្ម និងធ្វើរឿងនេះផង ដូច្នេះយើងកំពុងកសាងសំណុំរឿងកសាងភ័ស្ដុតាងបន្តបន្ទាប់គ្នា ដើម្បីត្រៀមបញ្ជូនទៅតុលាការ»។ លោកឱ្យដឹងដែរថា ចំណាត់ការនេះធ្វើឡើងបន្ទាប់ពីទទួលបានពាក្យបណ្តឹងរបស់ម្តាយក្មេងរងគ្រោះ ដើម្បីស្នើឱ្យសមត្ថកិច្ចមូលដ្ឋានចាត់វិធានការ។
បើតាមបណ្តឹងរបស់ម្តាយក្មេងរងគ្រោះ គាត់បានឱ្យកូនប្រុសគាត់ទៅយកខោអាវពីកន្លែងបោកអ៊ុត ប៉ុន្តែដោយសារខោអាវមិនទាន់បោកអ៊ុតរួច ក្មេងប្រុស (យឹម សំណាង) ក៏បានលេងជាមួយកូនជនសង្ស័យឈ្មោះ វ៉ន វុទ្ធី ក្រោយមកក៏មានបញ្ហាឈានដល់ប្រើអំពើហិង្សា។
ហេតុការណ៍នេះបានកើតឡើងកាលពីម៉ោង ៥ និង ៣០ នាទីល្ងាចថ្ងៃទី ២០ ខែវិច្ឆិកា ឆ្នាំ ២០២១ នៅសង្កាត់កំបូល ខណ្ឌកំបូល។
ភ្នំពេញប៉ុស្តិ៍ មិនទាន់អាចទាក់ទងសុំការអត្ថាធិប្បាយពីម្តាយក្មេងរងគ្រោះគឺអ្នកស្រី ហេង សុក បាននៅឡើយទេ។ ប៉ុន្តែអ្នកស្រី ហេង សុក បានប្រាប់សារព័ត៌មានក្នុងស្រុកដោយរៀបរាប់ហេតុការណ៍ថា មុនពេលកើតហេតុ កូនអ្នកស្រី ឈ្មោះ យឹម សំណាង ត្រូវបានអ្នកស្រីប្រើឱ្យទៅយកខោអាវនៅកន្លែងបោកអ៊ុតនៅទីតាំងខាងលើ ស្របពេលជនសង្ស័យ វ៉ន វុទ្ធី កំពុងអង្គុយផឹកស៊ីជាមួយបក្ខពួក ៤-៥ នាក់នៅក្បែរទីនោះ។ ដោយសារខោអាវមិនទាន់រួចរាល់ ម្ចាស់ហាងបោកអ៊ុតបានឱ្យក្មេងប្រុសនោះអង្គុយរង់ចាំបន្តិចសិន បន្ទាប់មកក្មេងប្រុសនោះក៏បានលេងសើចជាមួយមិត្តភក្តិរបស់គាត់។ នៅពេលនោះជនសង្ស័យ វ៉ន វុទ្ធី បានដើរចូលមក ហើយសួរក្មេងប្រុសរងគ្រោះថា៖ «អ្ហែងចង់ធ្វើបងធំនៅទីណាទេឬ?»។ ក្មេងប្រុសបានឆ្លើយថា៖ «ខ្ញុំគ្រាន់តែលេងជាមួយមិត្តភក្ដិរបស់ខ្ញុំទេ»។
ពេលនោះជនសង្ស័យក៏បានទះកំភ្លៀងជនរងគ្រោះ ១ ដៃ ហើយអុកនឹងក្បាលជង្គង់ព្រមទាំងចាប់កអាវក្មេងហើយបោកទៅនឹងធុងទឹកកក បណ្តាលឱ្យក្មេងរងគ្រោះសន្លប់ ហើយក៏មានអ្នកជិតខាងមកជួយសង្គ្រោះ។
បច្ចុប្បន្ន ក្មេងរងគ្រោះកំពុងសម្រាកព្យាបាលនៅមន្ទីរពេទ្យឯកជនមួយ។
អ្នកនាំពាក្យក្រសួងការពារជាតិលោក ឈុំ សុជាត បានសម្តែងការសោកស្តាយចំពោះការប្រើអំពើហិង្សារបស់មន្ត្រីយោធារូបនេះ។ លោក សុជាត ប្រាប់ភ្នំពេញប៉ុស្តិ៍នៅថ្ងៃទី ២២ វិច្ឆិកាថា ករណីនេះ មិនទាក់ទងនឹងច្បាប់យោធានោះទេគឺទុកឱ្យតុលាការស៊ីវិលជាអ្នកសម្រេច។
លោកបញ្ជាក់ថា៖ «ទុកឱ្យតុលាការគេអ្នកសម្រេចទៅ ព្រោះអត់ទាក់ទងបទល្មើសយោធា ច្បាប់យោធាទេ ហើយយើងអត់មានការគាំទ្រការប្រើអំពើហិង្សាទេគឺមានតែការសោកស្តាយ ចំពោះការប្រព្រឹត្តបែបនេះ ហើយយើងមានតែសុំឱ្យសមត្ថកិច្ចធ្វើតាមច្បាប់»៕
