.jpg)
អាវុធដែលរកឃើញនៅស្រុកភ្នំព្រឹក ខេត្តបាត់ដំបងកាលពីថ្ងៃ ១២ វិច្ឆិកា ឆ្នាំនេះ ។ រូបថត ហ្វេសប៊ុក
ភ្នំពេញៈ មន្ត្រីយោធា ៤ នាក់ ក្នុងចំណោម ៧ នាក់ ត្រូវបានចៅក្រមស៊ើបសួរសម្រេចចេញដីកាឃុំខ្លួននៅពន្ធនាគារព្រៃសនៅថ្ងៃទី ២៣ វិច្ឆិកា ខណៈជន ៣ នាក់ទៀតតំណាងអយ្យការកំពុងបន្តនីតិវិធីសាកសួរពាក់ព័ន្ធករណីជួញដូរអាវុធម៉ាក AK-47 និងអាវុធស្វ័យប្រវត្តិសរុប ១០៥ ដើម ដែលរកឃើញទីតាំងលាក់អាវុធនៅខេត្តបាត់ដំបង កាលពីខែតុលានិងខែវិច្ឆិកា ឆ្នាំនេះ។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញបានប្រាប់នៅថ្ងៃទី ២៣ វិច្ឆិកាថា ករណីនេះមានជនត្រូវចោទចំនួន ៤ នាក់ ត្រូវបានឃុំខ្លួននៅថ្ងៃទី ២៣ វិច្ឆិកា តាមការចោទប្រកាន់របស់តំណាងអយ្យការ ខណៈជន ៣ នាក់ទៀតអយ្យការកំពុងបន្តនីតិវិធីសាកសួរនៅឡើយ។
លោកបានថ្លែងថា៖ «ករណីខាងលើនេះ តំណាងអយ្យការបានបើកការស៊ើបសួរ និងចោទពីបទជួញដូរ នាំចេញ និងសន្និធិអាវុធគ្រឿងផ្ទុះ និងគ្រាប់រំសេវដោយគ្មានការអនុញ្ញាតពីអាជ្ញាធរមានសមត្ថកិច្ចតាមមាត្រា ៤៨៨ និងមាត្រា ២០ នៃក្រមព្រហ្មទណ្ឌ និងច្បាប់ស្តីពីការគ្រប់គ្រងអាវុធគ្រឿងផ្ទុះនិងគ្រាប់រំសេវ»។
លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេសបានប្រាប់ ភ្នំពេញ ប៉ុស្តិ៍ កាលពីថ្ងៃទី ២២ វិច្ឆិកាថា កម្លាំងកងរាជអាវុធហត្ថលើផ្ទៃប្រទេសបានឃាត់ខ្លួនមន្ត្រីយោធាបានចំនួន ៦ នាក់ គឺអនុវត្តតាមដីការបស់តុលាការ។ចំណែកមន្ត្រីយោធាម្នាក់ទៀតត្រូវបានកម្លាំងនគរបាលជាតិឃាត់ខ្លួន។
លោកបន្តថា ជនទាំង ៦ នាក់រួមមាន យោធាពាក់ផ្កាយ ២ ម្នាក់ ដែលមានមុខតំណែងជាមេបញ្ជាការទទួលខុសត្រូវខាងរោងជាងចម្រុះ។ យោធាពាក់ផ្កាយ ១ ម្នាក់ ជាមេបញ្ជាការរងទទួលខុសត្រូវខាងរោងជាងចម្រុះ។ យោធាពាក់ស័ក្តិ ៣ ម្នាក់ និងយោធាពាក់ស័ក្តិ ៤ កន្លះមា្នក់ កាន់ខាងជួសជុលអាវុធថ្មើរជើង។ អ្នកទាំង ៤ នៅក្នុងអង្គភាពរោងជាងចម្រុះជាមួយគ្នា។
ដោយឡែក ២ នាក់ទៀត មានម្នាក់ គឺយោធាពាក់ស័ក្តិ ៤ កន្លះ ជាអនុបញ្ជាការផ្នែកសឹករងស្រុកកំរៀង ខេត្តបាត់ដំបង និងម្នាក់ទៀត គឺមន្ត្រីយោធាព្រឹន្ទបាលឯក ជាយោធិនចំណុះផ្នែកសឹករងស្រុកភ្នំព្រឹក។
បើតាមលោក សៅ សុខា ជនសង្ស័យទាំង ៦ នាក់ ត្រូវបានសមត្ថកិច្ចកងរាជអាវុធហត្ថឃាត់ខ្លួនបានជាបន្តបន្ទាប់ គឺកាលពីថ្ងៃទី ១៩ ខែវិច្ឆិកា ឃាត់នៅសៀមរាបបានម្នាក់។ បន្ទាប់មកនៅថ្ងៃទី ២០ និង ២១ ខែវិច្ឆិកា សមត្ថកិច្ចឃាត់បាន ២ នាក់ នៅខេត្តបាត់ដំបង និង ៣ នាក់ទៀតឃាត់ខ្លួននៅរាជធាភ្នំពេញថ្ងៃទី ២២ ខែវិច្ឆិកា។
លោក សៅ សុខា បានបញ្ជាក់ថា ករណីនេះរកឃើញអាវុធលើកទី១ នៅស្រុកកំរៀងកាលថ្ងៃទី ១៩ ខែ តុលា ឆ្នាំ ២០២១។ ចំណែកករណីរកឃើញអាវុធលើកទី២ នៅស្រុកភ្នំព្រឹក ខេត្តបាត់ដំបង កាលពីថ្ងៃទី ១២ និងថ្ងៃទី ១៣ ខែ វិច្ឆិកា ឆ្នាំ ២០២១ ដោយកម្លាំងសមត្ថកិច្ចបប្រមូលអាវុធសរុបបានចំនួន ១០៥ ដើម។ ក្នុងនោះមានអាវុធម៉ាក AK-47 ចំនួន ១០០ ដើម អាវុធស្វ័យប្រវត្តិប្រភេទ ១២,៧ ចំនួន ២ ដើម និង M-79 ចំនួន ៣ ដើម៕
