.jpg)
កំណាត់ផ្លូវលេខ៧០ ត្រង់ចំណុចភូមិពាម ឃុំរការកោង១ ស្រុកមុខកំពូល។ រូបថត FB
កណ្ដាលៈ រំហូរទឹកភ្លៀង ដែលហូរច្រោះតាមច្រាំងទន្លេ និងចរន្តទឹកទន្លេមេគង្គ បានបង្កឱ្យមានការបាក់ស្រុតកំណាត់ផ្លូវលេខ ៧០ ត្រង់ចំណុចភូមិពាម ឃុំរការកោង ១ ស្រុកមុខកំពូល ខេត្តកណ្ដាល កាលពីវេលាម៉ោង ១:៥៣ នាទីព្រឹក ថ្ងៃទី ២៣ ខែ វិច្ឆិកា ឆ្នាំ ២០២១ បន្ទាប់ពីមានភ្លៀងធ្លាក់ខ្លាំងជាច្រើនម៉ោងកាលពីថ្ងៃទី ២២ ខែ វិច្ឆិកា ឆ្នាំ ២០២១។ នេះបើតាមការអះអាងពីអាជ្ញាធរមូលដ្ឋាន។
លោក យឺន សារ៉ាត់ អធិការរងស្រុកមុខកំពូលបានប្រាប់ ភ្នំពេញ ប៉ុស្តិ៍ថា នៅចំណុចទីតាំងដែលបានបាក់ស្រុតនោះ ធ្លាប់បានបាក់ស្រុតច្រាំងទន្លេម្ដងរួចមកហើយ កាលពីខែសីហាកន្លងទៅថ្មីៗនេះ ប៉ុន្តែកាលនោះ មិនទាន់បាក់ស្រុតដល់ផ្លូវនោះទេ។
លោក សារ៉ាត់ បានបញ្ជាក់ថា៖ «ឥឡូវនេះបានបាក់ស្រុតដាច់កំណាត់ផ្លូវលេខ ៧០ អស់មួយចំហៀងប្រវែង២០ម៉ែត្រចូលទៅក្នុងទន្លេ។ ហើយនៅមានស្នាមប្រេះ ដែលអាចនឹងបាក់ស្រុតកាត់ផ្ដាច់កំណាត់ផ្លូវមួយខ្សែនេះតែម្ដង ប្រសិនបើមានភ្លៀងធ្លាក់ ឬរថយន្តតូចធំ បើកឆ្លងកាត់ចំណុចនោះ»។
ជុំវិញករណីនេះ លោក ម៉ឹង យូឡេង ប្រធានមន្ទីរសាធារណការនិងដឹក្ជញ្ជូនខេត្តកណ្ដាល បានប្រាប់ ភ្នំពេញ ប៉ុស្តិ៍ថា នៅពេលនេះ ក្រុមការងាររបស់លោក បានសហការជាមួយអាជ្ញាធរមូលដ្ឋាន បិទចរាចរណ៍ឆ្លងកាត់កំណាត់ផ្លូវ ៧០ នៅចំណុចទីតាំងបាក់ស្រុតនោះ ជាបណ្ដោះអាសន្ន ដើម្បីផ្ដល់ឱកាសឱ្យក្រុមមន្ត្រីជំនាញធនធានទឹកចុះសិក្សារៀបចំគ្រឹះបាតទន្លេ ឱ្យរឹងមាំ ដើម្បីឈានដល់ការជួសជុលស្ដារកំណាត់ផ្លូវនេះឡើងវិញ។
លោកថ្លែងថា៖ «ក្នុងអំឡុងពេលនេះ ក្រុមមន្ត្រីជំនាញយើង កំពុងសិក្សារៀបចំធ្វើផ្លូវវាង ដើម្បីឱ្យអ្នកដំណើរប្រើប្រាស់ជាបណ្ដោះអាសន្ន មុនពេលមន្ត្រីជំនាញនៃវិស័យធនធានទឹក រៀបចំគ្រឹះច្រាំងទន្លេបានរឹងមាំរួចហើយនោះ»។
លោក អ៊ុក វណ្ណា ប្រធានមន្ទីរធនធានទឹក និង ឧតុនិយម ខេត្តកណ្ដាល បានប្រាប់ ភ្នំពេញ ប៉ុស្តិ៍ថា នៅចំណុចទីតាំងបាក់ស្រុតនោះ មានទឹកហូរច្រោះខ្លាំង ហើយបាតច្រាំងទន្លេមានភាពទន់ជ្រាយ ងាយនឹងបាក់។ ម្យ៉ាងទៀតចរន្តទឹកទន្លេមេគង្គនៅក្នុងភូមិសាស្ត្រនោះ ក៏មានការហូរបត់បែនបុកច្រាំងយ៉ាងគំហុកផងដែរ។
យ៉ាងណាក៏ដោយ លោកបានថ្លែងថា នៅពេលនេះក្រុមមន្ត្រីជំនាញកំពុងសិក្សារកមធ្យោបាយទប់ស្កាត់ករណីបាក់ច្រាំងនេះហើយ ដោយរៀបចំដាក់បាវខ្សាច់និងថ្មធំៗ ដើម្បីរៀបសង់គ្រឹះបាតទន្លេឱ្យរឹងមាំ៕
វីដេអូ៖
