ភ្នំពេញៈ រាជរដ្ឋាភិបាលកម្ពុជាគ្រោងសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាលលំដាប់អន្តរជាតិមួយនៅតំបន់ផ្លូវកប់ស្រូវឬមហាវិថីឈ្នះឈ្នះក្នុងរាជធានីភ្នំពេញក្រោមគម្រោងចំណាយថវិកាប្រមាណ ៨០ លានដុល្លារអាមេរិក ជាថវិកាកម្ចីពីធនាគារនៃសាធារណរដ្ឋកូរ៉េ និងថវិកាបដិភាគរបស់រាជរដ្ឋាភិបាលកម្ពុជា។ នេះបើតាមលោក ម៉ម ប៊ុនហេង រដ្ឋមន្រី្តក្រសួងសុខាភិបាល។
លោក ម៉ម ប៊ុនហេង បានលើកឡើងដូចនេះ នៅក្នុងជំនួបជាមួយលោក គឹម ហ៊ូន (Kim Hoon) តំណាងសម្ព័ន្ធក្រុមហ៊ុន Inje(Inje Joint Venture) ក្រោយពីក្រុមហ៊ុននេះទទួលបានជោគជ័យក្នុងការដេញថ្លៃគម្រោងសាងសង់មនី្ទរពេទ្យសាកលវិទ្យាល័យវិទ្យាសាស្ត្រសុខាភិបាលនេះនៅទីស្តីការក្រសួងសុខាភិបាលកាលពីថ្ងៃទី ២២ ខែ វិច្ឆិកា ឆ្នាំ ២០២១។
ជុំវិញការសាងសង់មន្ទីរពេទ្យថ្មីនេះ លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានបញ្ជាក់ប្រាប់អ្នកសារព័ត៌មានក្រោយបញ្ចប់ជំនួបនេះថាគម្រោងនេះបានទទួលការឯកភាពពីប្រមុខរាជរដ្ឋាភិបាលក៏ដូចជាក្រសួងសេដ្ឋកិច្ច និងហិរញ្ញវត្ថុដោយមានទីតាំងនៅតំបន់ផ្លូវកប់ស្រូវឬលើមហាវិថីឈ្នះឈ្នះ ក្នុងរាជធានីភ្នំពេញ ដោយសាងសង់លើផ្ទៃដីទំហំជាង ២ ហិកតា ហើយគ្រោងប្រើពេលវេលា ដើម្បីសាងសង់ប្រមាណ ៣-៤ ឆ្នាំ ក្នុងទំហំថវិកាប្រមាណ ៨០ លានដុល្លារ អាមេរិកក្នុងនោះថវិកា ៦៦ លានដុល្លារ ជាប្រាក់កម្ចីពីធនាគារនៃសាធារណរដ្ឋកូរ៉េនិងថវិកាបដិភាគរបស់រាជរដ្ឋាភិបាលចំនួន ១៤ លានដុល្លារ។
លោកស្រីថ្លែងថា៖ «ខ្ញុំចង់ជម្រាបបញ្ជាក់ថាមនី្ទរពេទ្យសាកលវិទ្យាល័យវិទ្យាសាស្ត្រសុខាភិបាលនេះ គឺជាមន្ទីរពេទ្យសាកលវិទ្យាល័យធំជាងគេលើកដំបូងនៅកម្ពុជាដែលផ្ដល់អាទិភាពខ្ពស់ដល់វិស័យសុខាភិបាលពីសំណាក់ប្រមុខរាជរដ្ឋាភិបាលដែលមានសម្ដេចតេជោ [ហ៊ុន សែន] លោកបានផ្ដល់អាទិភាពដល់វិស័យសុខាភិបាល ជាពិសេសនៅក្នុងដំណាក់កាលដែលប្រទេសកម្ពុជាកំពុងតែប្រយុទ្ធប្រឆាំងនឹងជំងឺកូវីដ ១៩ ហើយប្រទេសកម្ពុជា បានទទួលនូវជោគជ័យក្នុងការផ្ដល់វ៉ាក់សាំងដល់ប្រជាពលរដ្ឋ ក៏ដូចជាការផ្ដល់នូវសេវាព្យាបាល និងការពារដល់ប្រជាពលរដ្ឋ»។
លោកស្រីបានឱ្យដឹងថា មនី្ទរពេទ្យសាកលវិទ្យាល័យវិទ្យាសាស្ត្រសុខាភិបាលនេះ អាចផ្ដល់ជាកន្លែងសិក្សាដល់និស្សិតដែលទើបបញ្ចប់ការសិក្សាពីមហាវិទ្យាល័យឬសាកលវិទ្យាល័យដើម្បីមកអនុវត្ដនិងសិក្សានៅមន្ទីរពេទ្យសាកលវិទ្យាល័យនេះក្រោយពីបញ្ចប់ការសាងសង់។
លោកស្រីបញ្ជាក់ថា៖ «កាលណាយើងមានមន្ទីរពេទ្យសាកលវិទ្យាល័យវិទ្យាសាស្ត្រសុខាភិបាលនេះនិស្សិតយើងអត់ចាំបាច់មានការលំបាកទេ។ រាល់ថ្ងៃនេះនិស្សិតយើងមួយចំនួន ក្រោយពីគាត់បញ្ចប់ការសិក្សាហើយ កន្លែងអនុវត្ដនោះគឺថាចង្អៀតដែរ។ អ៊ីចឹង យើងមានទីតាំងនេះធំទូលាយហើយចំណុះគ្រែអាចមានចាប់ពី ៤០០ គ្រែ»។
បើតាមលោកស្រី យក់ សម្បត្ដិ កន្លែងវះកាត់ កន្លែងសិក្សា កន្លែងផ្ដល់ជាការអនុវត្ដនៃមន្ទីរពេទ្យសាកលវិទ្យាល័យវិទ្យាសាស្ត្រសុខាភិបាលនេះ គឺមានភាពធំទូលាយហើយមានគ្រូពេទ្យជំនាញៗសាស្ដ្រាចារ្យមួយចំនួនបញ្ចប់ការសិក្សានៅបរទេស ក៏ដូចជា ភាគីនៅក្នុងប្រទេសអាស៊ានមួយចំនួននឹងចូលរួមនៅក្នុងការបណ្ដុះបណ្ដាលនិស្សិតខ្មែរផងដែរ៕