.jpg)
មន្ត្រីបរិស្ថាន និងអាជ្ញាធរក្នុងខេត្តព្រះវិហារ ដើររើសសំរាម ក្នុងទិវាអនាម័យជាតិថ្ងៃទី ២៣ វិច្ឆិកា។ រូបថត ក្រសួងបរិស្ថាន
ភ្នំពេញៈ ក្រសួងបរិស្ថាន និងរាជធានី-ខេត្ដទូទាំងប្រទេស នៅថ្ងៃទី ២៣ វិច្ឆិកា បានប្រារព្ធទិវាអនាម័យជាតិ ក្រោមប្រធានបទ «ភូមិឋានស្អាត សុខភាពល្អ ជីវិតរីករាយ» ដោយបានណែនាំពលរដ្ឋឱ្យបន្តចូលរួមសម្អាតអនាម័យបរិស្ថាន នៅតាមផ្ទះសម្បែង ភូមិ ឃុំ របស់ខ្លួន ញែកសំរាមតាមប្រភេទ វេចខ្ចប់ទុកដាក់សំរាមឱ្យបានត្រឹមត្រូវ។
លោក នេត្រ ភក្ត្រា រដ្ឋលេខាធិការ ក្រសួងបរិស្ថាន និងមន្ដ្រីរាជការនៃរដ្ឋបាលខេត្ដកំពត រួមនឹងប្រជាពលរដ្ឋក្នុងខេត្ដនេះសរុបប្រមាណ ២៥០ នាក់ បានប្រារព្ធទិវាអនាម័យបរិស្ថានជាតិ នៅថ្ងៃទី២៣ វិច្ឆិកា នៅផ្សារត្រពាំងរពៅ សង្កាត់ព្រែកត្នោតក្រុងបូកគោ។
លោក ភក្ត្រា ថ្លែង ថា៖«សូមបងប្អូនប្រជាពលរដ្ឋ បន្តចូលរួមសម្អាតអនាម័យ បរិស្ថាននៅតាមផ្ទះសម្បែង ភូមិ ឃុំ របស់ខ្លួន ញែកសំរាមតាមប្រភេទ វេចខ្ចប់ទុកដាក់សំរាម ឱ្យបានត្រឹមត្រូវ និងចូលរួមអនុវត្តវិធានការ ៣ កុំ ៣ ការពារ ដើម្បីភូមិដ្ឋានរបស់យើង មានអនាម័យបរិស្ថានល្អ មានផាសុកភាព សម្រាប់ការរស់នៅ សុខុមាលភាពពលរដ្ឋយើងល្អ ចៀសផុតពីការឆ្លងជំងឺទាំងឡាយ»។
ក្រៅពីខេត្តកំពត រាជធានី-ខេត្តផ្សេងៗទៀត ក៏បានប្រារព្ធទិវាអនាម័យជាតិ ក្រោមប្រធានបទដូចគ្នានេះដែរ ក្នុងគោលបំណងបំផុស ឱ្យប្រជាពលរដ្ឋគ្រប់មជ្ឈដ្ឋាន ចូលរួមធ្វើអនាម័យ និងកែលម្អសោភ័ណភាពមូលដ្ឋានរបស់ខ្លួនឱ្យស្អាត និងបៃតង សំដៅកែប្រែផ្នត់គំនិតរបស់សាធារណជនគ្រប់មជ្ឈដ្ឋាន ឱ្យចូលរួមប្រតិបត្តិមេត្រីភាពបរិស្ថាន និងជំរុញការអនុវត្តគ្រប់គ្រងសំរាម សំណល់រឹងទីប្រជុំជន ទៅរាជធានី ក្រុង ស្រុកទូទាំងប្រទេសឱ្យមានភាពល្អប្រសើរឡើង។
លោក ភក្ត្រា ថ្លែងថា៖«ទិវាអនាម័យបរិស្ថានជាតិ ២៣ វិច្ឆិកា ឆ្នាំ ២០២១ នេះ ត្រូវបានប្រារព្ធធ្វើឡើង ក្នុងបរិបទដែលកម្ពុជា និងពិភពលោកបាន និងកំពុងខិតខំបើកដំណើរការប្រទេសឡើងវិញ តាមគន្លងថ្មី ក្រោយពីរងនូវផលប៉ះពាល់ពីការឆ្លងរីករាលដាលនៃជំងឺកូវីដ ១៩»។
លោក នៃ គង់ អភិបាលរងនៃគណៈអភិបាលខេត្តកំពត ដែលបានចូលរួមជាអធិបតីក្នុងទិវាអនាម័យបរិស្ថានជាតិនេះដែរ បានអំពាវនាវ ដល់ប្រជាពលរដ្ឋឱ្យចូលរួមថែរក្សា អនាម័យបរិស្ថាន បោសសម្អាតភូមិដ្ឋាន និងវេចខ្ចប់ទុកដាក់សំរាមឱ្យបានត្រឹមត្រូវ ដើម្បីធ្វើឱ្យបរិស្ថានទាំង៣ ស្អាត គឺទឹកស្អាត ខ្យល់ស្អាត និងដីស្អាត។
លោកថ្លែងថា៖«អនាម័យស្អាត នាំឱ្យសុខភាពល្អ និងជាផ្នែកមួយ នៃការទាក់ទាញភ្ញៀវទេសចរជាតិ និងអន្តរជាតិផងដែរ»។
រដ្ឋបាលខេត្តព្រះសីហនុ ក៏បានប្រារព្ធទិវាអនាម័យជាតិនៅថ្ងៃទី ២៣ វិច្ឆិកា ផងដែរ។ ពិធីនេះ បានប្រារព្ធធ្វើនៅឆ្នេរអូរឈើទាល ក្រោមវត្តមាន លោក ឡុង ឌីម៉ង់ អភិបាលរងខេត្តព្រះសីហនុ មន្ទីរបរិស្ថាន អាជ្ញាធរដែនដី មន្ត្រីរាជការ ប្រជាពលរដ្ឋ អាជីវករ លោកគ្រូ អ្នកគ្រូ និស្សិត និងសិស្សានុសិស្ស ជាច្រើនរូប។
លោក ឌីម៉ង់ ថ្លែងថា ទិវាអនាម័យជាតិនេះ ប្រារព្ធធ្វើឡើងក្នុងគោលបំណងបំផុសស្មារតី និងផ្លាស់ប្ដូរឥរិយាបថប្រជាពលរដ្ឋឱ្យចេះស្រឡាញ់ថែរក្សា សំអាតអនាម័យបរិស្ថាន និងជំរុញឱ្យមានការចាប់ផ្ដើមសកម្មភាពក្នុងការទទួលខុសត្រូវទុកដាក់សំណល់ មិនបោះចោលពាសវាលពាសកាល តាមទីសាធារណៈ ដែលជាហេតុធ្វើឱ្យប៉ះពាល់ដល់សោភ័ណភាពទីក្រុង។
លោកថ្លែងថា៖ «ការបំពុលដោយប្លាស្ទិក ធ្វើឱ្យប៉ះពាល់ដល់អាយុជីវិតមនុស្ស សត្វ ជាពិសេសសំណល់ប្លាស្ទិក ទាំងនេះកំពុងតែគំរាមកំហែងយ៉ាងធ្ងន់ធ្ងរទៅដល់ភពផែនដី»។
លោកលើកឡើងថា ទិវាអនាម័យជាតិ ២៣ វិច្ឆិកា គឺស្ថិតក្នុងក្រអៅបេះដូងប្រជាពលរដ្ឋខេត្តព្រះសីហនុ ហើយសូមស្មារតីនេះក្លាយជាមាគ៌ាដឹកនាំមនុស្សជាតិទាំងអស់ នៅលើសកលលោកឱ្យរួមគ្នា ជាកម្លាំងសំដៅរួមចំណែកដល់ការងារអនាម័យបរិស្ថាន ភូមិឋានស្អាត សុខភាពល្អ ជីវិតរីករាយ ដើម្បីធានាបាននូវការអភិវឌ្ឍប្រកបដោយចីរភាព និងការរស់នៅដោយភាពសុខដុម របស់មនុស្សគ្រប់ជំនាន់។
លោកបន្តថា៖«សូមចូលរួមធ្វើឱ្យភូមិឋានយើងស្អាត ទីក្រុងយើងមានសោភ័ណភាពបរិស្ថានល្អផ្តើមចេញពីយើងម្នាក់»។
លោក ម៉ែន គុង អ្នកនាំពាក្យសាលាខេត្ដស្ទឹងត្រែង បានឱ្យដឹងថា តាមរយៈទិវាអនាម័យជាតិនេះ រដ្ឋបាលខេត្ដស្ទឹងត្រែង បានរៀបចំព្រឹត្ដិការណ៍ ដោយមានការចូលរួមពីគ្រប់ផ្នែកពាក់ព័ន្ធ នៅក្រុងស្ទឹងត្រែង ដោយអនុវត្ដតាមគោលនយោបាយទិវាអនាម័យបរិស្ថានជាតិ។
លោកថ្លែងថា៖«យើងធ្វើជាព្រឹត្ដិការណ៍មួយ ដោយបានជួបជុំគ្នា ផ្សព្វផ្សាយអំពី ទិវាអនាម័យជាតិ សារៈសំខាន់នៃបរិស្ថាន និងអនាម័យ ដោយបានចូលរួមអនុវត្ដសកម្មភាពជាគំរូ នៅក្នុងការថែរក្សាបរិស្ថាន និងអនាម័យ ការរើសសំរាម និងការសម្អាតទីតាំងនៅក្នុងក្រុងស្ទឹងត្រែង»។
បើតាមក្រសួងបរិស្ថាន ទិវាអនាម័យជាតិ ២៣ វិច្ឆិកា ត្រូវបានរាជរដ្ឋាភិបាល បង្កើតឡើងដោយអនុក្រឹត្យលេខ ៤៧ ចុះថ្ងៃទី ១២ ខែ មិថុនា ឆ្នាំ ១៩៩៥ ក្នុងគោលបំណងលើកកម្ពស់ការអប់រំ ផ្សព្វផ្សាយ និងជំរុញចលនាប្រជាពលរដ្ឋ ព្រះសង្ឃ កងកម្លាំងប្រដាប់អាវុធ មន្ត្រីរាជការគ្រប់លំដាប់ថ្នាក់ សិស្ស និស្សិតឱ្យចូលរួមធ្វើអនាម័យ កែលម្អសោភ័ណភាពទីក្រុង ទីប្រជុំជន ជនបទ ភូមិឋាន វត្តអារាម សាលារៀន មន្ទីរពេទ្យ រោងចក្រ សហគ្រាស ទីផ្សារ និងមជ្ឈមណ្ឌលសេដ្ឋកិច្ច សំដៅរួមចំណែក កសាងសង្គមកម្ពុជាឱ្យមានបរិស្ថានល្អស្អាត និងភាពស្រស់បំព្រង។ កម្ពុជា បានប្រារព្ធទិវាអនាម័យបរិស្ថាននេះជារៀងរាល់ឆ្នាំ ក្រោមប្រធានបទផ្សេងៗ សំដៅចូលរួមក្នុងការធានាឱ្យបាននូវសោភ័ណភាព កិច្ចគាំពារសុខភាពសាធារណៈ និងបរិស្ថាន។
បើតាមលោក នេត្រ ភក្ត្រា កម្ពុជាមានសំណល់រឹងសំរាម មានប្រមាណជាង ១ ម៉ឺនតោន ក្នុង ១ ថ្ងៃ និង ១ ឆ្នាំ ជាង ៤ លានតោន និងមានកំណើនប្រមាណ ១៥% ក្នុង ១ ឆ្នាំ។
លោកបានឱ្យដឹងថា ក្នុងសំណល់សំរាម ១០០% មានសំណល់សរីរាង្គប្រមាណ ៦៨% សំណល់ប្លាស្ទិក ប្រមាណ ២០% និងសំណល់រឹងជាង ១០%។
លោកបន្តថា៖«អ្វីដែលយើងត្រូវយកចិត្តទុកដាក់បន្ថែម គឺសំណល់ប្លាស្ទិក ដែលជាសំណល់ប្រកបដោយគ្រោះថ្នាក់ ប្រសិនបើយើងមិនគ្រប់គ្រងបានល្អ ព្រោះសំណល់ប្លាស្ទិក មានផ្ទុកសារធាតុគីមី»៕
