.jpg)
លោក ខៀវ សុភ័គ (ឆ្វេង) និងលោក សៀម ភ្លុក ស្ថាបនិកបក្សបេះដូងជាតិ។ រូបថត ហ៊ាន រង្សី/FB
ភ្នំពេញៈ គណបក្សបេះដូងជាតិកំពុងរៀបចំឯកសារប្តឹងក្រសួងមហាផ្ទៃ ដែលមិនព្រមទទួលចុះបញ្ជីគណបក្សនយោបាយឱ្យខ្លួន ដែលការប្តឹងនេះ មន្ត្រីជាន់ខ្ពស់ឆ្លើយតបថា ក្រសួងមហាផ្ទៃស្វាគមន៍ចំពោះបណ្តឹងរបស់គណបក្សនេះ ដែលប្តឹងទៅតុលាការកំពូលពាក់ព័ន្ធនឹងការបដិសេធ ចំពោះការមិនព្រមទទួលចុះបញ្ជី បន្ទាប់ពីក្រសួងរកឃើញ គណបក្សមានការក្លែងបន្លំស្នាមមេដៃ និងអត្តសញ្ញាណបុគ្គល។
លោក សៀម ភ្លុក ស្ថាបនិកគណបក្សបេះដូងជាតិប្រាប់ ភ្នំពេញ ប៉ុស្តិ៍ នៅថ្ងៃទី ២៣ វិច្ឆិកាថា គណបក្សបេះដូងជាតិបានចេញសេចក្តីថ្លែងការណ៍មួយរួចហើយ។ បច្ចុប្បន្ន គណបក្សក៏កំពុងតែរៀបចំឯកសារ ដើម្បីដាក់ពាក្យប្តឹងទៅតុលាការកំពូល ព្រោះយោងតាមច្បាប់ស្តីពីវិសោធនកម្មច្បាប់ស្តីពីគណបក្សនយោបាយ មាត្រា ២៥ ថ្មីបើកផ្លូវឱ្យគណបក្សនយោបាយណាដែលក្រសួងមហាផ្ទៃបានចេញលិខិតមិនយល់ព្រមចុះបញ្ជី មានសិទ្ធិប្តឹង។
លោកបញ្ជាក់ថា គណបក្សមិនប្តឹងក្រសួងមហាផ្ទៃទាំងមូលទេ ប៉ុន្តែគណបក្សដាក់ពាក្យប្តឹងទៅតុលាការកំពូលគឺចំពោះការបដិសេធរបស់ក្រសួងមិនចុះបញ្ជីគណបក្សរបស់លោកដោយមានហេតុផលរបស់ខ្លួន។ គណបក្សរបស់លោក ក៏មានហេតុផលរបស់ខ្លួនទៅតតាំងគ្នា និងការពារនៃការស្នើសុំចុះបញ្ជីរបស់លោកជាមួយក្រសួងមហាផ្ទៃនៅតុលាការផងដែរ។
ទោះជាយ៉ាងណា លោកមិនបានកំណត់ពេលវេលាជាក់លាក់ក្នុងការយកពាក្យបណ្តឹងទៅដាក់នៅតុលាការកំពូលនៅពេលណានោះទេ ខណៈដែលឯកសារកំពុងត្រូវបានឱ្យមេធាវីរៀបចំឱ្យបានគ្រប់គ្រាន់។
ពាក់ព័ន្ធនឹងការចោទប្រកាន់ថា លោកដាក់ពាក្យប្តឹងនេះជាយុទ្ធសាស្ត្រក្នុងការមានសិទ្ធិស្នើសុំជ្រកកោននៅក្រៅប្រទេស ក្រោមហេតុផលនយោបាយនោះ លោកចាត់ទុកជាពាក្យគំរាមកំហែងប៉ុណ្ណោះ។ ប៉ុន្តែលោកមានជំនឿថា រាជរដ្ឋាភិបាល និងគណបក្សកាន់អំណាចមិនយកបញ្ហានេះ ដើម្បីធ្វើឱ្យមានភាពល្អក់កករផ្នែកលម្ហសេរីភាព នយោបាយ និងប្រជាធិបតេយ្យនៅក្នុងប្រទេសនោះទេ។
លោកថ្លែងថា៖ «ខ្ញុំជឿថា រដ្ឋាភិបាលនឹងអនុវត្តទៅតាមច្បាប់ ព្រោះយើងធ្វើដើម្បីទាំងអស់គ្នា ហើយខ្ញុំក៏គ្មានបំណងចេតនាទុច្ចរិត បង្កបញ្ហា ឬព្យសនកម្ម អប្បគមន៍ធ្វើឱ្យប៉ះពាល់ដល់សង្គម ដែលរដ្ឋាភិបាលត្រូវតែអនុវត្តច្បាប់នោះទេ។ រដ្ឋាភិបាលប្រាកដជាយល់! បើយកខ្ញុំទៅដាក់នៅពន្ធនាគារ ឬរារាំងខ្ញុំ វាអត់ចំណេញអីទេ មានតែខាតបង់»។
អ្នកនាំពាក្យក្រសួងមហាផ្ទៃលោក ខៀវ សុភ័គ ប្រាប់ភ្នំពេញប៉ុស្តិ៍តាមតេឡេក្រាម នាថ្ងៃទី ២២ ខែវិច្ឆិកា ថា លោកស្វាគមន៍ចំពោះគណបក្ស បេះដូងជាតិ ដែលបានចេញសេចក្តីថ្លែងការណ៍ និងមានបំណងប្តឹងក្រសួងមហាផ្ទៃជុំវិញការបដិសេធចំពោះការមិនចុះបញ្ជីគណបក្សនេះក្នុងបញ្ជីគណបក្សនយោបាយរបស់ក្រសួងមហាផ្ទៃ។
កាលពីដំបូងក្រសួងមហាផ្ទៃថា នឹងប្តឹងគណបក្សនេះ ពាក់ព័ន្ធនឹងការក្លែងបន្លំមេដៃរបស់ប្រជាពលរដ្ឋជាច្រើន ដែលក្រសួងរកឃើញ។ ប៉ុន្តែដោយយល់ឃើញថា ស្ថានភាពគុក វាចង្អៀត និងជួយសម្រួលដល់នីតិវិធីតុលាការ ក៏សម្រេចចិត្តមិនប្តឹងវិញ ដោយគ្រាន់តែចេញលិខិតផ្លូវការមួយបដិសេធមិនចុះបញ្ជីគណបក្សទេ។
លោកថ្លែងថា៖ «ឥឡូវ វាល្អដែរ ប៉ុន្តែសូមជម្រាបជូនគាត់មុនថាកុំរត់ចោលស្រុក កុំរត់ចោលស្រែ កុំរត់ចោលចម្ការ។ នៅតតាំងគ្នានៅតុលាការ។ ផ្តាំទៅមេគណបក្សមុននោះឱ្យហើយ បើលេងកុំខឹង បើខឹងកុំលេង។ លេងចុះ លេងឡើង ទៅយំឡាំប៉ា ឱបជើង ឱបដៃបរទេស សុំសិទ្ធិ ជ្រកកោនអី កុំឱ្យសោះ! ត្រូវធ្វើចិត្តជាកូនប្រុសនៅតតាំងក្តីជាមួយគ្នា ព្រោះរឿងនេះ ជារឿងផ្លូវច្បាប់»។
លោក សេង សារី អ្នកវិភាគនយោបាយ និងសង្គមប្រាប់ ភ្នំពេញ ប៉ុស្តិ៍ នៅថ្ងៃទី ២៣ វិច្ឆិកា ថា នេះជាលើកទី១ ហើយ ដែលក្រសួងមហាផ្ទៃបានត្រួតពិនិត្យស្នាមមេដៃជាមួយគណបក្សបេះដូងជាតិក្នុងប្រវត្តិសាស្ត្រនៃការចុះបញ្ជីគណបក្សនយោបាយដែលមិនធ្លាប់ឃើញពីមុនមកនេះ។
ទោះជាយ៉ាងណា លោកថ្លែងថា ក្រសួងមហាផ្ទៃធ្វើការត្រួតពិនិត្យស្នាមមេដៃនេះក៏មិនមានអ្វីខុសដែរ។ ប៉ុន្តែអ្នកដែលមានសិទ្ធិធ្វើ គឺតុលាការជាអ្នកធ្វើកិច្ចការនេះ។ មួយទៀតសេចក្តីឆ្លើយតបទៅគណបក្សបេះដូងជាតិ ក៏មិនបានរួមបញ្ចូលនឹងស្នាមមេដៃដែរ គ្រាន់តែឱ្យកែសម្រួលលក្ខន្តិកៈមួយចំនួន ប៉ុន្តែចុងបញ្ចប់ វាទៅខុសស្នាមមេដៃទៅវិញ។
លោក សារី បញ្ជាក់ថា៖ «ក្រសួងមហាផ្ទៃ គួរតែផ្តល់ឱកាសគណបក្សបេះដូងជាតិ កែសម្រួលស្នាមមេដៃ ដោយអាចជូនដំណឹងថាស្នាមមេដៃមានភាពមិនច្បាស់លាស់ជាន់គ្នាអ៊ីចឹងទៅ។ ត្រូវទៅយកស្នាមមេដៃថ្មីមកជំនួសទើបអាចចុះបញ្ជីបាន។ មិនគួរយករឿងហ្នឹងដល់តុលាការទេ។ ខ្ញុំគិតថា វាមានអីមួយនៅពីក្រោយហ្នឹងហើយ»។
ក្រសួងមហាផ្ទៃ កាលពីថ្ងៃទី ១៦ វិច្ឆិកា ឆ្នាំ ២០២១ បានបដិសេធចុះបញ្ជីគណបក្សបេះដូងជាតិ ដោយថា ការផ្តិតមេដៃរបស់បក្ស ដើម្បីគាំទ្រក្នុងការសុំចុះបញ្ជីមានចេតនាទុច្ចរិត ដោយមានការផ្តិតស្នាមមេដៃជំនួស។ ការក្លែងបន្លំអត្តសញ្ញាណបុគ្គល និងការផ្ដិតធ្វើឱ្យខូចគុណភាព ដើម្បីបង្កើនចំនួនសមាជិក ព្រមទាំងខ្លឹមសារប្រការមួយចំនួននៃលក្ខន្តិកៈគណបក្សផ្ទុយនឹងបទប្បញ្ញត្តិនៃច្បាប់ស្តីពីគណបក្សនយោបាយផងដែរ។
បើតាមគណបក្សបេះដូងជាតិខ្លួនមានស្នាមមេដៃអ្នកគាំទ្រភ្ជាប់ជាមួយចំនួន ៤ ៦១៨ នាក់ដាក់ទៅក្រសួងមហាផ្ទៃ ប៉ុន្តែក្រសួងពិនិត្យឃើញ ៤ ៧៨១ នាក់៕
វីដេអូ៖
