ភ្នំពេញៈ យោងតាមរបាយការណ៍ថ្មីរបស់សហរដ្ឋអាមេរិកបានឱ្យដឹងថាចំនួននិស្សិតកម្ពុជា ដែលបានសិក្សានៅតាមមហាវិទ្យាល័យ និងសាកលវិទ្យាល័យក្នុងសហរដ្ឋអាមេរិកឆ្នាំសិក្សា ២០២០-២០២១ មានការកើនឡើងជាង ១៤ ភាគរយ បើធៀបនឹងឆ្នាំសិក្សាមុន ទោះបីស្ថិតក្នុងបរិបទកូវីដ ១៩ ក៏ដោយ។
របាយការណ៍ Open Doors ឆ្នាំ ២០២១ ស្តីពីការផ្លាស់ប្តូរផ្នែកសិក្សាអប់រំអន្តរជាតិរបស់សហរដ្ឋអាមេរិកដែលបានចេញផ្សាយនៅថ្ងៃទី ២៣ ខែវិច្ឆិកា ឆ្នាំនេះបានឱ្យដឹងថា សម្រាប់និស្សិតកម្ពុជាដែលបានសិក្សានៅសហរដ្ឋអាមេរិកឆ្នាំ ២០២០-២០២១ មានចំនួន ៨៤៨ នាក់ជាចំនួនច្រើនជាងកាលពីឆ្នាំ ២០១៩-២០២០ ដែលមានត្រឹមតែចំនួន ៧៤២ នាក់។
របាយការណ៍បន្តថា ចំនួននេះមានការកើនឡើង ១៤,៣ ភាគរយ បើប្រៀបធៀបឆ្នាំសិក្សាកន្លងទៅដែលបង្ហាញពីសក្តានុពលទៅសិក្សានៅបរទេស ទោះបីក្នុងបរិបទនៃជំងឺរាតត្បាតកូវីដ-១៩ ក៏ដោយ។ កំណើននេះបន្តនូវនិន្នាការជាវិជ្ជមានក្នុងរយៈពេល ៧ ឆ្នាំកន្លងមកនេះ។
លោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជាបានលើកឡើងនៅក្នុងរបាយការណ៍នេះថា លោកមានមោទនភាពដែលមាននិស្សិតកម្ពុជាច្រើនជ្រើសយកការសិក្សានៅក្នុងសហរដ្ឋអាមេរិក។ លោកបន្តថា តាមបទពិសោធលោកផ្ទាល់ ការសិក្សានៅបរទេសបានផ្តល់អត្ថប្រយោជន៍ច្រើនដែលធ្វើឱ្យជីវិតមានការផ្លាស់ប្តូរ។
លោកថា៖ «វាជាដំណឹងដ៏រីករាយ ដែលឃើញថា និស្សិត-កម្ពុជាផ្តល់តម្លៃយ៉ាងខ្លាំងដល់ការអប់រំនៅថ្នាក់ឧត្តមសិក្សារបស់អាមេរិកថា ជាមធ្យោបាយដ៏មានសារៈសំខាន់មួយក្នុងការទទួលបាននូវជំនាញថ្មីៗ ចំណេះដឹង និងបទពិសោធសម្រាប់ជំរុញបន្ថែមនូវការអភិវឌ្ឍក្នុងព្រះរាជាណាចក្រកម្ពុជា»។
បន្ថែមពីនេះ លោកថា ស្ថានទូតអាមេរិកនៅកម្ពុជាបានជំរុញឱកាសសិក្សានៅសហរដ្ឋអាមេរិកសម្រាប់ប្រជាជនកម្ពុជាតាមរយៈមជ្ឈមណ្ឌលអប់រំអាមេរិក EducationUSA និង American Spaces មានទីតាំងនៅខេត្តសៀមរាប បាត់ដំបង កំពង់ចាម និងរាជធានីភ្នំពេញ។
លោកបានបញ្ជាក់ថា៖ «យើងក៏មានផងដែរនូវមជ្ឈមណ្ឌលឯកសារឌីជីថលថ្មីមួយទៀតដែលមានឈ្មោះជាអង់គ្លេសថា AmCam Exchange ដែលមានទីតាំងនៅក្នុងផ្សារទំនើប Exchange Square ភ្នំពេញ»។
លោកស្រី ងិន លីដា បច្ចុប្បន្នជានាយិកានាយកដ្ឋានផ្សារអេឡិចត្រូនិកដែលទទួលបានអាហារូបករណ៍ទៅសិក្សានៅអាមេរិកឆ្នាំ ២០១៧-២០២១ បានប្រាប់ ភ្នំពេញ ប៉ុស្តិ៍ថា ការសិក្សានៅទីនោះ ពិតជាបានផ្តល់ចំណេះ និងបទពិសោធដ៏ច្រើន ដើម្បីអភិវឌ្ឍខ្លួន។ ក្នុងរយៈពេលសិក្សា ៤ ឆ្នាំនៅអាមេរិកលោកស្រីទទួលបានសញ្ញាបត្រចំនួន ២ គឺទី ១ អនុបណ្ឌិតសិល្បៈ (ទំនាក់ទំនង និងការសិក្សា-អភិវឌ្ឍន៍) និងទី ២ អនុបណ្ឌិតរដ្ឋបាលសាធារណៈ។ លោកស្រីបានឱ្យដឹងថា អាហារូបករណ៍ទី ១ បានមកពីមូលនិធិសង្គមបើកចំហ និងអាហារូបករណ៍ទី ២ បានពីសាកលវិទ្យាល័យ Ohio។
បើតាមលោកស្រី ងិន លីដា មូលហេតុដែលជំរុញចិត្តឱ្យបន្តការសិក្សានៅសហរដ្ឋអាមេរិក ដោយសារលោកស្រីមានបទពិសោធដ៏អស្ចារ្យមិនអាចបំភ្លេចបានលើកដំបូងនៅអាមេរិកក្នុងឆ្នាំ ២០១៦ តាមរយៈគំនិតផ្តួចផ្តើមអ្នកដឹកនាំអាស៊ីអាគ្នេយ៍វ័យក្មេង Young Southeast Asian Leaders Initiative (YSEALI) ដែលបង្កើតឡើងដោយលោក បារ៉ាក់ អូបាម៉ា អតីតប្រធានាធិបតីសហរដ្ឋអាមេរិក។
លោកស្រីបានបន្តថា នៅសហរដ្ឋអាមេរិកក្រៅពីជាប្រទេសជឿនលឿនបំផុតមួយដែលសម្បូរបែបដោយវប្បធម៌ សេរីភាព កម្មវិធីសិក្សាអប់រំ ដែលមានលក្ខណសម្បត្តិគ្រប់គ្រាន់ គំនិត និងទេសភាពដ៏អស្ចារ្យហើយការសិក្សានៅទីនោះទទួលបានចំណេះដឹងច្រើនទាំងរៀនក្នុងថ្នាក់ និងក្រៅថ្នាក់។
លោកស្រីថា៖ «ខ្ញុំបានរៀនអំពីវប្បធម៌ ប្រពៃណី នយោបាយ បរិយាកាសការងារ ទំនាក់ទំនងខ្ញុំបានឃើញទិដ្ឋភាពដ៏ស្រស់ស្អាត និងអស្ចារ្យជាច្រើននៅសហរដ្ឋអាមេរិក ខ្ញុំមានបទពិសោធបច្ចេកវិទ្យាជឿនលឿនខ្លាំង ហើយបានជួបមនុស្សអស្ចារ្យជាច្រើននៅទីនោះ»។
ក្នុងនាមជានិស្សិតកម្ពុជាដែលទទួលបានអាហារូបករណ៍នៅប្រទេសជឿនលឿនមួយនេះ លោកស្រីថា នឹងយកចំណេះដឹង និងបទពិសោធមកអភិវឌ្ឍនៅកម្ពុជា ដូចជាការច្នៃប្រឌិត ការអប់រំ បទពិសោធការងារ ការទំនាក់ទំនង ជាពិសេសគំនិតថ្មីនៃភាពជាសហគ្រិន។
លោកស្រីបញ្ជាក់ថា៖ «ភាពជាសហគ្រិនបានផ្លាស់ប្តូរទាំងស្រុងនូវគោលដៅ និងទិសដៅអនាគតរបស់ខ្ញុំ ហើយវាជាកន្លែងដែលខ្ញុំនឹងបន្តទៅមុខក្នុងផ្លូវនេះ ព្រោះខ្ញុំជឿថា ក្រៅពីការអប់រំ ភាពជាសហគ្រិនវានឹងក្លាយជាគន្លឹះក្នុងការលើកកម្ពស់សេដ្ឋកិច្ច និងការរស់នៅរបស់មនុស្សប្រកបដោយនិរន្តរភាពនៅកម្ពុជា»។
របាយការណ៍ Open Doors បានឱ្យដឹងដែរថា សហរដ្ឋ-អាមេរិក គឺជាគោលដៅទី ១ ក្នុងពិភពលោក សម្រាប់និស្សិតអន្តរជាតិដោយមាននិស្សិតចំនួន ៩១៤ ០៩៥ នាក់សិក្សានៅក្នុងឆ្នាំ ២០២០-២០២១។
របាយការណ៍បន្តថា «ការរាតត្បាតនៃជំងឺកូវីដ ១៩ ជាចំណែកមួយធ្វើឱ្យចំនួននិស្សិតមានការធ្លាក់ចុះចំនួន ១៥% នៅ ២០១៩-២០២០ តែចំនួននិស្សិតកម្ពុជាដែលសិក្សានៅក្នុងសហរដ្ឋអាមេរិកបែរជាមានកំណើនទៅវិញ»៕