.jpg)
លោក អ៊ិត សំហេង ក្នុងជំនួបជាមួយលោក Magnus Saemundsson ពីថ្ងៃទី ២៣ វិច្ឆិកា។ រូប ក្រសួងការងារ
ភ្នំពេញៈ រដ្ឋាភិបាលកម្ពុជា និងស៊ុយអែត រួមទាំងអង្គការក្រៅរដ្ឋាភិបាលមួយចំនួនបានសហការគ្នាបង្កើតគម្រោងថ្មីមួយឈ្មោះថា “ទីផ្សារការងារសម្រាប់ជនគ្រប់រូបនៅកម្ពុជា ការគាំទ្រដល់អ្នកស្វែងរកការងារមានពិការភាព” ដែលគម្រោងនេះមានរយៈពេលជាង ២ ឆ្នាំ ដើម្បីលើកកម្ពស់ទីផ្សារការងាសម្រាប់ជនគ្រប់រូប។
ការប្រកាសពីគម្រោងថ្មីនេះបានធ្វើឡើងនៅថ្ងៃទី ២៣ វិច្ឆិកា ក្នុងឱកាសដែលលោក Magnus Saemundsson លេខាទី ១ ស្ថានទូតស៊ុយអែតប្រចាំកម្ពុជា ចូលជួបពិភាក្សាការងារជាមួយលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅទីស្តីការក្រសួងការងារ។
តាមទំព័រហ្វេសប៊ុកក្រសួងការងារឱ្យដឹងថា គម្រោងនេះ ចាប់ដំណើរការពីថ្ងៃទី ១ កញ្ញា ឆ្នាំ ២០២១ ដល់ថ្ងៃទី ៣១ ធ្នូ ឆ្នាំ ២០២៣ ក្នុងគោលបំណង ដើម្បីលើកកម្ពស់ទីផ្សារការងាសម្រាប់ជនគ្រប់រូប ដោយគាំទ្រដល់អ្នកស្វែងរកការងារធ្វើដែលមានពិការភាពដោយផ្តោតជាពិសេសលើយុវជន និងស្ត្រី។
នាឱកាសនោះលោក អ៊ិត សំហេង លើកឡើងថា រដ្ឋាភិបាលស៊ុយអែតតែងតែផ្តល់ការជួយឧបត្ថម្ភគាំទ្រ និងការបណ្តុះបណ្តាលជំនាញបច្ចេកទេសពាក់ព័ន្ធទៅនឹងការផលិតនូវរបាយការណ៍អង្កេតអំពីកង្វះជំនាញ និងគម្លាតជំនាញក្នុងទីផ្សារការងារនៅកម្ពុជា។ ក្នុងនោះប្រទេសដៃគូអភិវឌ្ឍន៍មួយចំនួនក៏តែងជួយគាំទ្រដល់ការធ្វើរបាយការណ៍ព្យាករអំពីឱកាសការងារក្នុងទីផ្សារការងារនៅកម្ពុជា ដែលការងារទាំងនេះបានចូលរួមដល់សកម្មភាពរបស់មន្ត្រីនៃទីភ្នាក់ងារជាតិមុខរបរ និងការងារនៃក្រសួងការងារក្នុងការប្រើប្រាស់ស្របទៅនឹងភាពទំនើបនៃប្រព័ន្ធបច្ចេកវិទ្យាឌីជីថលនាពេលបច្ចុប្បន្ន។
លោកបញ្ជាក់ថា៖ «ការរៀបចំដំណើរការស្វែងរកការងារបានរៀបចំតាមប្រព័ន្ធបច្ចេកវិទ្យា ដោយកាត់បន្ថយនូវការប្រមូលផ្តុំដោយអនុវត្តតាមវិធានការរបស់ក្រសួងសុខាភិបាល ហើយសេវារបស់យើងនៅតែមានដំណើរការ អ្នកដែលបាត់បង់ការងារអាចសម្ភាសរកការងារថ្មី។ ទីភ្នាក់ងារជាតិមុខរបរ និងការងារ (NEA) អាចចាត់ទុកថា ជាសេវាថ្មីតែទទួលបានជោគជ័យក្នុងនោះដែរក៏មានការផ្តល់ការឧបត្ថម្ភគាំទ្រជាដរាបរៀងមកពីរដ្ឋាភិបាល ស៊ុយអែត»។
ទាក់ទងនឹងការងារជនពិការលោក អ៊ិត សំហេង បានលើកឡើងថា កម្ពុជាក៏មានច្បាប់ការពារជនពិការ ដើម្បីគាំពារដល់ពួកគាត់ ប៉ុន្តែបច្ចុប្បន្ននៅតែមានបញ្ហាជាច្រើនទៀតដែលទាមទារឱ្យគ្រប់គ្នាចូលរួមធ្វើការដោះស្រាយ ក្នុងការធ្វើសមាហរណកម្មជនពិការទៅក្នុងសហគមន៍ គឺការផ្តល់ឱកាសការងារជូនដល់ពួកគាត់ឱ្យបានកាន់តែប្រសើរ។
លោក ងុយ រិទ្ធ អនុរដ្ឋលេខាធិការក្រសួងការងារបានលើកឡើងថា ជាមួយនឹងគម្រោងថ្មីនេះ ស៊ុយអែតនឹងបន្តខិតខំបន្ថែមទៀតក្នុងការជួយគាំទ្រដល់ក្រសួងការងារ ដើម្បីអាចបង្កើតមជ្ឈមណ្ឌលការងារថែមទៀតឱ្យបានគ្រប់រាជធានី ខេត្ត ពោលគឺយ៉ាងតិចមានមជ្ឈមណ្ឌលការងារ ១ ក្នុង ១ រាជធានី ខេត្ត ខណៈបច្ចុបន្នកម្ពុជា មាន ១៣ មជ្ឈមណ្ឌលការងារ និងមជ្ឈមណ្ឌលការងារចល័តចំនួន ៣។
គម្រោងទាំងនោះពិតជាបានរួមចំណែកយ៉ាងធំធេងជាមួយរាជរដ្ឋាភិបាលក្នុងការផ្តល់ភាពងាយស្រួល និងពង្រីកនូវវិសាលភាពទៅដល់ប្រជាពលរដ្ឋក្នុងការស្វែងរកឱកាសការងារ និងផ្តល់កម្លាំងពលកម្ម ដើម្បីបំពេញនូវតម្រូវការដល់ស្ថាប័ន ក្រុមហ៊ុនរោងចក្រ សហគ្រាសដែលកំពុងត្រូវការជាចាំបាច់។
លោកថា៖ «យើងក៏បានពិភាក្សាលើគម្រោងទីផ្សារការងារប្រកបដោយបរិយាប័ន្ននៅកម្ពុជា ដោយផ្តោតជាពិសេសទៅលើការផ្តល់ឱកាសការងារសម្រាប់ជនពិការ ដែលយើងឃើញថា ច្បាប់យើងបានផ្តល់ឱកាសឱ្យជនពិការអាចទទួលបានការងារ ទាំងស្ថាប័នរដ្ឋ និងស្ថាប័នឯកជន»។
លោកស្រី ម៉ាក់ មូនីកា នាយិកាប្រតិបត្តិអង្គការជនពិការកម្ពុជាបានសាទរចំពោះកិច្ចខិតខំប្រឹងប្រែងក្នុងការគាំទ្រដល់ការទទួលបានឱកាសការងារសម្រាប់ជនពិការនេះ។ លោកស្រីបញ្ជាក់ថា៖ «បើសិនជាជនពិការមានជំនាញវិជ្ជាជីវៈទាំងអស់ហ្នឹងហើយ ខ្ញុំគិតថា អ្វីដែលយើងត្រូវគិតដល់ ជាពិសេសវិស័យឯកជន ស្ថាប័នពាក់ព័ន្ធត្រូវតែគិតមួយមុខទៀតក្នុងការលើកទឹកចិត្តដល់ពួកគាត់ក្នុងការចូលធ្វើការ។
ពាក្យថា លើកទឹកចិត្តនេះមិនមែនបានន័យថា ជនពិការមិនចេះអីឱ្យយកគាត់ចូលធ្វើការនោះទេ គឺយើងត្រូវថ្លឹងថ្លែងក្នុងការផ្តល់ឱកាសដល់ជនពិការ បើគាត់ មានសមត្ថភាពគ្រប់គ្រាន់»។ តាមច្បាប់ការជ្រើសរើសជនពិការក្នុងការចូលបម្រើការងារក្នុងសង្គម ដោយរដ្ឋាភិបាលត្រូវបានកំណត់ចំនួន ២ ភាគរយ ចំណែកនៅក្នុងសហគ្រាសឯកជនគឺ ១ ភាគរយ។
បើតាមលោកស្រី ម៉ាក់ មូនីកា ការជ្រើសរើសជនពិការចូលបម្រើកិច្ចការងារក្នុងស្ថាប័នរដ្ឋ មានលក្ខណៈល្អប្រសើរ ដោយស្ថាប័នរដ្ឋមួយចំនួនបានផ្តល់ឱកាសការងារដល់ជនពិការច្រើនជាង ២ ភាគរយទៅទៀត៕
