.jpg)
មន្ត្រីកម្ពុជាជួបភ្នាក់ងារ NEDA ពិភាក្សាគម្រោងធ្វើផ្លូវ ៦ ខ្សែតាមខេត្ត ៤ បណ្ដាព្រំដែន។ រូបថត MPWT
ភ្នំពេញៈ ទីភ្នាក់ងារសហប្រតិបត្តិការដើម្បីអភិវឌ្ឍន៍សេដ្ឋកិច្ចប្រទេសជិតខាងនៃប្រទេសថៃឡង់ដ៍ (NEDA) បន្តសិក្សាផ្នែកបច្ចេកទេសលើគម្រោងផ្លូវចំនួន ៦ ខ្សែតភ្ជាប់ក្នុងភូមិសាស្ត្រខេត្តចំនួន ៤ តាមបណ្តាព្រំដែន បន្ទាប់ពីគម្រោងផ្លូវ ១ ខ្សែ ក្នុងចំណោមផ្លូវទាំងនោះត្រូវបានដាក់ស្នើទៅក្រសួងសេដ្ឋកិច្ច និងហិរញ្ញវត្ថុ ដើម្បីសម្រេច មុននឹងស្នើសុំកម្ចីឥណទានពីប្រទេសថៃ។
កាលពីថ្ងៃទី ២២ ខែវិច្ឆិកា លោក តូច ចាន់កុសល រដ្ឋលេខាធិការប្រចាំការក្រសួងសាធារណការ និងដឹកជញ្ជូនបានជួបពិភាក្សាការងារតាមរយៈវីដេអូឡាយជាមួយលោក Col Saranyu Viriyavejakul D. Sc អនុប្រធានទីភ្នាក់ងារ NEDA និងក្រុមការងារ ដើម្បីពិនិត្យវឌ្ឍនភាពការងារស្ដីពីការសុំជំនួយបច្ចេកទេសក្នុងការសិក្សាគម្រោងផ្លូវចំនួន ៦ ខ្សែសម្រាប់ស្នើសុំកម្ចីឥណទានពីរដ្ឋាភិបាលថៃ។
លោក តូច ចាន់កុសល បានប្រាប់ ភ្នំពេញ ប៉ុស្តិ៍ នៅថ្ងៃ ២៣ វិច្ឆិកាថា កន្លងទៅ ក្រសួងសាធារណការ និងដឹកជញ្ចូនបានស្នើទីភ្នាក់ងារ NEDA ឱ្យជួយសិក្សាគម្រោងផ្លូវចំនួន ៦ ខ្សែ ដែលតភ្ជាប់ភូមិសាស្ត្រទឹកដីខេត្តសៀមរាប ខេត្តឧត្តរមានជ័យ ខេត្តបន្ទាយមានជ័យ និងខេត្តបាត់ដំបង ដើម្បីតភ្ជាប់ការដឹកជញ្ជូន និងជំរុញកំណើនសេដ្ឋកិច្ចនៃប្រទេសទាំង ២។ ជំនួបនេះ គឺក្រសួងសាធារណការបន្តស្នើឱ្យស្ថាប័ននេះ បន្តការសិក្សាផ្នែកបច្ចេកទេសលើផ្លូវទាំង ៦ ខ្សែនេះបន្តទៀត ដើម្បីបន្តការដាក់ជូនទៅក្រសួងសេដ្ឋកិច្ច និងហិរញ្ញវត្ថុ រួមនឹងរដ្ឋាភិបាល ធ្វើការសម្រេចក្នុងការដាក់សំណើស្នើសុំកម្ចីឥណទានពីប្រទេសថៃ។
ជាមួយនឹងការសិក្សាបន្តលើផ្លូវទាំង ៦ ខ្សែនេះ លោក តូច ចាន់កុសល បានអះអាងថា ចំពោះផ្លូវលេខ ៧៦ ដែលជាផ្លូវ ១ ខ្សែក្នុងចំណោមផ្លូវទាំង ៦ ខ្សែក្នុងភូមិសាស្ត្រខេត្តជាប់ព្រំដែន គឺបានដាក់ជូនក្រសួងសេដ្ឋកិច្ច និងហិរញ្ញវត្ថុ ដើម្បីធ្វើការពិនិត្យរួចហើយ ដោយរង់ចាំការសិក្សាបន្តលើគម្រោងកម្ចីឥណទានពីប្រទេសថៃថានឹងត្រូវធ្វើកម្ចីទាំងស្រុងឬយ៉ាងណា?
លោកបានបញ្ជាក់ថា៖ «ផ្លូវ ៦៧ គឺយើងបានសិក្សារួច និងដាក់ជូនក្រសួងសេដ្ឋកិច្ចហើយ ចំណែកផ្លូវ ៦៨ និងផ្លូវបន្តបន្ទាប់ទៀត គឺ NEDA នឹងបន្តសិក្សាលើផ្នែកបច្ចេកទេសក្រោយៗទៀត។ ចាំសិក្សាហើយ ចាំមើលលទ្ធផលសរុប ហើយនឹងមានការឆ្លងពីស្ថាប័នធំទៀត»។
បើតាមលោក តូច ចាន់កុសល បានឱ្យដឹងថា ផ្លូវទាំង ៦ ខ្សែនេះ គឺជាផ្លូវចាស់ដែលមានស្រាប់ ដោយក្រសួងគ្រោងនឹងអភិវឌ្ឍផ្លូវទាំងនោះឱ្យមានគុណភាពឡើងវិញ ហើយផ្លូវ BST មួយចំនួននឹងធ្វើការអភិវឌ្ឍទៅជាផ្លូវ AC បន្ទាប់ពីផ្លូវទាំងនោះបានខូចខាត ដែលប៉ះពាល់ដល់ការធ្វើដំណើរ។
លោកបានបញ្ជាក់ថា៖ «យើងមិនទាន់មានរបាយការណ៍ច្បាស់លាស់ពីគម្រោងចំណាយអីទេ ព្រោះនេះ យើងគ្រាន់តែគ្រោងឱ្យ NEDA នេះ មកសិក្សាសិនទេ។ យើងនឹងបន្តការសិក្សាបន្តបន្ទាប់គ្នា ឥឡូវនេះ NEDA ទើបស្រាវជ្រាវចប់បាន ១ ផ្លូវលេខ ៦៧ មួយហ្នឹង។ យើងជួបគ្នានេះ គឺដើម្បីពិភាក្សាជាបន្តទៅទៀត ដើម្បីឱ្យគាត់សិក្សាលើផ្នែកបច្ចេកទេសបន្តបន្ទាប់មកទៀត»។
លោក គង់ រតនៈ ប្រធានវិទ្យាស្ថានជាតិសុវត្ថិភាពចរាចរណ៍ផ្លូវគោកបានលើកឡើងថា គម្រោងអភិវឌ្ឍន៍ផ្លូវ ៦ ខ្សែនោះ គឺជារឿងល្អ ដែលក្រសួងបង្កើនការសិក្សាទៅលើប្រព័ន្ធផ្លូវទាំងអស់នោះមុននឹងធ្វើការអភិវឌ្ឍក្នុងពេលខាងមុខ។ បើក្នុងករណីដែលក្រសួងធ្វើការអភិវឌ្ឍផ្លូវទាំងនោះ មកជាផ្លូវប្រភេទ AC ដើម្បីស្របតាមស្តង់ដា គឺត្រូវការចំណាយថវិកាអស់ច្រើន ដែលទាមទារឱ្យមានការសិក្សាស៊ីជម្រៅបន្ថែមទៀត ជាពិសេសគឺផលចំណេញនៃទំហំសេដ្ឋកិច្ច។
លោកបានបញ្ជាក់ថា៖ «ខ្ញុំ ជឿជាក់ថាយើងសាងសង់ផ្លូវហ្នឹង ច្បាស់ជាមានផលប្រយោជន៍ផ្នែកសេដ្ឋកិច្ច និងផ្នែកខាងដឹកជញ្ចូនជាច្រើន។ ប៉ុន្តែខ្ញុំចង់ចាប់អារម្មណ៍ថា ប្រសិនបើការសាងសង់ផ្លូវហ្នឹងហើយ តើកម្រិតនៃផលិតផលកសិផលរបស់ប្រជាពលរដ្ឋខ្មែរនៅតាមព្រំដែននេះ វាបានបង្កើនដែរអត់? បើយើងមើលមួយជ្រុង គឺជារឿងល្អ សម្រាប់វិស័យសេដ្ឋកិច្ច គឺមាននាំចូល និងការនាំចេញ ហើយបើផ្លូវយើងល្អក៏ជួយសម្រួលក្នុងការដឹកទំនិញដែរ»។
លោក គង់ រតនៈ ចង់ឱ្យសិក្សាគម្រោងអភិវឌ្ឍន៍ផ្លូវទាំង ៦ ខ្សែនោះ ដោយផ្តោតលើគុណភាពជាចម្បង ដើម្បីបញ្ចៀសលើការឆាប់ខូចខាតដោយសារតែកន្លងមក ការដែលផ្លូវទាំងនោះ ឆាប់ខូចខាត ក៏ព្រោះតែការដឹកលើសទម្ងន់ ខណៈលោកជំរុញឱ្យមានការសិក្សាលម្អិតបន្ថែមទៀត លើគម្រោងអភិវឌ្ឍន៍ផ្លូវទាំងនោះ។
លោកថា៖ «បើការអភិវឌ្ឍផ្លូវនោះ យើងមានការដោះដូរពីប្រទេសជិតខាងយើងហ្នឹងមានផលិតកម្មខុសគ្នាតិចតួច ខ្ញុំគិតថា គឺជាការវិនិយោគដ៏ល្អ តែប្រសិនបើយើងមានផលិតកម្មតិចតួច ហើយយើងធ្វើការចំណាយទៅច្រើន (លើផ្លូវ) ហើយធ្វើឱ្យបាត់លំនឹងសេដ្ឋកិច្ច ដែលការនាំចេញមិនមាន មានតែការនាំចូលលើសលប់ពេកនឹងធ្វើឱ្យប៉ះពាល់ដល់ផលិតភាពរបស់កសិករ»៕
