សៀមរាបៈ អភិបាលស្រុកបន្ទាយស្រីនៃខេត្តសៀមរាប លោក ឃឹម ហ្វីណង់ ស្នើដល់ក្រុមហ៊ុនដែលមានបំណងវិនិយោគ ផ្នែកអចលនទ្រព្យពុះដីឡូត៍ ឬសាងសង់សំណង់ផ្សេងៗនៅស្រុកនេះ ត្រូវសុំច្បាប់ឱ្យបានត្រឹមត្រូវ ព្រោះតំបន់នោះភាគច្រើនស្ថិតក្នុងគម្របព្រៃឈើ និងជាតំបន់អភិរក្ស។
ការស្នើនេះ បន្ទាប់ពីលោកសង្កេតឃើញមានក្រុមហ៊ុនវិនិយោគទាំងតូចទាំងធំ បានសម្រុកទៅវិនិយោគទិញ-លក់ដីនៅស្រុកបន្ទាយស្រីយ៉ាងគគ្រឹកគគ្រេង ខណៈក្រុមហ៊ុនមួយចំនួនតូចមានច្បាប់អនុវត្តត្រឹមត្រូវ ប៉ុន្តែមួយចំនួនធំមិនទាន់មានច្បាប់អនុញ្ញាត។ ការទាក់ទាញវិនិយោគិននេះ បន្ទាប់ពីស្រុកបន្ទាយស្រី ប៉ុន្មានឆ្នាំចុងក្រោយ បង្ហាញសក្តានុពលទេសចរណ៍ទាំងប្រាសាទ តំបន់ធម្មជាតិ ភ្នំ បឹង និងទេសភាព ស្រស់បៃតង ដែលជាទីគាប់ចិត្តដល់ភ្ញៀវទេសចរជាតិ និងអន្តរជាតិ។
លោក ឃឹម ហ្វីណង់ ថ្លែងថា លោករីករាយនៅពេលឃើញមានក្រុមហ៊ុនចាប់អារម្មណ៍មកវិនិយោគនៅស្រុកដែលជាដែនសមត្ថកិច្ចរបស់ខ្លួន។ ទន្ទឹមនឹងការរីករាយ លោកក៏សម្តែងការព្រួយបារម្ភចំពោះប្រជាពលរដ្ឋក្នុងមូលដ្ឋាន ឬប្រជាពលរដ្ឋមកពីខេត្តផ្សេងចាញ់បោកគម្រោងពុះដីឡូត៍មួយចំនួនដែលមិនទាន់មានច្បាប់អនុញ្ញាតផងដែរ។
លោកថ្លែងថា៖ «អ្នកពុះដីឡូត៍លក់អចលនទ្រព្យ ឬក៏អ្នកសាងសង់ផ្ទះលក់ បើតំបន់នោះស្ងាត់ច្រៀបក៏មិនដឹងធ្វើលក់ឱ្យអ្នកណាដែរ។ ផ្ទុយមកវិញ បើសិនជាតំបន់នោះជាតំបន់មានសក្តានុពលច្រើន មានគេចាប់អារម្មណ៍ច្រើន ដូច្នេះបង្កើតនូវកាលានុវត្តភាព»។
បើតាមលោកអភិបាលស្រុក ទោះបីក្នុងកាលៈទេសៈកូវីដ ១៩ ក៏ដោយ ក៏ប្រតិបត្តិការនៃការទិញលក់របស់ប្រជាពលរដ្ឋ ជាពិសេសអ្នកចំណូលថ្មី អ្នកវិនិយោគទិញដីក្នុងទំហំធំមានចំនួនកើនឡើង ដែលបង្ហាញពីសញ្ញាណវិជ្ជមាន។ លោកបញ្ជាក់ថា៖ «មកដល់ពេលនេះមានក្រុមហ៊ុនអ្នកវិនិយោគច្រើន ប៉ុន្តែមានក្រុមហ៊ុនមួយចំនួនធំមិនទាន់មានច្បាប់អនុញ្ញាតត្រឹមត្រូវនៅឡើយទេ។ ខ្ញុំបានពិនិត្យលើករណីនេះ មានក្រុមហ៊ុនច្រើនចាប់អារម្មណ៍លើការងារនេះ ហើយគាត់ព្យាយាមចង់ទៅមុន»។
លោកបន្ថែមថា ក្នុងនាមជាអាជ្ញាធរមូលដ្ឋានដាច់ខាតត្រូវតែការពារប្រជាពលរដ្ឋកុំឱ្យចាញ់បោកជនឆ្លៀតឱកាស។
លោកបញ្ជាក់ដែរថា ក្នុងករណីនេះលោកមិននិយាយដល់ក្រុមហ៊ុនដែលចុះបញ្ជីត្រឹមត្រូវទេ តែក៏មានអ្នកខូចដែរ។ ដូច្នេះក្រុមហ៊ុនមកដល់មិនមានច្បាប់អនុញ្ញាតត្រឹមត្រូវទេ ហើយក្រុមហ៊ុនធ្វើក្នុងគោលដៅប្រមូលអត្ថប្រយោជន៍ពីគម្រោងរបស់ខ្លួន ហើយក្រោយពីក្រុមហ៊ុនទៅបាត់ គឺបន្សល់ទុកបញ្ហា។ បើក្រុមហ៊ុនធ្វើបែបនេះអ្នកដែលត្រូវបន្តដោះស្រាយបញ្ហា គឺអាជ្ញាធរមូលដ្ឋាន។ ដូច្នេះដើម្បីចៀសវាងពីការឆបោក ការកេងប្រវ័ញ្ចក្នុងហេតុផលណាមួយ គឺរដ្ឋបាលស្រុកហាមក្រុមហ៊ុនណា មិនទាន់មានច្បាប់អនុញ្ញាត បើកលក់គម្រោងរបស់ខ្លួន។
បើតាមអភិបាលស្រុកវ័យក្មេងរូបនេះ បច្ចុប្បន្នមានមិនតិចជាង ២០ ក្រុមហ៊ុនទេ ដែលកំពុងព្យាយាមធ្វើក្រោមរូបភាពណាមួយ ពោលមិនទាន់មានច្បាប់អនុញ្ញាត កំពុងស្វែងរកលក្ខខណ្ឌផ្នែកច្បាប់ដើម្បីបំពេញ។
លោកថ្លែងថា៖ «កន្លងមកយើងជួបបញ្ហាប្រឈម ២ ឬ ៣ ដែលត្រូវដោះស្រាយ ដោយសារតែស្រុកបន្ទាយស្រីស្ថិតនៅជាស្រុកដែលមានដីចំនួនធំ ស្ថិតនៅក្នុងគម្របព្រៃឈើនៅឡើយ»។
ចំណុចនេះលោកបញ្ជាក់ថា វាមិនមែនជាដីព្រៃឈើនោះទេ គ្រាន់តែប្រជាពលរដ្ឋបានកាន់កាប់អាស្រ័យផលជាង ២០ ឆ្នាំមកហើយ ដោយសារអាជ្ញាធរមិនទាន់កាត់វាចេញពីផែនទីគម្របព្រៃឈើ ឆ្នាំ ២០០២ នៅឡើយ។ ដូច្នេះជាផ្លូវការ ដីនេះនៅជាដីរបស់រដ្ឋ ហើយបើសិនជាគម្រោងក្រុមហ៊ុនវិនិយោគណាគាត់ទៅទិញ បើទោះជាទិញពីប្រជាពលរដ្ឋក៏ដោយ និងមានឯកសារកាន់កាប់ដល់ភូមិ ឃុំ ឬស្រុក ឬក៏បង់ពន្ធហើយក៏ដោយ ប៉ុន្តែបើសិនជាដីនោះ នៅជាដីគម្របព្រៃឈើនៅឡើយ គឺអាជ្ញាធរដាច់ខាតមិនឱ្យគាត់ធ្វើការអភិវឌ្ឍឡើយ។
លោកលើកជាឧទាហរណ៍ ការពុះដីឡូត៍ ការធ្វើជាលំនៅឋាន ឬក៏ទម្រង់ណាមួយសុទ្ធតែជាបញ្ហាដែលត្រូវដោះស្រាយមុនការវិនិយោគ ដោយសារនីតិវិធីបំប្លែងដីរដ្ឋ មានដំណាក់កាលច្រើន។
លោកថ្លែងថា៖ «ជារួមបើសិនជាដីនោះស្ថិតនៅជាគម្របព្រៃឈើនៅឡើយ គាត់ត្រូវតែស្នើសុំឱ្យមានការកាត់ឆ្វៀល ហើយរាជរដ្ឋាភិបាលត្រូវការពិនិត្យមើលដើម្បីស្នើសុំធ្វើអនុប្រយោគលើដីនេះ។ ពីព្រោះដីគម្របព្រៃឈើ គឺជាដីសាធារណៈរបស់រដ្ឋ»។
លោកបញ្ជាក់ថា ក្នុងករណីនេះ បើសិនជាមានការកាន់កាប់យូរហើយ រាជរដ្ឋាភិបាលមានសិទ្ធិធ្វើប្រទានកម្មតាមរយៈការចេញបណ្ណកម្មសិទ្ធិប្លង់រឹងជូនប្រជាពលរដ្ឋ ឬក៏ជាក្រុមហ៊ុន ឬក៏ទម្រង់ណាមួយទៅតាមជាក់ស្តែង។
ដោយសារហេតុផលនេះមានក្រុមហ៊ុនមួយចំនួននៅជាប់គាំង ដោយសារមិនទាន់ទទួលបានកម្មសិទ្ធិត្រឹមត្រូវ។ បើសិនជាមិនមានកម្មសិទ្ធិត្រឹមត្រូវទេ មិនទាន់អាចអភិវឌ្ឍដីបានទេ។ ដើម្បីមានលទ្ធភាពក្នុងការអភិវឌ្ឍអចលនវត្ថុ ឬគម្រោងដី គាត់ត្រូវតែមានបណ្ណកម្មសិទ្ធិប្លង់រឹង ហើយត្រូវតែដាក់ពាក្យស្នើសុំអាជ្ញាធរមានថ្នាក់ស្រុក ទំហំតូច ថ្នាក់ខេត្តទំហំកណ្តាល និងត្រូវទៅដល់ក្រសួងរៀបចំដែនដី នគរូបនីយកម្ម និងសំណង់។
ទោះយ៉ាងណា លោក ឃឹម ហ្វីណង់ ថ្លែងថា ក្នុងស្រុកបន្ទាយស្រីក៏មានក្រុមហ៊ុនខ្លះទទួលបានច្បាប់អភិវឌ្ឍន៍ដីពីក្រសួងរៀបចំដែនដី នគរូបនីយកម្ម និងសំណង់ រួចហើយ ដូចជាក្រុមហ៊ុន Angkor Landmark និងក្រុមហ៊ុនដី ឡេង ណាវ៉ាត់ត្រា ជាដើម ដែលសុទ្ធតែទទួលបាននូវការកាត់ឆ្វៀលចេញពីរដ្ឋាភិបាល ដើម្បីអាចបើកច្រកឱ្យគាត់ឈានដល់ការស្នើសុំអភិវឌ្ឍដីក្នុងស្រុកបន្ទាយស្រី។
លោកថ្លែងថា៖ «ព្រោះយើងធ្វើ ដើម្បីការពារអតិថិជនប្រជាពលរដ្ឋដែលទិញគម្រោង និងដើម្បីធានាថា អ្នកវិនិយោគដែលចូលមកស្រុកបន្ទាយស្រីគឺជាអ្នកវិនិយោគដែលល្អមានឆន្ទៈពិតប្រាកដ ហើយការធ្វើបែបនេះ ដើម្បីការពារបញ្ហាប្រឈម ប្តឹងតវ៉ា ជម្លោះផ្នែកដីធ្លីទៅថ្ងៃខាងមុខ»។
លោកបន្តថា៖ «ភាគច្រើនជាតំបន់អភិរក្ស យើងចង់ថែរក្សាអត្តសញ្ញាណ យើងមានភ្នំ ស្ទឹង បឹង មានតំបន់ពណ៌បៃតង ដែលគេតែងតែល្បីមកថតរូប ចុះបើយើងនាំគ្នាអភិវឌ្ឍខូចអត្តសញ្ញាណទាំងនេះអស់ យើងមិនចង់ថាឱ្យ ១០ ឆ្នាំក្រោយ ២០ ឆ្នាំក្រោយ ទន្ទឹមនឹងបន្ទាយស្រីល្បី តែយើងខូចនូវអ្វីដែលជាចំណុចពិសេសរបស់បន្ទាយស្រី នៅពេលនោះយើងនឹងដើរដល់ផ្លូវទាល់ហើយ»។
បើតាមប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប លោក ហ៊ី សាយ ពាក់ព័ន្ធការចុះបញ្ជីដីធ្លីនេះ រដ្ឋបាលខេត្តកំពុងមានវិធានការលើក្រុមហ៊ុនពុះដីឡូត៍គ្មានច្បាប់។ បច្ចុប្បន្នមានក្រុមហ៊ុនចំនួន ២ ប៉ុណ្ណោះដែលមានសិទ្ធិវិនិយោគនៅ ស្រុកបន្ទាយស្រីដោយស្របច្បាប់។
លោកថ្លែងថា៖ «ហើយអ្នកពុះឡូត៍មួយចំនួនបានកំពុងរត់មករក ច្បាប់ដែរហើយ។ ដីមួយចំនួនដែល ជាប់ពាក់ព័ន្ធគម្របព្រៃឈើ គឺបានធ្វើអនុប្រយោគរួចហើយ ដូចជាក្រុមហ៊ុន ឡេង ណាវ៉ាត់ត្រា និងក្រុមហ៊ុនអង្គរ Landmark»៕