ភ្នំពេញៈ ក្រោមឥទ្ធិពលនៃទ្រនង់សម្ពាធខ្ពស់ចិន និងរបបខ្យល់មូសុងឦសាន ប្រទេសកម្ពុជា នឹងមានភ្លៀងធ្លាក់ក្នុងកម្រិតពីតិចទៅច្រើន ដោយមានលាយឡំផ្គររន្ទះកើតឡើងជាបន្តទៀតរហូតដល់ដំណាច់ខែវិច្ឆិកានេះ នៅតាមបណ្ដាខេត្តជាប់តំបន់ជួរភ្នំក្រវាញ។ នេះបើយោងតាមការព្យាករអាកាសធាតុរបស់ក្រសួងធនធានទឹក និងឧតុនិយម ដែលបានចេញផ្សាយនៅព្រឹកថ្ងៃទី ២៣ ខែវិច្ឆិកា ឆ្នាំ ២០២១។
ជាមួយគ្នានេះក្រសួងធនធានទឹក និងឧតុនិយមក៏បានគូសបញ្ជាក់ផងដែរថា៖ «ចាប់ពីថ្ងៃទី ២៩ ដល់ថ្ងៃទី ៣០ ខែវិច្ឆិកា ឆ្នាំ ២០២១ ខ្យល់រដូវ ដែលបក់នាំមកនូវធាតុអាកាសត្រជាក់ពីតំបន់ស៊ីបេរីនឹងធ្វើឱ្យសីតុណ្ហភាពអប្បបរមានៅកម្ពុជាក្នុងតំបន់ជួរភ្នំដងរែក និងខ្ពង់រាប-ឦសានធ្លាក់ចុះជាបន្តបន្ទាប់មកនៅក្នុងរង្វង់ចន្លោះពី ២១ អង្សា ទៅ ១៩ អង្សា»។
យ៉ាងណាក៏ដោយប្រជាពលរដ្ឋនៅស្របតាមសណ្ដស្ទឹងព្រែកត្នោត ក្នុងភូមិសាស្ត្ររាជធានីភ្នំពេញបានត្អូញត្អែរថា ភ្លៀងកាលពីថ្ងៃទី ២២ ខែវិច្ឆិកានេះបានបង្កឱ្យមានការជន់លិចផ្ទះសំបែងរបស់ពួកគេសាជាថ្មី។ អ្នកស្រី ម៉ៅ ច្រឹម អាយុ ៥២ ឆ្នាំមានទីលំនៅភូមិខ្វិត សង្កាត់សាក់សំពៅ ខណ្ឌដង្កោបានប្រាប់ ភ្នំពេញ ប៉ុស្តិ៍ថា កាលពីជំនន់ទឹកភ្លៀងមកតាមស្ទឹងព្រែកត្នោតបានលិចផ្ទះរបស់គាត់មិនទាន់ស្រកអស់នៅឡើយទេ ស្រាប់តែនៅថ្ងៃទី ២២ ខែវិច្ឆិកា ឆ្នាំ ២០២១ មានភ្លៀងធ្លាក់ ១ មេធំបន្ថែមទៀត ធ្វើឱ្យទឹកលិចជិតផុតក្បាលជង្គង់ឡើងវិញ។
អ្នកស្រីថា៖ «មើលទៅបើភ្លៀងនៅតែបន្តធ្លាក់ដូចជាថ្ងៃម្សិលមិញនោះ ផ្ទះខ្ញុំនឹងត្រូវលិចទឹករហូតហើយ»។
លោក រិន សារី ជាជនរងគ្រោះដែរថ្លែងថា ធ្វើម៉េចបើវាជាគ្រោះធម្មជាតិ ដែលកើតពីការប្រែប្រួលអាកាសធាតុ៕
វីដេអូ៖