ភ្នំពេញៈ មន្ត្រីអគ្គនាយកដ្ឋានកិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) ទូទាំងប្រទេសទទួលបានការបណ្តុះបណ្តាលអំពីច្បាប់ស្តីពីការប្រកួតប្រជែង មុននឹងឈានដល់ការទទួលបាននីតិសម្បទាជានគរបាលយុត្តិធម៌ ខណៈសកម្មភាពចុះត្រួតពិនិត្យទំនិញខូចគុណភាព និងការប្រកបអាជីវកម្មមិនអនុលោមភាពនៅទូទាំងប្រទេសនៅតែបន្ត។
កាលពីថ្ងៃទី ២៣ វិច្ឆិកា ក.ប.ប. សហការជាមួយទីភ្នាក់ងារសហប្រតិបត្តិការអន្តរជាតិអាល្លឺម៉ង់ (GIZ)បានរៀបចំវគ្គបណ្តុះបណ្តាលលើកទី៣ ផ្សព្វផ្សាយច្បាប់ ស្តីពីការប្រកួតប្រជែងដល់មន្ត្រី របស់ខ្លួន ដែលជាប្រធានការិយាល័យថ្នាក់កណ្ដាល និងសាខារាជធានី-ខេត្ត។
ទំព័រហ្វេសប៊ុករបស់ ក.ប.ប. ឱ្យដឹងថា វគ្គបណ្តុះបណ្តាលនេះ មានការចូលរួមធ្វើបទបង្ហាញបណ្តុះបណ្តាលដោយ លោកពេជ ច័ន្ទ អគ្គនាយករង ក.ប.ប. រួមជាមួយ លោក ប៉ែន វីរៈឧត្ដម អនុប្រធាននាយកដ្ឋាន និងលោក ឌុក ភិវឌ្ឍន៍ ប្រធានការិយាល័យ នៃនាយកដ្ឋានកិច្ចការប្រកួតប្រជែង។
លោក ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប.ប្រាប់ ភ្នំពេញ ប៉ុស្តិ៍ នៅថ្ងៃទី ២៤ វិច្ឆិកា ថា ច្បាប់ស្តីពីការប្រកួតប្រជែងត្រូវបានព្រះមហាក្សត្រឡាយព្រះហត្តលេខាប្រកាសឱ្យប្រើកាលពីថ្ងៃទី ៥ ខែ តុលា ឆ្នាំ ២០២១។ វគ្គបណ្តុះបណ្តាលនេះ នឹងដើរតួជាវេទិកាមួយ ដើម្បីឱ្យមន្ត្រី នៃអគ្គនាយកដ្ឋាន ក.ប.ប. មានការយល់ដឹងកាន់តែស៊ីជម្រៅអំពីច្បាប់ថ្មីនេះ មុននឹងឈានដល់ការទទួលបាននីតិសម្បទា ជានគរបាលយុត្តិធម៌ក្រោមច្បាប់ស្តីពីការប្រកួតប្រជែង។
លោកបញ្ជាក់ថា៖ «វគ្គបណ្តុះបណ្តាលទៅដល់មន្ត្រី ក.ប.ប. ហ្នឹងគឺមានទៅដល់ ៨ វគ្គ ចាប់តាំងពីថ្នាក់ប្រធានការិយាល័យ រហូតដល់ថ្នាក់អគ្គនាយក ដើម្បីត្រៀមទៅទទួលបានការតែងតាំងជាមន្ត្រីស៊ើបអង្កេតស្របច្បាប់ ស្តីពីច្បាប់ការប្រកួតប្រជែង។ រួចពីនេះ យើងនឹងបន្តបណ្តុះបណ្តាលមន្ត្រីយើងទៀត ដើម្បីទទួលបាននីតិសម្បទាជានគរបាលយុត្តិធម៌»។
តាមលោក ផាន អូន វគ្គបណ្តុះបណ្តាលចំនួន ៨ វគ្គនេះ គ្រោងនឹងបិទបញ្ចប់នៅចុងខែធ្នូ ឆ្នាំនេះ ខណៈវគ្គបណ្តុះបណ្តាលបន្តចំនួន ៤ វគ្គទៀត ដែលធ្វើឡើងដោយព្រះរាជអាជ្ញា គ្រោងបញ្ចប់នៅដើមឆ្នាំ ២០២២។ វគ្គនេះ មានគោលដៅដើម្បីផ្តល់ចំណេះដឹងដល់មន្ត្រី ក.ប.ប. ឱ្យមានការយល់ដឹងពីនីតិវិធីនានា ក្នុងការអនុវត្តច្បាប់។
ជាមួយនឹងការបណ្តុះបណ្តាលនេះ ក្នុងរយៈពេល ២ ថ្ងៃ គឺថ្ងៃទី ២២ និង ២៣ វិច្ឆិកា មន្ត្រីជំនាញ ក.ប.ប. បានផាកពិន័យជាអន្តរការណ៍ទៅលើម្ចាស់ដេប៉ូចំនួន៧ទីតាំង ក្នុងចំណោមស្ថានីយ និងដេប៉ូចំនួន ២០ ដែលបានលក់ប្រេងមិនអនុលោមភាពក្នុងខេត្តមួយចំនួន ដែលមានខេត្តកណ្ដាល ខេត្តសៀមរាប និងខេត្តមណ្ឌលគិរី។
អគ្គនាយកដ្ឋាន ក.ប.ប. ក៏បានឱ្យដឹងដែរថា ក្នុងរយៈពេលដូចគ្នានេះ មន្ត្រី ក.ប.ប. ក៏បានដកហូតទំនិញខូចគុណភាព និងហួសកាលបរិច្ឆេទប្រើប្រាស់ ជាង ៧០០ គីឡូក្រាម និងអាល់កុលក្លែងក្លាយជិត ១០០ លីត្រ នៅលើទីផ្សារផងដែរ។
លោក ផាន អូន អះអាងថា ទំនិញដែលបានដកហូតទាំងអស់ គឺត្រូវកម្ទេចចោលទៅតាមនីតិវិធីច្បាប់ ដើម្បីការពារសិទ្ធិ ផលប្រយោជន៍ដល់អ្នកប្រើប្រាស់ និងទប់ស្កាត់ការធ្វើអាជីវកម្មមិនសុចរិត។ មន្ត្រី នឹងបន្តចុះត្រួតពិនិត្យ និងផ្សព្វផ្សាយបន្ថែមទៀតដល់ប្រជាពលរដ្ឋ ដោយធ្វើយ៉ាងណាឱ្យពួកគេបញ្ឈប់ការដាក់លក់ទំនិញខូចគុណភាពជូនប្រជាពលរដ្ឋ។
ពាក់ព័ន្ធនឹងកិច្ចការងាររបស់ស្ថាប័ននេះ នៅព្រឹកថ្ងៃទី ២៤ ខែវិច្ឆិកា អគ្គនាយកដ្ឋាន ក.ប.ប. បានរៀបចំកិច្ចប្រជុំថ្នាក់ដឹកនាំរបស់អគ្គនាយកដ្ឋានដើម្បីស្តាប់របាយការណ៍ស្តីពីវឌ្ឍនភាពការងារដែលបានអនុវត្តកន្លងមក ពិភាក្សាអំពីបញ្ហាប្រឈម និងលើកទិសដៅការងារអនុវត្តបន្ត។
ក្នុងកិច្ចប្រជុំនេះភាគីពាក់ព័ន្ធ ក៏បានពិភាក្សាត្រៀមរៀបចំរបាយការណ៍ បូកសរុបសកម្មភាពការងាររបស់អគ្គនាយកដ្ឋាន ក.ប.ប. ប្រចាំឆ្នាំ ២០២១។ កិច្ចប្រជុំបានពិភាក្សាពីវឌ្ឍភាពនៃការកសាងសេចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅ នៃគណ:កម្មាធិការប្រកួតប្រជែងកម្ពុជា។ ពិភាក្សាលើអនុក្រឹត្យស្តីពីការគ្រប់គ្រងការផ្សាយពាណិជ្ជកម្មលើផលិតផលទំនិញ និងសេវា និងឯកសារគតិយុត្តផ្សេងទៀត។
រីឯវឌ្ឍនភាពនៃការកសាងផែនការយុទ្ធសាស្ត្រ របស់អគ្គនាយកដ្ឋាន ក.ប.ប. និងការពិនិត្យលទ្ធភាព ដើម្បីកសាងនីតិវិធីប្រតិបត្តិស្តង់ដា SOPs បន្ថែមទៀត ក៏ត្រូវលើកយកមកពិភាក្សាផងដែរ។ នេះបើតាមលោក ផាន អូន៕