ភ្នំពេញៈ ក្រសួងការងារនិងបណ្តុះបណ្តាលវិជ្ជាជីវៈដាក់ដំណើរការជាផ្លូវការនូវប្រព័ន្ធជាតិអប់រំបណ្តុះបណ្តាលបច្ចេកទេស និងវិជ្ជាជីវៈពីចម្ងាយឬហៅថា National TVET E-Learning Platform ដើម្បីដោះស្រាយការបង្រៀននិងរៀនពីចម្ងាយ ឬតាមអនឡាញ ក្នុងអំឡុងពេលនៃការរីករាលដាលជាសកលជំងឺកូវីដ ១៩ ខណៈចំនួនអ្នកទាញយកកម្មវិធី TVET E-Learning នេះមានជិត ១ ម៉ឺននាក់។
ពិធីប្រកាសដាក់ឱ្យដំណើរការជាផ្លូវការនូវប្រព័ន្ធ National TVET E-Learning Platform នេះ បានធ្វើឡើងនៅថ្ងៃទី ២៤ វិច្ឆិកា ដោយមានការចូលរួមពីក្រសួងពាក់ព័ន្ធនានា គណៈកម្មាធិការបណ្តុះបណ្តាលខេត្ត គ្រឹះស្ថានអប់រំបណ្តុះបណ្តាលបច្ចេកទេសនិងវិជ្ជាជីវៈ វិស័យឯកជននិងដៃគូអភិឌ្ឍន៍នានាតាមប្រព័ន្ធអនឡាញសរុបជាង ៨០០ នាក់។
សេចក្តីជូនដំណឹងស្តីពីការដាក់ឱ្យដំណើរការជាផ្លូវការរបស់ក្រសួងការងារនិងបណ្តុះបណ្តាលវិជ្ជាជីវៈបានឲ្យដឹងថា ក្រសួងបានអភិវឌ្ឍប្រព័ន្ធជាតិអប់រំបណ្តុះបណ្តាលបច្ចេកទេស និងវិជ្ជាជីវៈពីចម្ងាយ ឬតាមអនឡាញ ដែលប្រើប្រាស់បានទាំងនៅលើកុំព្យូទ័រថេប្ល៊ិតនិងទូរស័ព្ទដៃឆ្លាតវៃដោយមានការគាំទ្រពីទីភ្នាក់ងារស្វ៊ីសសម្រាប់ការអភិវឌ្ឍនិងកិច្ចសហប្រតិបត្តិការ។
សេចក្តីជូនដំណឹងដដែលបានឲ្យដឹងបន្តថា ប្រព័ន្ធជាតិនេះត្រូវបានបង្កើតឡើងដើម្បីចូលរួមដោះស្រាយការបង្រៀន និងរៀនពីចម្ងាយ ឬតាមអនឡាញរបស់សាស្ត្រាចារ្យ គ្រូបច្ចេកទេស និងសិក្ខាកាម សិស្ស និស្សិតក្នុងអំឡុងពេលនៃការរីករាលដាលជាសកលជំងឺកូវីដ ១៩ ក៏ដូចជាបានបើកច្រកសិក្សាថ្មីបន្ថែមមួយទៀតនៅក្នុងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ។
សេចក្តីជូនដំណឹងបានបញ្ជាក់ថា«ប្រព័ន្ធជាតិនេះមានមាតិកាមេរៀន វីដេអូបង្រៀន ឯកសារមេរៀន អេឡិចត្រូនិក ការស្វ័យវាយតម្លៃការសិក្សា ចំណេះដឹងទូទៅ និងព័ត៌មានផ្សេងៗពាក់ព័ន្ធទៅនឹងការអប់រំ បណ្ដុះបណ្ដាលបច្ចេកទេស និងវិជ្ជាជីវៈនៅកម្ពុជា»។
លោក ពេជ សោភ័ន រដ្ឋមន្ត្រីប្រតិភូអមនាយករដ្ឋមន្ត្រីនិងជារដ្ឋលេខាធិការក្រសួងការងារ និងបណ្តុះបណ្តាល បានប្រាប់ ភ្នំពេញ ប៉ុស្តិ៍ បន្ថែមថា សិក្ខាកាម សិស្ស និស្សិត អាណាព្យាបាល និងសាធារណជនទាំងអស់អាចចូលទាញយកប្រើប្រាស់កម្មវិធីនេះដែលមានឈ្មោះថា TVET, E-Learning ពី Play Store, AppStore និង AppGallery ឬចូលទៅកាន់គេហទំព័រ www.tot-elearning.com ដោយសេរី។
លោកបានឲ្យដឹងទៀតថា គិតត្រឹមថ្ងៃទី ២៣ ខែ វិច្ឆិកា ឆ្នាំ ២០២១ កម្ពុជា មានគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈក្រោមឱវាទក្រសួងចំនួន ៥៧ កំពុងប្រើប្រាស់ប្រព័ន្ធជាតិនេះសម្រាប់ការបង្រៀន និងរៀនពីចម្ងាយ ឬតាមអនឡាញ។
លោកបន្តថា សិក្ខាកាម សិស្ស និស្សិតចំនួន ៣១ ៥២៩ នាក់ បានចូលរៀនក្នុងប្រព័ន្ធជាតិ ដែលមានមាតិកាមេរៀន និងវីដេអូមេរៀនចំនួន ៣ ៥២២ ត្រូវបានបញ្ចូលក្នុងប្រព័ន្ធជាតិនេះ ខណៈមានអ្នកទាញយកកម្មវិធីនេះដាក់ក្នុងថេប្ល៊ិត ឬស្មាតហ្វូនពី AppStore (iOS) Play Store (Android) និងAppGallery (Huawei) សរុបជិត ១ ម៉ឺននាក់។
ជាមួយនឹងការដំណើរការនូវប្រព័ន្ធនេះលោកបានអះអាងថា៖ «ក្រសួងមានផែនការបន្តធ្វើកំណែទម្រង់វិស័យអប់រំបណ្តុះបណ្តាលបច្ចេកទេសនិងវិជ្ជាជីវៈ(TVET)ដោយអភិវឌ្ឍប្រព័ន្ធជាតិធ្វើតេស្តបញ្ជាក់សមត្ថភាពពីមុនពីចម្ងាយឬតាមអនឡាញ (E-RPL) អភិវឌ្ឍប្រព័ន្ធគ្រប់គ្រងគ្រឹះស្ថាន TVET (School Management System) រៀបចំ និងអភិវឌ្ឍមជ្ឈមណ្ឌលទិន្នន័យ(Data Center)បន្តអភិវឌ្ឍសមត្ថភាពស្ថាប័ន ថ្នាក់ដឹកនាំ មន្ត្រីរាជការ និងសាស្ត្រាចារ្យ គ្រូបច្ចេកទេស និងបន្តកសាងហេដ្ឋារចនាសម្ព័ន្ធរូបវន្តនៅតាមគ្រឹះស្ថាន TVET ជាដើម»។
កញ្ញា ហួយ មួយទិ និស្សិតឆ្នាំទី១ នៃវិទ្យាស្ថានបច្ចេកទេសឧស្សាហកម្ម ដែលកំពុងសិក្សាក្នុងប្រព័ន្ធ TVET E-Learning បាននិយាយថា ប្រព័ន្ធនេះ គឺបានបង្កភាពងាយស្រួលដល់កញ្ញា និងសិស្សានុសិស្សដទៃទៀត ដែលកំពុងសិក្សាជំនាញបណ្តុះបណ្តាលបច្ចេកទេសនិងវិជ្ជាជីវៈ។កញ្ញាបានបន្តថា មិនត្រឹមតែប៉ុណ្ណោះប្រព័ន្ធនេះបានផ្តល់នូវមេរៀន និងឯកសារជាច្រើន និងសម្បូរបែបសម្រាប់សិក្សា ព្រោះប្រព័ន្ធនេះ មានផ្ទុកឯកសារពីសាលាជាច្រើន។
កញ្ញាបានរៀបរាប់ថា៖ «វាងាយស្រួលសម្រាប់សិស្សទាំងអស់គ្នា ដែលមានមេរៀនទុកមើលជាមុន ទោះជាយើងមិនទាន់បើកសាលាចូលរៀនដោយផ្ទាល់នៅពេលដែលយើងទប់ស្កាត់ជំងឺកូវីដ ១៩។ ក៏ប៉ុន្តែនៅពេលយើងបើកសាលាចូលរៀនវិញក៏ដោយ ក៏យើងមានមេរៀនសម្រាប់មើលមុនអ៊ីចឹង។ ពួកយើងនឹងទទួលបានអត្ថប្រយោជន៍ព្រោះនៅក្នុងប្រព័ន្ធហ្នឹង គឺមេរៀនពីសាលាជាច្រើន ដែលអាចស្រាវជ្រាវបាន មិនមែនមានតែមួយសាលានោះទេ»៕