.jpg)
រថយន្តដឹកកម្មករដែលដាក់ភ្ជាប់នឹងសារថា «តើការបើកបររបស់ខ្លុំយ៉ាងម៉េចដែរ?»។ រូបថត FB
ភ្នំពេញៈ អង្គការមូលនិធិបង្ការរបួសអាស៊ី (AIP Foundation) នឹងធ្វើការបណ្តុះបណ្តាលអំពីការបើកបរ ដោយសុវត្ថិភាព និងសេដ្ឋកិច្ចភាព ជំហានទី២ ដល់អ្នកបើកបររថយន្តដឹកកម្មករនិយោជិតចំនួន ១ ០០០ នាក់ នៅរាជធានីភ្នំពេញ ខេត្តកណ្តាល ខេត្តកំពង់ស្ពឺ ខេត្តកំពង់ចាម ខេត្តកំពង់ឆ្នាំង ខេត្តតាកែវ និងខេត្តស្វាយរៀង ចាប់ពីថ្ងៃទី ២៥ ខែវិច្ឆិកានេះ។
លោកគឹម បញ្ញា នាយកអង្គការ AIP ប្រចាំប្រទេសកម្ពុជា ឱ្យដឹងនៅថ្ងៃទី ២៤ វិច្ឆិកាថា វគ្គបណ្តុះបណ្តាលថ្មីនេះ ខុសពីការបណ្តុះបណ្តាលសាកល្បង ក្នុងនោះចំនួនអ្នកដែលត្រូវបណ្តុះបណ្តាលសាកល្បងមានតែជាង ៨០ នាក់។ ប៉ុន្តែលើកនេះបានពង្រីកដល់ ១ ០០០ នាក់។ ចំណែកតំបន់គោលដៅ ពង្រីកទៅដល់៧រាជធានី-ខេត្ត។
លោកថ្លែងថា៖ «ក្នុង ១ វគ្គៗ យើងមាន ២៥ នាក់។ អ៊ីចឹង ១ ០០០ នាក់នេះ យើងចែកចេញជា ៤០ វគ្ក ហើយក្នុង ១ វគ្គៗ យើងបណ្តុះបណ្តាល ២ ពេល មានទាំងទ្រឹស្តី មានទាំងការអនុវត្តជាក់ស្តែង»។
លោកបន្តថា វគ្គថ្មីនេះ គឺផ្តោតសំខាន់ខ្លាំងលើការវាយតម្លៃលទ្ធផល ព្រោះគោលដៅចង់បង្ហាញថា ការបណ្តុះបណ្តាលនេះ មានសារៈសំខាន់ មានប្រសិទ្ធភាព ក្នុងការបង្កើនចំណេះដឹង។ កែប្រែឥរិយាបថ និងជួយទៅដល់អ្នកបើកបរ ចៀសវាងទាក់ទងគ្រោះថ្នាក់។ ការសន្សំសំចៃប្រេង រួមចំណែកក្នុងការកាត់បន្ថយការបំពុលបរិយាកាស។
លោកថ្លែងថា៖ «ការវាយតម្លៃមានច្រើនទម្រង់ ដោយលើកនេះក្រៅពីមានការសួរសំណួរដល់អ្នកបើកបរដែលគាត់ចូលរួមវគ្គរបស់យើងនីមួយៗ គឺយើងមានវគ្គចុះទៅធ្វើតេស្តបែបលក្ខណៈផ្ទាល់។ យើងមានចាក់សាំងមុន ដើម្បីវាស់មើលថា មុនពេលគាត់ចូលរួមវគ្គហ្នឹងគាត់ប្រើប្រាស់ប្រេងសាំងប៉ុន្មាន»។
លោកប្រាប់ថា ចំពោះការជ្រើសរើសអ្នកបើកបររថយន្តដឹកកម្មករ អង្គការព្យាយាមកំណត់ជ្រើសរើសនៅតាមតំបន់រោងចក្រណា ឬខេត្តណាដែលប្រឈមគ្រោះថ្នាក់ខ្ពស់ និងមួយទៀតជ្រើសរើសទៅតាមគោលដៅរបស់អង្គការដែលមានចំនួន ៣៦ គោលដៅទូទាំងប្រទេស។
លោក គឹម បញ្ញា លើកឡើងថា ការបណ្តុះបណ្តាលនេះ ទទួលបានការគ្រាំទ្រពីទីភ្នាក់ងារកិច្ចសហប្រតិបត្តិការអន្តរជាតិអាល្លឺម៉ង់ GIZ និងក្រុមហ៊ុនសារជីវកម្ម VF។ ដើម្បីឱ្យកិច្ចការងារនេះកាន់តែរលូនទៅ នៅថ្ងៃទី ២២ ខែវិច្ឆិកា រូបលោក និងសហការី ព្រមទាំងម្ចាស់ជំនួយ (GIZ) បានជួបប្រជុំតាមប្រព័ន្ធវីដេអូ ជាមួយអគ្គនាយករង បេឡាជាតិសន្តិសុខសង្គម (ប.ស.ស.) ដើម្បីពិភាក្សា និងស្នើសុំអនុសាសន៍ក្នុងការគាំទ្រលើការបណ្តុះបណ្តាលនេះដែលជាលទ្ធផល ប.ស.ស.បានគាំទ្រ។
អង្គការមូលនិធិបង្ការរបួសអាស៊ី បានជជែកជាមួយ មន្ត្រី ប.ស.ស.ទាក់ទងនឹងខ្លឹមសារមេរៀន ដើម្បីឱ្យមានលក្ខណៈស៊ីចង្វាក់គ្នា និងងាយស្រួលពេលចុះបណ្តុះបណ្តាល។ ចំពោះការពិនិត្យមើលខ្លឹមសារមេរៀននេះ ប.ស.ស. បានឯកភាពធ្វើការងារជាមួយគ្នាជាបន្តបន្ទាប់ទៀត។
ប.ស.ស. ក៏បានគាំទ្រដល់ការដាក់សារ ដែលសរសេរថា «តើការបើកបរខ្ញុំយ៉ាងម៉េចដែរ?»ព្រមទាំងដាក់លេខទូរសព្ទទំនាក់ទំនងផ្តល់ព័ត៌មានអំពីឥរិយាបថ របស់អ្នកបើកបររថយន្ត នៅលើយានយន្ត របស់អ្នកបើកបររថយន្តដឹកកម្មករនិយោជិតទាំង ១ ០០០ នាក់ផងដែរ។ នេះបើតាមលោកគឹម បញ្ញា។
លោកលើកឡើងថា ចំពោះការដាក់សារនេះ ផ្តោតសំខាន់លើរថយន្តរបស់អ្នកបើកបររថយន្តដឹកកម្មករ ទាំង ១ ០០០ គ្រឿង។ ប៉ុន្តែគោលដៅរបស់អង្គការគឺចង់ដាក់គ្រប់រថយន្តដែលផ្តល់សេវាដឹកជញ្ជូនកម្មករ ទៅមកបំពេញការងារ។ ព្រោះបើតាមតួលេខ របស់ ប.ស.ស. កម្ពុជាមានជិត ៤ ០០០ គ្រឿង ដែលផ្តល់សេវាដឹកកម្មករនិយោជិតនៅទូទាំងប្រទេស។
លោកថ្លែងថា៖ «យើងនឹងមានការជជែកពិភាក្សាគ្នាក្នុងក្រុមការងារនោះ ក្នុងពេលខាងមុខ ដើម្បីកំណត់ថា តើលេខទូរស័ព្ទណា ដែលគួរដាក់ចូលដើម្បីឱ្យកម្មករ អ្នកដែលពាក់ព័ន្ធមានចំណាប់អាម្មណ៍ ចង់ផ្តល់យោបល់ទាក់ទងនឹងការបើកបរ របស់អ្នកបើកបររថយន្តដឹកកម្មករ ដើម្បីជូនដល់ស្ថាប័ន ឬអ្នកពាក់ព័ន្ធគាត់មានវិធានការ»។
លោក ហេង សុផាន់ណារិទ្ធ អ្នកនាំពាក្យ ប.ស.ស. បានថ្លែងនៅថ្ងៃទី ២៤ ខែវិច្ឆិកាថា ប.ស.ស. មានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) នៃ ប.ស.ស. បានធ្វើការអប់រំផ្សព្វផ្សាយដល់កម្មករនិយោជិតអំពីសុវត្ថិភាពក្នុងការធ្វើដំណើរ និងអប់រំផ្សព្វផ្សាយដល់អ្នកបើកបរដឹកកម្មករនិយោជិត អំពីសុវត្ថិភាពក្នុងការដឹកជញ្ជូន។ ក្នុងនោះដែរសម្រាប់អ្នកបើកបរដឹកកម្មករនិយោជិត ក្រុមការងារ ស.ផ.ក. ក៏បានអប់រំបន្ថែមអំពីការត្រួតពិនិត្យលក្ខណៈបច្ចេកទេសរថយន្ត ដូចជា ត្រួតពិនិត្យកង់ ប្រេងម៉ាស៊ីន ហ្វ្រាំង ធុងទឹក ផ្លិតទឹក ភ្លើងស៊ីញ៉ូជាដើម។
លើសពីនេះទៀត ក្រុមការងារបានអប់រំ អំពីការវ៉ាជែង ត្រូវពិនិត្យភ្លើងស៊ីញ៉ូ មើលមុខ មើលក្រោយ មើលឆ្វេងស្ដាំ ឱ្យប្រាកដថា មិនមានឧបសគ្គ ចាំវ៉ាជែង។ លោកបញ្ជាក់ទៀតថា ការបណ្តុះបណ្តាលទៅដល់អ្នកបើកបររថយន្តដឹកកម្មករនិយោជិត រាប់ចាប់ពីឆ្នាំ ២០១៣ មកដល់បច្ចុប្បន្ន ប.ស.ស.បានសហការធ្វើការបណ្តុះបណ្តាលស្តីពីចរាចរណ៍ផ្លូវគោកបានចំនួន២ ៦២១លើក។ អ្នកចូលរួម ចំនួន ៣៧៥ ៩៣១ នាក់ ក្នុងនោះមានអ្នកបើកបរ ១១១ ២០៦ នាក់ និងកម្មករនិយោជិត ២៤៦ ៧២៥ នាក់ ។
លោកថ្លែងថា៖ «ក្រោយពីបានធ្វើការផ្សព្វផ្សាយជាបន្តបន្ទាប់ សង្កេតឃើញថា ការយល់ដឹង របស់ពួកគាត់បានល្អប្រសើជាងមុន។ មានន័យថា បន្ថយការគ្រោះថ្នាក់ ថយជាងឆ្នាំ ដែលយើងមិនបានទៅបណ្តុះបណ្តាលគាត់។ អាហ្នឹងយើងមើលតាមរបាយការណ៍គ្រោះថ្នាក់ មានន័យថា គ្រោះថ្នាក់មានការថយចុះជាងមុន»៕
