.jpg)
ក្រុមអាជីវករពេលនាំគ្នាតវ៉ាកាលពីថ្ងៃទី ២៣ វិច្ឆិកា ។ រូបថត IPN
បាត់ដំបងៈ អាជីវករជាអ្នកលក់ដូរនៅលើផ្លូវជុំវិញផ្សារបឹងឈូកក្រុងបាត់ដំបងបដិសេធមិនព្រមរើទីកន្លែងលក់ដូរនៅទីតាំងថ្មី ដើម្បីឲ្យអាជ្ញាធរក្រុងអាចរៀបចំសណ្តាប់ធ្នាប់ជុំវិញផ្សារនោះឡើយ។ យ៉ាងនេះក្តីអាជ្ញាធរក្រុងអះអាងថា នៅតែបន្តសម្របសម្រួលដោយធ្វើការអប់រំណែនាំឲ្យពលរដ្ឋបានយល់ និងចូលរួមក្នុងការរបៀបចំសណ្តាប់ធ្នាប់លើផ្លូវជុំវិញផ្សារនេះ។
អ្នកស្រី យ៉ាន់ សុខលី អាជីវករលក់ដូរនៅលើផ្លូវដែលនៅជុំវិញផ្សារបឹងឈូកបានថ្លែងនៅថ្ងៃទី ២៤ ខែវិច្ឆិកាថា អាជ្ញាធរក្រុងបានណែនាំឲ្យពួកគាត់រើទីតាំងដែលធ្លាប់លក់ដូរនៅលើផ្លូវជុំវិញផ្សារបឹងឈូក ប៉ុន្តែពួកគាត់មិនយល់ព្រមដោយសំអាងថា ការលក់ដូរនៅទីតាំងថ្មីលក់មិនដាច់។ អ្នកស្រីថា ការទៅលក់ដូរនៅកន្លែងថ្មីមិនអំណោយផលដូចនៅកន្លែងចាស់ដែលធ្លាប់លក់នោះទេ ព្រោះកន្លែងថ្មីមិនសូវមានមនុស្សចេញចូល ។
អ្នកស្រីថ្លែងថា៖ «សំខាន់ទៅកន្លែងថ្មីយើងលក់អត់ដាច់អត់អី អត់មានមនុស្សចេញចូលច្រើនអ៊ីចឹងទៅ គេធ្លាប់មកកន្លែងណា គេមកតែកន្លែងហ្នឹង ម៉ូយៗ វាពិបាកអ៊ីចឹង»។
អ្នកស្រីបញ្ជាក់ថា កន្លងមកមានអាជីវករធ្លាប់យល់ព្រមប្តូរទីតាំងទៅកន្លែងថ្មី ប៉ុន្តែទៅបានតែ ២ ឬ ៣ ថ្ងៃ ក៏ត្រឡប់មកវិញព្រោះតែការលក់មិនដាច់នេះឯង។ ចំពោះការប្តូរទីតាំងទៅកាន់ទីតាំងថ្មីនេះមានអាជីវករប្រមាណរហូតដល់ ៩០ ភាគរយ មិនយល់ព្រម។
លោក ផេង សិទ្ធី អភិបាលក្រុងបាត់ដំបងបានថ្លែងនៅថ្ងៃទី ២៤ ខែវិច្ឆិកាថា ប្រជាពលរដ្ឋដែលមានផ្ទះល្វែងនៅជុំវិញផ្សារបឹងឈូកបានដាក់ពាក្យបណ្តឹងសុំជួយអន្តរាគមន៍ សម្របសម្រួល និងរៀបចំសណ្តាប់ធ្នាប់ជុំវិញផ្សារ ព្រោះការលក់ដូររបស់អាជីវករធ្វើឲ្យពួកគាត់ពិបាកក្នុងការចេញចូលផ្ទះ។លោកថា រឿងនេះអាជ្ញាធរក្រុងក៏បានពិនិត្យឃើញថា ការលក់ដូរនៅទីនោះមិនមានសណ្តាប់ធ្នាប់ និងអាចមានគ្រោះថ្នាក់ពិបាកជួយសង្គ្រោះប្រសិនបើមានហានិភ័យណាមួយកើតឡើង។
លោកថ្លែងថា៖ «គាត់លក់ដូរនៅជុំវិញផ្សារហ្នឹង ដែលមើលទៅឃើញចង្អៀតហើយមានអ្នកខ្លះយករូបទៅបង្ហោះរិះគន់តាមបណ្តាញសង្គមហ្វេសប៊ុកថា យើងមិនបានរៀបចំមិនអី ប៉ុន្តែជាក់ស្តែងដោយសារធ្វើទៅវាប៉ះពាល់ យើងចង់ឲ្យទូលាយផ្លូវ ប៉ុន្តែវាប៉ះអារម្មណ៍អ្នកលក់ អ៊ីចឹងទៅ» ។
លោកថា ផ្លូវបេតុងមានទទឹង ២០ ម៉ែត្រ ប៉ុន្តែខាងផ្សារចេះតែពង្រីកឲ្យលក់រហូតដល់ពេញផ្លូវ ។យ៉ាងណា ឥឡូវនេះអាជ្ញាធរសម្រេចសុំការយោគយល់ពីប្រជាពលរដ្ឋដើម្បីបើកផ្លូវឲ្យមានទំហំទទឹង៨ម៉ែត្រដើម្បីឲ្យយានយន្តអាចបើកបរបានការពារខ្លាចក្រែងមានអគ្គិភ័័យឬមានគ្រោះថ្នាក់ណាមួយកើតឡើង ប៉ុន្តែប្រជាពលរដ្ឋអ្នកលក់ដូរនៅទីនោះមិនព្រមចាកចេញ។
លោកអភិបាលក្រុងបញ្ជាក់ថា អាជ្ញាធរក្រុងនិងខេត្តបានរកទីកន្លែងឲ្យគាត់លក់ដូរសមរម្យជូនពួកគាត់ ដោយម្ចាស់ទីតាំងផ្សារថ្មីមិនយកថ្លៃប៉ាតង់ ថ្លៃភាស៊ី និងថ្លៃតូបរយៈពេល៣ឆ្នាំ ។ លោកបញ្ជាក់បន្ថែមថា អាជ្ញាធរក្រុងនឹងព្យាយាមសម្របសម្រួលជាមួយប្រជាពលរដ្ឋបន្តទៀត ប៉ុន្តែទីតាំងផ្លូវនោះអាជ្ញាធរត្រូវតែរៀបចំសម្រាប់ប្រើជាប្រយោជន៍រួម មិនអាចទុកឲ្យនៅតែលក់បែបនេះរហូតនោះទេ។
លោកថ្លែងថា៖ «យើងនៅតែបន្តធ្វើការពន្យល់ អប់រំ ណែនាំធ្វើយ៉ាងណាឲ្យគាត់បានយល់ដឹងនិងឲ្យតម្លៃទៅលើភាពស្រស់ស្អាតមានសណ្តាប់ធ្នាប់ ហើយចូលរួមសហការជាមួយក្នុងការរៀបចំសណ្តាប់ធ្នាប់នៅទីនោះ»។
លោក ព្រហ្មណាវុធ ប្រធានផ្សារបឹងឈូក ថ្លែងនៅថ្ងៃទី ២៤ ខែវិច្ឆិកាថា លោកកំពុងព្យាយាមរៀបចំសណ្តាប់ធ្នាប់ឲ្យមានរបៀបរៀបរយនៅជុំវិញទីតាំងផ្សារ ប៉ុន្តែនៅមិនទាន់បាន ១០០ភាគរយនោះទេ ដោយសារតែផ្នត់គំនិតអាជីវករ គឺធ្លាប់លក់នៅកន្លែងណាចង់បន្តនៅលក់តែនៅកន្លែងនោះ ហេតុនេះត្រូវការពេលវេលា ដើម្បីបញ្ជ្រាបការយល់ដឹងទៅដល់ពួកគាត់។
លោកប្រាប់ថា បានរៀបចំទីតាំងថ្មីសម្រាប់អាជីវករលក់ដូរចំនួន ៣ កន្លែង ទី១ ខាងជើងផ្សារបឹងឈូកគឺនៅក្បែរបេនឡានផ្សារបឹងឈូក នៅខាងលិចផ្សារមួយកន្លែង និងនៅក្នុងផ្សារបឹងឈូកដែលមានទីតាំងត្រឹមត្រូវច្បាស់លាស់ សរុបទាំង៣ទីតាំងមានចំនួនប្រមាណ ៣០០ តូប ដែលទីតាំងទាំងនោះនៅចម្ងាយប្រមាណជិត ២០០ ម៉ែត្រពីគ្នាប៉ុណ្ណោះ ។
លោកថ្លែងថា៖ «យើងរៀបចំបានខ្ទង់ប្រហែល ៣០០ កន្លែងចែកពួកគាត់ម្នាក់បន្តិចៗធ្វើយ៉ាងម៉េចឲ្យគាត់អាចលក់ដូរមុខរបរប្រចាំថ្ងៃគាត់បានគ្រាន់តែថា កន្លែងលក់ដូរនោះវាមិនបានធំតាមគាត់ចង់បានដូចនៅលើទ្រូងផ្លូវនោះទេ ព្រោះយើងដឹងហើយនៅលើផ្លូវខុសពីនៅទីតាំងដែលយើងរៀបចំ»៕
វីដេអូ៖
