ភ្នំពេញៈ ក្រសួងអប់រំ យុវជន និងកីឡា និងអង្គការយូណេស្កូ នៅថ្ងៃទី ២៤ វិច្ឆិកា បានសម្ពោធជាផ្លូវការ នូវសាលាគរុកោសល្យ និងវិក្រឹតការ ខេត្តចំនួន ១១ ដែលបានជួសជុលឡើងវិញ តាមរយៈគម្រោងពង្រឹងកម្មវិធីអប់រំគ្រូបង្រៀននៅកម្ពុជា (STEPCam)។ តាមរយៈគម្រោងថ្មីនេះ អាចធានាថា ជារៀងរាល់ឆ្នាំបុគ្គលិកអប់រំ និងគ្រូឧទ្ទេសចំនួន ២៤៩ រូប ព្រមទាំងគ្រូបង្រៀនបឋមសិក្សាចំនួន ១២៧៧ រូប នឹងទទួលបានការបណ្ដុះបណ្ដាលកាន់តែប្រសើរឡើង។ នេះបើតាមសេចក្ដីប្រកាសព័ត៌មាន។
យោងតាមសេចក្ដីប្រកាសព័ត៌មាន ស្ដីពីការសម្ពោធជាផ្លូវការ នូវសាលាគរុកោសល្យ និងវិក្រឹតការ ខេត្ត ចំនួន ១១ នេះបានឱ្យដឹងថា សាលាគរុកោសល្យ និងវិក្រឹតការខេត្ត គឺជាទីកន្លែងសម្រាប់បណ្តុះបណ្តាលគ្រូបង្រៀន ថ្នាក់បឋមសិក្សាទាំងអស់នៅក្នុងប្រទេសកម្ពុជា។
ការផ្តល់មជ្ឈដ្ឋានអំណោយផលនៅសាលាគរុកោសល្យទាំងនេះ សម្រាប់គ្រូបង្រៀនដើម្បីពង្រឹងជំនាញ និងការអនុវត្តការបង្រៀនរបស់ពួកគាត់ គឺជាគន្លឹះក្នុងការធានាការបង្រៀនប្រកបដោយគុណភាព។
សាលាគរុកោសល្យ និងវិក្រឹតការខេត្តទាំង ១១ ត្រូវបានកែលម្អ ដើម្បីបង្កើតបរិយាកាសសិក្សា ដែលគ្រូឧទ្ទេស និងសិស្សានុសិស្សមានអារម្មណ៍ថា មានតម្លៃ ចង់រៀន និងជាបរិយាកាសមួយ ដែលនឹងជួយធ្វើឱ្យការបណ្តុះបណ្តាលគ្រូបង្រៀនមានភាពប្រសើរឡើង។
សាលាគរុកោសល្យនិងវិក្រឹតការខេត្តទាំងនេះ មានទីតាំងនៅខេត្តបន្ទាយមានជ័យ កំពត កំពង់ឆ្នាំង កំពង់ស្ពឺ កំពង់ធំ ក្រចេះ ព្រះសីហនុ ព្រះវិហារ ពោធិ៍សាត់ ស្ទឹងត្រែង និងស្វាយរៀង។ សាលាទាំងនេះត្រូវបានជ្រើសរើសបន្ទាប់ពីបានធ្វើការពិភាក្សាពិគ្រោះយោបល់ និងផ្អែកលើតម្រូវការជាក់ស្តែង សម្រាប់ការកែលម្អ។
លោក ហង់ជួន ណារ៉ុន រដ្ឋមន្ដ្រីក្រសួង អប់រំ និងតំណាងអង្គការយូណេស្កូ កាលពីថ្ងៃទី២៤ វិច្ឆិកា បានធ្វើជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការ និងការប្រគល់-ទទួលហេដ្ឋារចនាសម្ព័ន្ធអប់រំ សាលាគរុកោសល្យ និងវិក្រឹតការខេត្តទាំង១១ ទីតាំង ជូនដល់គណៈគ្រប់គ្រងសាលា នៅខេត្ដកំពត។
លោក ហង់ជួន ណារ៉ុន បាន ថ្លែងអំណរគុណ ដល់អង្គការយូណេស្កូ ដែលជួយសហការឧបត្ថម្ភគាំទ្រជួយជួសជុលកែលម្អដល់សាលាគរុកោសល្យគោលដៅទាំង១១ទីតាំងនេះ ឱ្យសម្រេចបានទៅតាមការគ្រោងទុក។
លោកបានវាយតម្លៃខ្ពស់ ក្នុងការខិតខំប្រឹងប្រែង របស់លោកគ្រូអ្នកគ្រូ ក្នុងការបំពេញការងារ ក្នុងវិស័យអប់រំនាពេលកន្លងមក។
លោកសង្ឃឹមថា ការបង្កើតបន្ទប់កុំព្យូទ័រ នៅសាលាគរុគោលស្យទាំង១១នេះ នឹងជួយបង្កើតការគាំទ្របន្ថែមដល់គ្រូឧទ្ទេស និងគរុសិស្ស ទទួលបានការបណ្ដុះបណ្ដាលបន្ថែម ដើម្បីអភិវឌ្ឍន៍វិស័យអប់រំឱ្យកាន់តែប្រសើរឡើង។
លោកថ្លែងថា៖«ការបង្កើនគុណវុឌ្ឍិគ្រូឧទ្ទេស ដែលជាអាទិភាពរបស់យើង គឺយើងនឹងអនុវត្ដនូវវិធីសាស្ដ្របង្រៀនថ្មីដើម្បីពង្រឹងសមត្ថភាពគរុសិស្សខាងផ្នែកបង្រៀនវិទ្យាសាស្ដ្រ និងបច្ចេកវិទ្យាផងដែរ។ ការប្រើប្រាស់វិធីសាស្ដ្របង្រៀនថ្មីនេះដើម្បីបណ្ដុះបំនិនសតវត្សរ៍ទី២១ សម្រាប់យុវជនកម្ពុជា»។
បើតាមសេចក្ដីប្រកាសព័ត៌មាន ការជួសជុល សាលាគរុកោសល្យ និងវិក្រឹតការ ខេត្តទាំង ១១ រួមមាន ការកែលម្អហេដ្ឋារចនាសម្ព័ន្ធដូចជាការប្រក់ដំបូលថ្នាក់រៀនឡើងវិញ និងការជួសជុលអន្តវាសិកដ្ឋាន ក៏ដូចជាការកែលម្អទីតាំងទូទៅ ដូចជាការផ្គត់ផ្គង់ថាមពលអគ្គីសនី និងការជួសជុលប្រព័ន្ធលូជាដើម។
កន្លែងសិក្សា រួមទាំងបណ្ណាល័យ មន្ទីរពិសោធន៍វិទ្យាសាស្ត្រ និងបន្ទប់កុំព្យូទ័រ ក៏ត្រូវបានធ្វើឱ្យប្រសើរឡើងផងដែរ។
តាមរយៈការវិនិយោគលើហេដ្ឋា រចនាសម្ព័ន្ធ ICT រួមទាំងការដំឡើងអ៊ីនធើណិតល្បឿនលឿន សាលាគរុកោសល្យទាំង ១១នេះ មានភាពល្អប្រសើរ ក្នុងការអភិវឌ្ឍជំនាញឌីជីថល ដល់គ្រូបង្រៀន ដែលត្រូវការចាំបាច់សម្រាប់ បរិយាកាសឌីជីថលថ្មីៗដែលដាក់បញ្ចូលទៅក្នុងវិស័យអប់រំ។
សេចក្ដីប្រកាសបានឱ្យដឹងថា ថវិកាសរុបចំនួន ៣,៤ លាន ដុល្លារ ត្រូវបានវិនិយោគនៅក្នុងកម្មវិធី STEPCam ដើម្បីធានាថា ការជួសជុល ឧបករណ៍ និងការបណ្ដុះបណ្ដាលនៅសាលាគរុកោសល្យ មានគុណភាពខ្ពស់បំផុត។ បន្ទប់សិក្សាសរុបចំនួន ១១១ (៦៣ បន្ទប់សម្រាប់សាលាគរុកោសល្យ និងវិក្រឹតការ និង ៤៨ បន្ទប់សម្រាប់សាលាអនុវត្តន៍) និង ២៥៨ បន្ទប់ជាអន្តេវាសិកដ្ឋានត្រូវបានជួសជុល។
តាមរយៈការជួសជុលទាំងនេះ ធនធានថ្មីៗ និងការបណ្តុះបណ្តាលនៅសាលា គរុកោសល្យ និងវិក្រឹតការធ្វើឱ្យគម្រោង STEPCam អាចធានាថា ជារៀងរាល់ឆ្នាំ បុគ្គលិកអប់រំ និងគ្រូឧទ្ទេស ចំនួន ២៤៩ រូប ព្រមទាំងគ្រូបង្រៀនបឋមសិក្សា ចំនួន ១២៧៧ រូបបានទទួលការ បណ្ដុះបណ្ដាលកាន់តែប្រសើរឡើង ដើម្បីជួយឱ្យលទ្ធផលសិក្សារបស់សិស្សកាន់តែប្រសើរឡើង។
នៅពេលដែលគ្រូបង្រៀនទាំងនេះ ទៅបង្រៀននៅថ្នាក់បឋមសិក្សា ពួកគាត់នឹងដើរតួនាទី យ៉ាងសំខាន់ ក្នុងការសម្រេចបាននូវមហិច្ឆតារបស់ប្រទេសកម្ពុជា ក្នុងការសម្រេចបាន នូវគោលដៅអភិវឌ្ឍន៍ប្រកបដោយចីរភាពទី៤ តាមរយៈការផ្តល់ការអប់រំប្រកបដោយគុណភាព និងបរិយាបន្ន៕