ភ្នំពេញៈ ឯកអគ្គរដ្ឋទូតថ្មីនៃសាធារណរដ្ឋបារាំងប្រចាំកម្ពុជា លោក ហ្សាក់ ប៉ឺឡែ (Jacques Pellet) នៅថ្ងៃទី ២៤ វិច្ឆិកា បានធ្វើដំណើរទស្សនកិច្ចនៅការិយាល័យកាសែត ភ្នំពេញ ប៉ុស្តិ៍ ដែលជាស្ថាប័នកាសែតវ័យចំណាស់នៅកម្ពុជា ដើម្បីស្វែងយល់ពីវិស័យសារព័ត៌មាន និងដើម្បីបង្កើនកិច្ចសហប្រតិបត្តិការផ្នែកផ្សព្វផ្សាយរវាងភាគីទាំង ២។
ដំណើរទស្សនកិច្ចនេះ ត្រូវបានធ្វើឡើងនៅអគារដែលជាការិយាល័យកាសែត ភ្នំពេញ ប៉ុស្តិ៍ ស្ថិតនៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដោយមានលោក Jacques Pellet និងមន្ត្រីទូតបារាំងផ្សេងទៀតបានជួបសំណេះសំណាលជាមួយលោក លី តៃសេង ចាងហ្វាង និងជាអគ្គនាយកកាសែត ភ្នំពេញ ប៉ុស្តិ៍ និងសហការីមួយចំនួន។
ក្នុងជំនួបរយៈពេលជិត ១ ម៉ោងនោះ លោក Jacques Pellet បានឱ្យដឹងថា ដំណើរទស្សនកិច្ចនេះគឺធ្វើឡើងដើម្បីស្វែងយល់ពីស្ថាប័នកាសែត ភ្នំពេញ ប៉ុស្តិ៍ និងបានសំណូមពរដល់ស្ថាប័នកាសែត ភ្នំពេញ ប៉ុស្ដិ៍ ដើម្បីជួយផ្សព្វផ្សាយផ្នែកសេដ្ឋកិច្ច វប្បធម៌ និងកម្មវិធីផ្សេងៗដែលរៀបចំដោយស្ថានទូតបារាំងនាពេលខាងមុខ។
ក្រៅពីនេះ លោក Jacques Pellet ក៏បានលើកឡើងពីការអភិវឌ្ឍនៅកម្ពុជា ដែលមានការរីកចម្រើនច្រើនគួរឱ្យកត់សម្គាល់ បើប្រៀបធៀបទៅនឹងកាលពី ១០-២០ ឆ្នាំមុន។
លោកថ្លែងថា៖ «ខ្ញុំធ្លាប់មកប្រទេសកម្ពុជានៅក្នុងអំឡុងឆ្នាំ ១៩៩៥ ហើយប្រៀបមកបច្ចុប្បន្ន យើងឃើញថាការអភិវឌ្ឍខុសគ្នាឆ្ងាយណាស់ សូម្បីតែតំបន់ជុំវិញសុទ្ធតែអគារខ្ពស់ ហេដ្ឋារចនាសម្ព័ន្ធគឺមានការរីកចម្រើនច្រើន»។
ជាការឆ្លើយតប លោក លី តៃសេង បានសម្តែងការស្វាគមន៍ចំពោះដំណើរទស្សនកិច្ចលើកដំបូងលោក Jacques Pellet។
លោកថ្លែងថា៖ «យើងពិតជាមានកិត្តិយស និងថ្លែងអំណរគុណ ឯកឧត្តមឯកអគ្គរដ្ឋទូត ដែលបានចំណាយពេលធ្វើទស្សនកិច្ចនៅកាសែត ភ្នំពេញ ប៉ុស្តិ៍ ហើយយើងស្វាគមន៍រីករាយ ធ្វើការសហការជាមួយស្ថានទូតបារាំង និងស្ថានទូតនានាផ្សេងទៀតនៅប្រទេសកម្ពុជា ដើម្បីធ្វើការផ្សព្វផ្សាយទៅលើការងារផ្សេងៗពាក់ព័ន្ធវប្បធម៌ សង្គមសេដ្ឋកិច្ច និងនយោបាយ និងការពង្រឹងកិច្ចសហការលើការអភិវឌ្ឍប្រទេស»។ នៅក្នុងជំនួបលោក Jacques Pellet ក៏បានយល់ព្រមសរសេរអត្ថបទជាទស្សនៈសម្រាប់បោះពុម្ពផ្សាយនៅកាសែតភ្នំពេញប៉ុស្តិ៍ផងដែរ។
លោក លី តៃសេង សង្ឃឹមថានឹងមានការសហការល្អ ជាបន្តបន្ទាប់ទៅមុខទៀត រវាងកាសែត ភ្នំពេញ ប៉ុស្តិ៍ និងស្ថានទូតនានាប្រចាំនៅកម្ពុជា។
លោក លី តៃសេង បានប្រាប់ឯកអគ្គរដ្ឋទូតបារាំងផងដែរថា កាសែតភ្នំពេញប៉ុស្តិ៍ ជាកាសែតវ័យចំណាស់ជាងគេ ដែលផ្សព្វផ្សាយជាភាសាខ្មែរ និងភាសាអង់គ្លេស ដែលមានព័ត៌មានសម្បូរបែប។
លោកបានថ្លែងថា៖ «អ៊ីចឹងអ្នកអាន ភ្នំពេញ ប៉ុស្តិ៍ មានគ្រប់កម្រិត រួមទាំងថ្នាក់ដឹកនាំកំពូលៗ ទាំងស្ថាប័នជាតិ និងស្ថាប័នអន្តរជាតិដូចជាខាងស្ថានទូត អង្គការ UN និងអង្គការអន្តរជាតិផ្សេងៗក៏អាន ភ្នំពេញ ប៉ុស្តិ៍ដែរ ហើយ ភ្នំពេញ ប៉ុស្តិ៍ មានអ្នកអានច្រើន»។ ដើម្បីផ្តល់ទំនុកចិត្តដល់អ្នកអាន កាសែតភ្នំពេញប៉ុស្តិ៍បានប្រកាន់ជំហរ ក្នុងការផលិតនូវព័ត៌មានពិត ត្រឹមត្រូវ ដើម្បីលុបបំបាត់ព័ត៌មានក្លែងក្លាយផងដែរ។
លោកបញ្ជាក់ថា៖ «ភ្នំពេញ ប៉ុស្តិ៍ យើងផ្តោតទៅលើគុណភាពសារព័ត៌មាន អ៊ីចឹងរាល់ការផ្សព្វផ្សាយរបស់យើង ផ្តោតលើការផ្សព្វផ្សាយព័ត៌មានពិត ត្រឹមត្រូវ ដើម្បីបម្រើផលប្រយោជន៍ជាតិ និងប្រជាជនកម្ពុជា ដើម្បីតម្រូវអ្នកអាន។ អ៊ីចឹងយើងចៀសវាងការផ្សព្វផ្សាយព័ត៌មានណាដែលជាព័ត៌មានមិនពិត មួលបង្កាច់»។
លោក Jacques Pellet បានធ្វើដំណើរទស្សនកិច្ចនៅកាសែត ភ្នំពេញ ប៉ុស្តិ៍ គឺបន្ទាប់ពីលោកបានចូលជួបលោកនាយករដ្ឋមន្ត្រី ហ៊ុន សែន ដើម្បីសម្តែងការគួរសម និងស្វែងយល់ពីកម្ពុជាក្នុងតួនាទីលោកជាឯកអគ្គរដ្ឋទូតថ្មីនៃសាធារណរដ្ឋបារាំង។
កាសែត ភ្នំពេញ ប៉ុស្តិ៍ ជាកាសែតបោះពុម្ពផ្សាយប្រចាំថ្ងៃជាខេមរភាសា គឺភាសាខ្មែរ និងអង់គ្លេស។ កាសែតនេះបានចាប់ផ្តើមបោះពុម្ពផ្សាយជាលើកដំបូង នៅក្នុងខែកក្កដា ឆ្នាំ ១៩៩២៕
វីដេអូ៖