បាត់ដំបងៈ អភិបាលខេត្តបាត់ដំបងបានឱ្យដឹងថា នៅក្នុងរយៈពេល ៤២ ឆ្នាំ ចាប់តាំងពីឆ្នាំ ១៩៧៩ ដល់ ខែមិថុនា ឆ្នាំ ២០២១ នេះ ប្រជាពលរដ្ឋនៅក្នុងខេត្តបាត់ដំបងចំនួន ១៥ ២៨៩ នាក់បានស្លាប់ និងរងរបួសមានពិការភាព ដោយសារគ្រាប់មីន និងគ្រាប់មិនទាន់ផ្ទុះ។
លោក សុខ លូ អភិបាលខេត្តបាត់ដំបង ថ្លែងនៅក្នុងពិធីអមដំណើរលោក លី ធុជ អនុប្រធានទី១ អាជ្ញាធរមីនកម្ពុជា និងម្ចាស់គម្រោងបោសសម្អាតមីន ចុះពិនិត្យ ចម្ការមីន និងជួបសំណេះសំណាលជាមួយអ្នកទទួលផលនៅភូមិគោករកា ឃុំដូនបារ ស្រុកគាស់ក្រឡ នៅថ្ងៃទី ២៤ ខែ វិច្ឆិកា ឆ្នាំ ២០២១ នេះ ឱ្យដឹងថា ភូមិសាស្ត្រខេត្តបាត់ដំបង គឺជាប៉ុស្តិ៍ប៉មប្រយុទ្ធជួរមុខក្នុងសម័យសង្គ្រាមជាង ២ ទសវត្សរ៍ ដូចនេះផ្ទៃដីមួយភាគធំរបស់ខេត្ត គ្របដណ្តប់ទៅដោយគ្រាប់មីន និងសំណល់ជាតិផ្ទុះពីសង្គ្រាមបានបន្សល់ទុកនូវផលវិបាកដល់សង្គមជាតិ និងប្រជាពលរដ្ឋយ៉ាងច្រើនក្នុងដំណើរការកសាង និងអភិវឌ្ឍន៍។
លោកបន្តថា៖ «គ្រាប់មីន និងសំណល់ជាតិផ្ទុះពីសង្គ្រាមយ៉ាងច្រើន នៅកប់រាយប៉ាយក្នុងតំបន់រស់នៅ និងដីបង្កបង្កើនផលរបស់បងប្អូនប្រជាពលរដ្ឋ ហើយមកដល់ពេលនេះ គ្រោះមហន្តរាយដែលបណ្តាលមកពីគ្រាប់មីន និងសំណល់ជាតិផ្ទុះពីសង្គ្រាមនៅតែបន្តគំរាមកំហែងជារឿយៗមកលើអាយុជីវិតមនុស្ស និងទ្រព្យសម្បត្តិរបស់បងប្អូនយើងនៅឡើយ»។
បើតាម លោក សុខ លូ ជាក់ស្តែងចំនួនជនរងគ្រោះដោយសារគ្រាប់មីន និងសំណល់ជាតិផ្ទុះពីសង្គ្រាម ពីឆ្នាំ ១៩៧៩ ដល់ខែតុលា ឆ្នាំ ២០២១ សរុបក្នុងខេត្តបាត់ដំបងចំនួន ១៥ ២៨៩ នាក់ (ដោយសារមីនចំនួន ១២ ៣៥០ នាក់ និងដោយសារសំណល់ជាតិផ្ទុះពីសង្គ្រាមចំនួន ២ ៩៣៩ នាក់) បណ្តាលឱ្យស្លាប់ចំនួន ៣ ៨៥៩ នាក់ របួសចំនួន ៨ ៧៩៤ នាក់ និងពិការចំនួន ២ ៦៣៦ នាក់។
លោក អភិបាលខេត្តរូបនេះថ្លែងថា៖ «ដោយឡែកនៅក្នុងឆ្នាំ ២០២១ គិតត្រឹមខែតុលានេះ មានជនរងគ្រោះដោយសារគ្រាប់មីន និងសំណល់ជាតិផ្ទុះពីសង្គ្រាមចំនួន ៩ នាក់នៅក្នុងនោះ ដោយសារមីនចំនួន ៧ នាក់ និងដោយសារសំណល់ជាតិផ្ទុះពីសង្គ្រាមចំនួន ២ នាក់»។
លោក សុខ លូ បញ្ជាក់ទៀតថា ដើម្បីដោះស្រាយបញ្ហាប្រឈមនេះ កន្លងមកខេត្តមានប្រតិបត្តិករបោសសម្អាតមីនចំនួន ៥ គឺ៖
-អង្គភាព CMAC -អង្គការ MAG -អង្គការ HALO -Trust អង្គការ CSHD និងអង្គភាពបោសសម្អាតមីនកងទ័ព (NPMEC) ប៉ុន្តែបច្ចុប្បន្ននេះ មានតែ ៣ ប្រតិបត្តិករដោះមីនប៉ុណ្ណោះគឺ៖ អង្គភាព CMAC អង្គការ MAG និងអង្គការ HALO-Trust ។
យោងតាមរបាយការណ៍របស់ក្រុមការងារផែនការសកម្មភាពមីនខេត្ត បានបង្ហាញឱ្យឃើញថា កិច្ចប្រតិបត្តិការបោសសម្អាតមីន និងសំណល់ជាតិផ្ទុះពីសង្គ្រាមក្នុងខេត្តបាត់ដំបង បានចាប់ផ្តើមតាំងពីឆ្នាំ ១៩៩២ មកគិតមកដល់ខែតុលា ឆ្នាំ ២០២១ នេះ លទ្ធផលសរុបដោះមីនរួចក្នុងខេត្តបាត់ដំបង សម្រេចបានចំនួន ៤៦ ៥៩៩ ហិកតា រកឃើញ និងកម្ទេចចោលមីនប្រឆាំងមនុស្សចំនួន ២០២ ៤៥១ គ្រាប់ មីនប្រឆាំងរថក្រោះចំនួន ៣ ៩៩០ គ្រាប់ សំណល់ជាតិផ្ទុះពីសង្គ្រាមចំនួន ១១៣ ៤២២ គ្រាប់ និងមីនច្នៃចំនួន ៣ ៩៧៣ គ្រាប់។
របាយការណ៍នេះបន្តថា ក្នុងនោះតាមរយៈគម្រោងបោសសម្អាតមីន ដើម្បីលទ្ធផល ដែលគាំទ្រដោយអង្គការ UNDP ចាប់ពីឆ្នាំ ២០០៦ មកដល់ឆ្នាំ ២០២០ សម្រេចបានលើផ្ទៃដីចំនួន ១០ ៧១២ ហិកតា៕