.jpg)
ក្រសួងមហាផ្ទៃបានសម្រេចចុះបញ្ជីជូនគណបក្ស «កម្ពុជានិយម» របស់លោក យ៉ែម បុញ្ញឫទ្ធិ ជាផ្លូវការ ដើម្បីបើកផ្លូវឱ្យចូលរួមប្រកួតការបោះឆ្នោតនាពេលខាងមុខ។ រូបថត ហ្វេសប៊ុក
ភ្នំពេញៈ ក្រសួងមហាផ្ទៃបានសម្រេចចុះបញ្ជីជូនគណបក្ស «កម្ពុជានិយម» របស់លោក យ៉ែម បុញ្ញឫទ្ធិ ជាផ្លូវការ ដើម្បីបើកផ្លូវឱ្យចូលរួមប្រកួតការបោះឆ្នោតនាពេលខាងមុខ ខណៈគណៈថ្មីមួយទៀត ក្រសួងកំពុងបន្តពិនិត្យឯកសារបន្ថែមដែលទើបដាក់មកក្រសួងមហាផ្ទៃ។
លោក ឈឹម កាន ប្រធាននាយកដ្ឋានសមាគម និងគណបក្សនយោបាយនៃក្រសួងមហាផ្ទៃ ប្រាប់ភ្នំពេញប៉ុស្តិ៍នៅថ្ងៃទី ២៤ វិច្ឆិកាថា បច្ចុប្បន្នគណបក្សដែលបានចុះបញ្ជីត្រឹមត្រូវនៅក្រសួងមហាផ្ទៃមានចំនួន ៤៦ រីឯគណបក្សថ្មីមួយទៀតកំពុងត្រួតពិនិត្យ ហើយនេះមិននិយាយដល់គណបក្សបេះដូងជាតិរបស់លោក សៀម ភ្លុក ទេ។
លោកបន្តថា ការចុះបញ្ជីគណបក្ស «កម្ពុជានិយម» នេះក្រសួងមហាផ្ទៃបានធ្វើពីថ្ងៃទី ២៣ ខែវិច្ឆិកា ឆ្នាំ ២០២១ រីឯគណបក្សថ្មីមួយទៀតនៅខ្វះឯកសារហើយក្រសួងបានឱ្យយកទៅបំពេញឡើងវិញ និងកំពុងកែតម្រូវឯកសារនោះ។
ទោះជាយ៉ាងណា លោកមិនទាន់ដឹងថា មានគណបក្សនយោបាយថ្មីប៉ុន្មានទៀតដែលត្រៀមដាក់ពាក្យសុំចុះបញ្ជីនោះទេ។
លោក យ៉ែម បុញ្ញឫទ្ធិ ស្ថាបនិកគណបក្ស «កម្ពុជានិយម» បានប្រាប់ភ្នំពេញប៉ុស្តិ៍នៅថ្ងៃទី ២៤ ខែវិច្ឆិកា ឆ្នាំ ២០២១ ថា ការទទួលបានលិខិតចុះបញ្ជីត្រឹមត្រូវពីក្រសួងមហាផ្ទៃជាព័ត៌មានមួយដ៏ល្អដែលអាចឱ្យគណបក្សរៀបចំបេក្ខជនសម្រាប់ចូលរួមបោះឆ្នោតនាពេលខាងមុខនេះ បើទោះបីស្ថិតក្នុងរយៈពេលខ្លីក៏ដោយ។
យ៉ាងណាក្ដី លោក បុញ្ញឫទ្ធិ បានថ្លែងថា បើនិយាយពីតថភាពជាក់ស្តែងនៃគណបក្សនយោបាយនៅកម្ពុជាបច្ចុប្បន្ននេះគឺពិតជាមានការលំបាកដោយសារមានគណបក្សថ្មីចាស់ច្រើនចូលរួមប្រកួត ប៉ុន្តែក្នុងនាមជាអ្នកនយោបាយ និងក្នុងនាមគណបក្សនយោបាយ គឺត្រូវតែមានចំណុចចាប់ផ្តើម និងបន្តបេសកកម្មទៅមុខទៀត។
លោកបានបញ្ជាក់ថា៖ «ដូច្នេះ យើងនឹងខិតខំឱ្យអស់លទ្ធភាពក្នុងការរៀបចំរចនាសម្ព័ន្ធ និងការផ្សព្វផ្សាយទស្សនៈ គោលនយោបាយ និងចក្ខុវិស័យរបស់គណបក្សក្នុងការចូលរួមប្រកួតប្រជែងសម្រាប់ការបោះឆ្នោតនាពេលខាងមុខ»។
បើតាមលោក យ៉ែម បុញ្ញឫទ្ធិ ថ្វីដ្បិតគណបក្ស «កម្ពុជានិយម» ទើបបង្កើតថ្មីក៏ពិតមែន ប៉ុន្តែបើនិយាយពីការគិតគូរគោលនយោបាយ និងការចងក្រងរចនាសម្ព័ន្ធគឺត្រូវបានអនុវត្ត និងបំពេញអស់រយៈពេលជាយូរឆ្នាំមកហើយ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា ការបង្កើតគណបក្សថ្មីៗនៅកម្ពុជាមុនការបោះឆ្នោតនេះបានបង្ហាញពីលម្ហនយោបាយដែលពលរដ្ឋ និងអ្នកនយោបាយមានសិទ្ធិបង្កើតគណបក្សឱ្យតែផ្អែកតាមគោលការណ៍ច្បាប់ និងស្មារតីនៃរដ្ឋធម្មនុញ្ញ។
លោកបន្តថា គណបក្សនយោបាយថ្មីៗក៏ត្រូវបានបង្កើតឡើង រីឯគណបក្សចាស់ៗក៏កំពុងឃើញធ្វើសកម្មភាពនៅតាមមូលដ្ឋានជាហូរហែ។ ដូច្នេះវាជាសញ្ញាវិជ្ជមានមួយបង្ហាញពីភាពរស់រវើកនៃដំណើរការប្រជាធិបតេយ្យនៅកម្ពុជា។
លោកថ្លែងថា៖ «វាអត់ជាបញ្ហាចោទទេ ហើយវាក៏បង្ហាញឱ្យឃើញពីលម្ហនយោបាយ លម្ហសេរីភាព របស់ប្រជាពលរដ្ឋ និងរបស់អ្នកនយោបាយនៅក្នុងប្រទេសកម្ពុជាមិនមែនដូចការលើកឡើងពីការរឹតត្បិតលម្ហនយោបាយ និងសង្គមស៊ីវិលនោះទេ។ មួយទៀតសុំកុំប្រកាន់ទស្សនៈមួយថា លុះត្រាតែមានគណបក្សនេះ ឬគណបក្សនោះទើបបានហៅថា មានប្រជាធិបតេយ្យគឺអត់ទេ»។
លោក គិន ភា ពន្យល់ថាក្នុងវិស័យនយោបាយឱ្យតែមានគណបក្សចាប់ពី ២ ឡើងចូលរួមប្រកួតបោះឆ្នោតគឺគេហៅពហុបក្សហើយ ប៉ុន្តែការទទួលបានសំឡេង ឬអាសនៈក្នុងរដ្ឋសភាវាចំណុះលើពលរដ្ឋគាំទ្រ ហើយនៅពេលគណបក្សមួយជាប់ឆ្នោតជាឯកបក្ស មិនមែនបន្ទោសប្រព័ន្ធនយោបាយទេគឺពលរដ្ឋជាអ្នកសម្រេចចិត្តទេ។
យ៉ាងណាក្ដី កាលពីថ្ងៃទី ១៦ វិច្ឆិកា ក្រសួងមហាផ្ទៃធ្លាប់បានបដិសេធចុះបញ្ជីគណបក្ស «បេះដូងជាតិ» ដោយសំអាងថា ការផ្ដិតមេដៃដើម្បីគាំទ្រដំណើរការសុំច្បាប់មានចេតនាទុច្ចរិតដោយមានការផ្ដិតជំនួស។ ក៏ប៉ុន្តែករណីនេះត្រូវបានស្ថាបនិកគណបក្សនេះគឺលោក សៀម ភ្លុក ថា គណបក្សកំពុងរៀបចំប្ដឹងក្រសួងមហាផ្ទៃទៅតុលាការកំពូល៕
វីដេអូ៖
