.jpg)
ការបង្រៀនអ្នកជាប់ឃុំនៅសៀមរាបកន្លងមក។ រូបថត The Life Cambodia
ភ្នំពេញៈ អង្គការជីវិតនៅកម្ពុជា (This Life Cambodia) ចុះហត្ថលេខាលើអនុស្សរណៈជាមួយក្រសួងសង្គមកិច្ច អតីតយុទ្ធជន និងយុវនីតិសម្បទាលើកម្មវិធីបង្វែរកុមារជាអនីតិជនចេញពីពន្ធនាគារមកមណ្ឌលយុវនីតិសម្បទាដែលនឹងចាប់ផ្តើមនៅឆ្នាំក្រោយ ដើម្បីធានាថា ពួកគេដែលមានទំនាស់នឹងច្បាប់មានសិទ្ធិទទួលបានការអភិវឌ្ឍខ្លួនតាមរយៈការបន្តការសិក្សា ការបណ្តុះបណ្តាលជំនាញវិជ្ជាជីវៈ និងបំណិនជីវិត ជាដើម។
បើតាមសេចក្ដីប្រកាសព័ត៌មានស្ដីពីការចុះហត្ថលេខាលើអនុស្សរណៈនេះកាលពីថ្ងៃទី ២២ ខែវិច្ឆិកា បានឱ្យដឹងថា កុមារភាគច្រើនដែលមានអាយុពី ១៤ ដល់ ១៨ ឆ្នាំហើយកំពុងរស់នៅក្នុងពន្ធនាគារនៅកម្ពុជាគឺដោយសារតែការចោទប្រកាន់ ឬការផ្តន្ទាទោសលើបទល្មើសតូចតាចដែលស្ថិតក្នុងកម្រិតទាប ប៉ុន្ដែមានហានិភ័យខ្ពស់ ដូចជាការប្រើប្រាស់គ្រឿងញៀន ការលក់ថ្នាំញៀនឱ្យមិត្តភក្តិ ឬបទលួចតូចតាចជាដើម។
ប្រសិនបើកុមារទាំងនេះមិនត្រូវបានផ្តល់ការគាំទ្រក្នុងដំណាក់កាលដំបូងដែលជាពេលសំខាន់ក្នុងការអភិវឌ្ឍរបស់ពួកគេទេនោះពួកគេនឹងអាចប្រព្រឹត្តបទល្មើសសាជាថ្មីនាពេលអនាគត ដោយសារពួកគេដាច់ចេញឆ្ងាយពីទំនាក់ទំនងជាមួយគ្រួសារ និងសហគមន៍។ នេះបើតាមសេចក្ដីប្រកាសព័ត៌មាន។
ប្រភពដដែលបញ្ជាក់ថា «កម្មវិធីបង្វែរយុវជនរបស់អង្គការជីវិតនៅកម្ពុជាមានគោលបំណងធានាថា អនីតិជនដែលមានទំនាស់នឹងច្បាប់មានសិទ្ធិទទួលបានការអភិវឌ្ឍខ្លួន និងការគាំទ្រផ្សេងៗតាមតម្រូវការរបស់ខ្លួនជាក់ស្តែង ដែលជាវិធីសាស្ត្រជំនួសឱ្យការដាក់ឃុំឃាំង។
វិធីសាស្ត្រទាំងនេះនឹងអនុញ្ញាតឱ្យអនីតិជនបន្តការសិក្សារបស់ពួកគេ ឬទទួលបានការបណ្តុះបណ្តាលវិជ្ជាជីវៈ និងបំណិនជីវិត។ ទាំងនេះ គឺជាធាតុសំខាន់ក្នុងការផ្តល់នូវក្តីសង្ឃឹមសម្រាប់ការងារអាជីព និងប្រាក់ចំណូលសម្រាប់អនាគតរបស់ពួកគេ»។
លោក Billy Gorter នាយកប្រតិបត្តិអង្គការជីវិតនៅកម្ពុជាថ្លែងថា អស់រយៈពេល ១២ ឆ្នាំកន្លងមកនេះ អង្គការជីវិតនៅកម្ពុជាបាន និងកំពុងអនុវត្តកម្មវិធីដែលធ្វើការជាមួយមនុស្សវ័យក្មេងដែលកំពុងអនុវត្តទោស។ អង្គការជីវិតនៅកម្ពុជា បានជួយកាត់បន្ថយអត្រាវិលចូលពន្ធនាគារវិញមកនៅក្រោម ២% ក្នុងរយៈពេល ៦ ខែ ក្រោយការដោះលែង។
លោកបន្តថា៖ «យើងតែងតែដឹងថាមានឱកាសក្នុងការការពារដែលអាចជួយរក្សាកុមារពីពន្ធនាគារតាំងពីដំបូង។ កិច្ចសហការរវាងអង្គការជីវិតនៅកម្ពុជា និងក្រសួងសង្គមកិច្ច អតីតយុទ្ធជន និងយុវនីតិសម្បទានឹងអនុវត្តបទប្បញ្ញត្តិទាំងឡាយដែលបានចែងក្នុងច្បាប់យុត្តិធម៌អនីតិជន ព្រមទាំងផ្តល់នូវវិធានជំនួសបញ្ចៀសពីការជាប់ពន្ធនាគារ»។
លោក Gorter បានឱ្យដឹងថា មានភ័ស្តុតាង និងការសិក្សាជាច្រើនបង្ហាញថា ការបង្វែរគឺជាដំណោះស្រាយជាក់ស្តែង និងមានប្រសិទ្ធភាពជាអនេកសម្រាប់កុមារទំនាស់នឹងច្បាប់ ជាជាងការឃុំឃាំង។ ការបង្វែរសម្រេចបាននូវអត្រានៃការវិលចូលក្នុងពន្ធនាគារវិញមានកម្រិតទាប បើប្រៀបធៀបទៅនឹងដំណើរការផ្លូវការរបស់តុលាការ។
បើតាមសេចក្ដីប្រកាសព័ត៌មានដដែល កម្មវិធីនេះត្រូវបានបង្កើតឡើង បន្ទាប់ពីអង្គការជីវិតនៅកម្ពុជាបានសិក្សាស្រាវជ្រាវថ្មីមួយដែលមានចំណងជើងថា «មិនមែនជាកន្លែងសម្រាប់កុមារ» ដើម្បីជួយគាំទ្រដល់រាជរដ្ឋាភិបាលសម្រេចបាននូវផែនការយុទ្ធសាស្ត្រក្នុងការកាត់បន្ថយអត្រាប្រព្រឹត្តបទល្មើសឡើងវិញរបស់យុវជន និងកាត់បន្ថយភាពចង្អៀតណែនក្នុងពន្ធនាគារ។
អង្គការជីវិតនៅកម្ពុជាបញ្ជាក់ថា «វិធីសាស្ត្ររបស់យើងទទួលបានជោគជ័យច្រើនលើសលប់ដោយ ៨៦% នៃអ្នកចូលរួមក្នុងកម្មវិធីរបស់យើងទទួលបានការងារ បន្ទាប់ពីការដោះលែង។
អត្រាវិលចូលពន្ធនាគារវិញបានធ្លាក់ចុះពី ៦០% មកត្រឹមតែ ២% ក្នុងរយៈពេល ៦ ខែ បន្ទាប់ពីការដោះលែង»។
លោក តូច ចាន់នី អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា បានឱ្យដឹងថា ក្រសួងនឹងសម្ពោធដាក់ឱ្យដំណើរការមណ្ឌលយុវនីតិសម្បទាសម្រាប់អនីតិជនជាប់ពន្ធនាគារនៅឃុំបារគូ ស្រុកកណ្ដាលស្ទឹង ខេត្តកណ្ដាលនាចុងខែធ្នូឆ្នាំនេះ ដើម្បីបង្វែរជនជាប់ឃុំជាអនីតិជនទៅកាន់មណ្ឌលនេះដែលអាចដាក់អនីតិជនបានជាង ១ ពាន់នាក់។
ក៏ប៉ុន្ដែលោកបញ្ជាក់ថា ជំហានដំបូងក្រសួងគ្រោងបង្វែរអនីតិជនប្រមាណ ៥០ នាក់ មកមណ្ឌលនេះ ដើម្បីស្ទាបស្ទង់លើការអនុវត្ដកម្មវិធីបង្វែរនេះ។
លុះដល់ឆ្នាំបន្ទាប់ ចំនួនអនីតិជនដែលត្រូវបង្វែរពីពន្ធនាគារមកមណ្ឌលនេះនឹងកើនឡើងដល់ប្រមាណ ៤០០ នាក់ ឬលើសពីនេះ ស្របពេលដែលរបាយការណ៍របស់អគ្គនាយកដ្ឋានពន្ធនាគារ បង្ហាញថា បច្ចុប្បន្នជនជាប់ឃុំជាអនីតិជននៅទូទាំងប្រទេសកម្ពុជាមានចំនួន ១ ៤៤៩ នាក់។
លោកថ្លែងថា៖ «ការងារបង្វែរអនីតិជននេះ គឺអាស្រ័យលើបទពិសោធនៃការអនុវត្ដផ្ទាល់របស់មន្ដ្រីរបស់យើង ព្រោះការងារនេះគឺជាការងារថ្មីក្នុងការអនុវត្ដរបស់មន្ដ្រីយើង»៕
