.jpg)
សកម្មភាពប្រមូលផលស្រូវនៅខេត្តកំពង់ស្ពឺ ក្នុងខែនេះ។ រូបថត ក្រសួងកសិកម្ម
ភ្នំពេញៈ ការប្រមូលផលស្រូវរដូវវស្សាឆ្នាំនេះសម្រេចបានប្រមាណ ៤០% នៃផ្ទៃដីដាំដុះសរុបជាង ២,៩ លានហិកតាដោយទទួលបានបរិមាណផលសរុបជាង ២,៨ លានតោនលើសកាលពីឆ្នាំមុនជាង ៨៥ ម៉ឺនតោន។ រីឯទិន្នផលគិតជាមធ្យមមានជាង ៣,៥ តោនក្នុង ១ ហិកតា។ នេះបើតាមទិន្នន័យដែលផ្ដល់ឱ្យដោយមន្ត្រីនាំពាក្យនៃក្រសួងកសិកម្មកាលពីថ្ងៃទី ២៣ ខែវិច្ឆិកា ឆ្នាំ ២០២១។
លោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ប្រាប់ភ្នំពេញប៉ុស្តិ៍ថា៖ «យោងតាមទិន្នន័យដែលផ្ដល់ឱ្យពីបណ្ដាខេត្តទាំងអស់នៅទូទាំងប្រទេសគិតត្រឹមថ្ងៃទី ១០ ខែវិច្ឆិកា ឆ្នាំ ២០២១ ការប្រមូលផលស្រូវរដូវវស្សាឆ្នាំនេះ សម្រេចបានចំនួន ៨១៤ ២៣៤ ហិកតា លើផ្ទៃដីអនុវត្តសរុប ២ ៩០១ ៦០៥ ហិកតា ដោយទទួលបានបរិមាណផលសរុបចំនួន ២ ៨៦១ ១៣៤ តោន លើសឆ្នាំមុន ៨៥៦ ៤៧៦ តោន។ ទិន្នផលគិតជាមធ្យម ៣,៥១៤ តោនក្នុង ១ ហិកតា»។
ជុំវិញការប្រមូលផលស្រូវរដូវវស្សានេះផងដែរ ប្រជាកសិករមួយចំនួនបាននាំគ្នាច្រូតកាត់ក្នុងទឹកដោយសារតែតំបន់វាលស្រែរបស់ពួកគេបានរងការជន់លិចដោយជំនន់ទឹកភ្លៀង។
ប្រជាកសិករនៅភូមិអន្លង់ស្វាយសង្កាត់បឹងធំ ខណ្ឌកំបូល រាជធានីភ្នំពេញ លោក សំ ទូច បានប្រាប់ភ្នំពេញប៉ុស្តិ៍ថា នៅភូមិរបស់លោក ទឹកមិនទាន់ស្រកអស់នៅឡើយទេ ប៉ុន្តែនៅថ្ងៃទី ២២ ខែវិច្ឆិកា បែរជាមានភ្លៀងធ្លាក់ ១ មេធំបន្ថែមទៀត ធ្វើឱ្យផ្លូវនៅក្នុងភូមិលិចទឹក និងបែកភក់រកធ្វើដំណើរមិនកើត។ ចំណែកស្រូវដែលទុំរៀបនឹងប្រមូលផលហើយនោះក៏ត្រូវទឹកលិចអស់ទៀត។
លោក សំ ទូច បាននិយាយថា៖ «ស្រូវទុំ ដែលបានលិចត្រាំនៅក្នុងទឹកយូរថ្ងៃ ងាយនឹងស្អុយរលួយ ដូច្នេះហើយទើបគ្រួសារខ្ញុំ និងអ្នកភូមិមួយចំនួនបាននាំគ្នាចុះច្រូតស្រូវក្នុងទឹក។ ទោះជាលំបាកបន្តិចក្ដីតែអាចប្រមូលផលបានខ្លះសម្រាប់ដោះស្រាយការខ្វះខាតក្នុងជីវភាព»។
លោកបានបន្តថា៖ «ការប្រមូលផលស្រូវនៅក្នុងទឹកមិនងាយស្រួលឡើយ។ គ្រាប់ស្រូវប្រមាណ ៥០ ភាគរយត្រូវខូច ឬជ្រុះធ្លាក់ចូលទៅក្នុងទឹក នៅពេលច្រូតកាត់»។
បើតាម លោក សំ ទូច ការប្រមូលផលស្រូវនៅក្នុងទឹកមិនងាយស្រួលឡើយ។ គ្រាប់ស្រូវប្រមាណ ៥០ ភាគរយត្រូវខូច ឬជ្រុះធ្លាក់ចូលទៅក្នុងទឹក នៅពេលច្រូតកាត់ និងដឹកជញ្ជូនវាពីស្រែមកផ្ទះ។
យ៉ាងណាក៏ដោយ លោក ស្រី វុឌ្ឍី បានថ្លែងថាឆ្លើយតបទៅនឹងផលប៉ះពាល់ និងការខូចខាតពីគ្រោះធម្មជាតិកន្លងមកនេះក្រសួងកសិកម្ម រុក្ខាប្រមាញ់ និងនេសាទ បានណែនាំដល់មន្ទីរកសិកម្ម រុក្ខាប្រមាញ់ និងនេសាទ រាជធានី ខេត្តទាំងអស់ឱ្យខិតខំជំរុញការស្តារឡើងវិញនូវការខូចខាតដំណាំកសិកម្មដោយគ្រោះទឹកជំនន់រដូវវស្សាឆ្នាំនេះក្នុងគោលបំណង «ធានាបានសន្តិសុខស្បៀង និងការនាំចេញ»។
លោកបានបន្តថា ជាមួយគ្នានេះ ក្រសួងកសិកម្ម រុក្ខាប្រមាញ់ និងនេសាទ នៅតែបន្តលើកទឹកចិត្តដល់កសិករឱ្យចូលរួមចំណែកកាត់បន្ថយចំណាយក្នុងផលិតកម្មរបស់ខ្លួនដោយប្រើប្រាស់ថាមពលពន្លឺព្រះអាទិត្យដែលជាសក្តានុពល និងសមស្របបំផុតដែលអាចប្រើប្រាស់បានក្នុងការងារផលិតកម្ម ការអភិវឌ្ឍបច្ចេកវិទ្យាសមស្រប ការបញ្ជ្រាបការប្រើប្រាស់បច្ចេកវិទ្យាទំនើបដោយមានការចូលរួមសហការ ជាមួយវិស័យឯកជន និងភាគីពាក់ព័ន្ធដទៃទៀតឱ្យមានភាពទូលំទូលាយសំដៅផ្តល់អត្ថប្រយោជន៍សម្រាប់សេដ្ឋកិច្ចជាតិ។
លោកបានប្រាប់ឱ្យដឹងផងដែរថា នៅពេលនេះ ប្រជាកសិករនៅតាមបណ្ដាខេត្តមួយចំនួនកំពុងសាបព្រោះពូជស្រូវ និងភ្ជួររាស់ដីស្រែរបស់ពួកគេ ដើម្បីត្រៀមរៀបចំបង្កបង្កើនផលស្រូវរដូវប្រាំងសម្រាប់ឆ្នាំ ២០២២ ខាងមុខនេះជាបណ្ដើរៗរួចជាស្រេចផងដែរ។
លោកបានបញ្ជាក់ថា៖ «ជារួមមកទល់ពេលនេះ ការងារបង្កបង្កើនផលស្រូវរដូវប្រាំងឆ្នាំ ២០២១-២០២២ អនុវត្តបានចំនួន ៧០ ១២៥ ហិកតា ស្មើនឹង ១៥,១៧% នៃផែនការ ៤៦២ ២៨០ ហិកតា»។
បើតាមលោក វុឌ្ឍី ក្រៅពីការបង្កបង្កើនផលស្រូវរដូវប្រាំងសម្រាប់ឆ្នាំ ២០២២ ប្រជាកសិករក៏បានចាប់ផ្ដើមដាំដុះដំណាំសាកវប្បកម្ម និងដំណាំឧស្សាហកម្មរដូវប្រាំងឆ្នាំ ២០២២ ផងដែរ។ ក្នុងនោះផ្ទៃដីដាំដុះដំណាំសាកវប្បកម្ម រួមមាន ល្ង ពោតស ដំឡូងជ្វា បន្លែគ្រប់មុខ និងឪឡឹក អនុវត្តបាន ២ ៧០០ ហិកតា ស្មើនឹង ៧,៥៥% នៃផែនការ ៣៥ ៧៦០ ហិកតា តិចជាងឆ្នាំមុន ១ ៧៣៤ ហិកតា ខណៈផ្ទៃដីដាំដុះដំណាំឧស្សាហកម្ម ដូចជា ពោតក្រហម ដំឡូងមី សណ្ដែកបាយ សណ្ដែកដី អំពៅ និងថ្នាំជក់) អនុវត្តបានចំនួន ៥ ២៣៨ ហិកតា ស្មើនឹង ៥,៨៣% នៃផែនការ ៨៩ ៨១០ ហិកតា លើសឆ្នាំមុន ១ ១៦៤ ហិកតា៕
