The Phnom Penh Post Search

Search form




Logo of Phnom Penh Post newspaper Phnom Penh Post - ចិនតៃវ៉ាន់​ម្នាក់​ត្រូវ​តុលាការ​កំពូល​តម្កល់​ទោស​ ២៨ ​ឆ្នាំ​ដដែល ពី​បទ​ដឹកជញ្ជូន​គ្រឿងញៀន​ឆ្លងដែន

ចិនតៃវ៉ាន់​ម្នាក់​ត្រូវ​តុលាការ​កំពូល​តម្កល់​ទោស​ ២៨ ​ឆ្នាំ​ដដែល ពី​បទ​ដឹកជញ្ជូន​គ្រឿងញៀន​ឆ្លងដែន

Content image - Phnom Penh Post
ចិនតៃវ៉ាន់​ម្នាក់​ ត្រូវ​តុលាការ​កំពូល​តម្កល់​ទោស​ ២៨ ​ឆ្នាំ​ដដែល ពី​បទ​ដឹកជញ្ជូន​គ្រឿងញៀន​ឆ្លងដែន។ គឹម សារុំ

ចិនតៃវ៉ាន់​ម្នាក់​ត្រូវ​តុលាការ​កំពូល​តម្កល់​ទោស​ ២៨ ​ឆ្នាំ​ដដែល ពី​បទ​ដឹកជញ្ជូន​គ្រឿងញៀន​ឆ្លងដែន

ភ្នំពេញៈ តុលាការ​កំពូល​នៅ​ថ្ងៃទី​ ២៤ ​វិច្ឆិកា​បានប្រកាស​សាលដីកា​សម្រេច​តម្កល់​ទោស បុរស​ចិនតៃវ៉ាន់​ម្នាក់​ឱ្យ​ជាប់ពន្ធនាគារ​ ២៨ ​ឆ្នាំ​ដដែល​ក្នុង​បទ​ចោទ​ដឹកជញ្ជូន​គ្រឿងញៀន​ហេរ៉ូអ៊ីន​ឆ្លងដែន​ខុសច្បាប់ បន្ទាប់ពី​បើក​​សវនាការ​ជំនុំជម្រះ​បាន​រយៈ​ ១ ​ម៉ោង​ក្រោយមក​។

លោក​ចៅក្រម សឹង បញ្ញាវុឌ្ឍ ប្រធាន​ក្រុមប្រឹក្សា​ជំនុំជម្រះ​បាន​អាន​សាលា​ដីកា នៅ​ចំពោះមុខ​ជនជាប់ចោទ​នៅ​ថ្ងៃទី​ ២៤ វិច្ឆិកា ថា ក្រោយពី​បាន​ស្តាប់​សេចក្តី​សន្និដ្ឋាន​របស់​លោក ឆៃ រ៉ាន់នូ មេធាវី​ការពារ​សិទ្ធិ​ឱ្យ​ជន​ជាប់ចោទ​ ក្រោយពី​បាន​ស្តាប់​ការសន្និដ្ឋាន​របស់លោក ច័ន្ទ តារារស្មី តំណាង​មហាអយ្យការ​មក ក្រុមប្រឹក្សា​ជំនុំជម្រះ​នៃ​តុលាការ​កំពូល​យល់ឃើញថា បុរស​ឈ្មោះ WANG KUOLIN អាយុ​ ២៩ ​ឆ្នាំ​បាន​ទទួលស្គាល់ថា រូបគេ​ពិតជា​បាន​ប្រព្រឹត្ត​ខុស​មែន​។

ប៉ុន្តែ​ខ្លួន​ធ្វើបែបនេះ ព្រោះតែ​ចង់យក​លុយ​ដែល​បាន​ពី​ការស៊ីឈ្នួល​ជួញដូរ​គ្រឿងញៀន​នេះ យក​ទៅ​ផ្គត់ផ្គង់​ជីវភាព​គ្រួសារ​នៅ​កោះតៃវ៉ាន់​។ ជនជាប់ចោទ បាន​ប្រាប់​តុលាការ​ថា រូបគេ​មាន​ម្តាយ​ចាស់ជរា​គ្មាន​អ្នកថែរក្សា ទើប​ស្នើសុំ​តុលាការ​កំពូល​សម្រាល​ទោស​ខ្លះ​ដល់​រូបគេ​។ ជនសង្ស័យ​ក៏​បាន​សហការ​ជាមួយ​តុលាការ មិនដែល​ឆ្លើយ​លាក់លៀម ជាមួយ​តុលាការ ហើយ​ជនសង្ស័យ​ជួញដូរ​គ្រឿងញៀន​នេះ ដោយសារ​តែ​គេ​បង្ខំ​តែប៉ុណ្ណោះ​។

ប៉ុន្តែ​លោក​ថា​៖ «​អ្វីដែល​ជនជាប់ចោទ​លើកឡើង​នេះ​តុលាការ​កំពូល​មិនអាច​ពិចារណា​ជូន​បានទេ​។ ព្រោះ​ដូច​តំណាង​មហាអយ្យការ ធ្វើការ​សន្និដ្ឋាន​ហើយ​ថា សមត្ថកិច្ច​បាន​ចាប់​ជន​ជាប់ចោទ​ជាមួយ​វត្ថុតាង​គ្រឿងញៀន​ជាក់ស្តែង ដូច្នេះ​តុលាការ​កំពូល​សម្រេច​ឃុំខ្លួន​ជនជាប់ចោទ​បន្តទៀត​»​។

យោងតាម​អង្គហេតុ​បង្ហាញថា កាលពី​វេលា​ម៉ោង​ប្រមាណ​ ១០ ​ព្រឹក​ថ្ងៃទី​ ៨ មេសា ឆ្នាំ​ ២០០៨ ជនសង្ស័យ WANG KUOLIN បានធ្វើ​ដំណើរ​តាម​យន្តហោះ ពី​កោះ​តៃវ៉ាន់​មក​កម្ពុជា​។ ពេល​ដល់​ព្រលានយន្តហោះ​អន្តរជាតិ​ភ្នំពេញ ជនសង្ស័យ​មាន​លក្ខណៈខុស​ប្រក្រតី​។ ឃើញ​ដូច្នោះ​សមត្ថកិច្ច​បាន​ឆែកឆេរ ឃើញ​គ្រឿងញៀន​ប្រភេទ​ហេរ៉ូអ៊ីន​ ២ ១៥០ ​ក្រាម រុំ​ជាប់​នឹង​ខ្លួន​របស់​ជន​ជាប់ចោទ​ហើយក៏​ឃាត់ខ្លួន​តែម្តង​។

សំណុំ​រឿងនេះ​ត្រូវបាន​សាលាដំបូង​រាជធានី​ភ្នំពេញ​នៅ​ថ្ងៃទី​ ១៨ ខែ​មិនា ឆ្នាំ​ ២០០៩ ​សម្រេច​ផ្តន្ទាទោស​ជនជាប់ចោទ​ដាក់​ពន្ធនាគារ​ ២៨ ​ឆ្នាំ និង​ពិន័យ​ប្រាក់​ចូល​រដ្ឋ​ចំនួន​ ៧០ ​លាន​រៀល​។ ជនជាប់ចោទ​មិន​សុខចិត្ត​ក៏​ប្តឹងទៅ​សាលាឧទ្ធរណ៍ រាជធានី​ភ្នំពេញ តែ​ត្រូវ​ឧទ្ធរណ៍​ប្រកាស​សាលដីកា​នៅ​ថ្ងៃទី​ ២៦ ​មិនា ឆ្នាំ​ ២០២១ ដោយ​តម្កល់​សាលក្រម​របស់​សាលាដំបូង​ឱ្យ​នៅ​ដដែល​។ បន្ទាប់ពី​មិន​សុខចិត្ត​នឹង​សាលដីកា​នេះ​ជនជាប់ចោទ ក៏​ប្តឹងទៅ​តុលាការ​កំពូល​បន្តទៀត​៕

អត្ថបទគួរចាប់អារម្មណ៍