.jpg)
កញ្ចប់គ្រឿងញៀនដែលសមត្ថកិច្ចខេត្តស្ទឹងត្រែង ចាប់បានក្រោយដឹកឆ្លងដែនតាមទូកចូលមកកម្ពុជា។ រូបថត ប៉ូលិស
ស្ទឹងត្រែងៈ កម្លាំងសមត្ថកិច្ចនគរបាលខេត្តស្ទឹងត្រែងអះអាងថា នឹងសហការជាមួយសមត្ថកិច្ចឡាវស្វែងរកជនសង្ស័យដែលនាំគ្រឿងញៀនឆ្លងដែនចូលមកកម្ពុជាបន្ទាប់ពីនគរបាលការពារព្រំដែនគោកលេខ៧០១ល្បាតនិងឃាត់បានគ្រឿងញៀនចំនួន ១៧០ ដុំនៅលើទូក ខណៈជនល្មើសរត់គេចខ្លួនបាត់កាលពីយប់ ២៤ ខែវិច្ឆិកា ។
លោក ផៃ រស្មី ស្នងការរងទទួលផែនប្រឆាំងបទល្មើសគ្រឿងញៀនខេត្តស្ទឹងត្រែងថ្លែងនៅរសៀលថ្ងៃទី ២៥ ខែវិច្ឆិកាថា សមត្ថកិច្ចកំពុងបន្តនីតិវិធីដែលដំបូងត្រូវបើកកញ្ចប់វត្ថុតាងថ្នាំញៀនដើម្បីត្រួតពិនិត្យជាក់ស្តែង ហើយនៅពេលឃើញចំនួនប្រាកដប៉ុន្មាននឹងបន្តសហការជាមួយភាគីសមត្ថកិច្ចឡាវស្រាវជ្រាវទាំងសងខាងដើម្បីស្វែងរកជនសង្ស័យយកមកផ្តន្ទាទោសតាមច្បាប់។ លោកថ្លែងថា៖ «យើងនឹងធ្វើគ្រប់នីតិវិធីទាំងអស់ ដើម្បីស្វែងរកចាប់ជនសង្ស័យពាក់ព័ន្ធទាំងនោះយកមកផ្តន្ទាទោសតាមច្បាប់» ។
លោកស្នងការរងទទួលផែនប្រឆាំងបទល្មើសគ្រឿងញៀនបានឲ្យដឹងទៀតថា មុនពេលចាប់បានគ្រឿងញៀនទាំងនោះ នគរបាលការពារព្រំដែនគោគលេខ ៧០១ បានល្បាតតាមដងទន្លេមេគង្គ។ ពេលប្រទះឃើញទូក ១ គ្រឿង បើកឆ្លងពីកោះស្តាំប្រទេសឡាវ ចូលមកចំណុចកោះល្ង ឃុំព្រះរំកិល ស្រុកបុរីអូរស្វាយសែនជ័យ នៅវេលម៉ោង៧យប់ សមត្ថកិច្ចក៏បានឃាត់សួរនាំ ដើម្បីពិនិត្យស្រាប់តែជនសង្ស័យបានរត់គេចខ្លួននៅពេលទូកទៅដល់ច្រាំង។
លោកបានថ្លែងថា៖«ពេលឃើញកម្លាំងល្បាតយើងបើកបរទូកទៅជិតហើយសួរថា ដឹកអី គាត់ថា ដឹកធ្យូង អ៊ីចឹងយើងសុំឱ្យឈប់ដើម្បី ពិនិត្យមើល ដល់ពេលទូកបុកច្រាំងពួកគេក៏រត់គេចខ្លួនបាត់ទៅ»។
លោក ផៃ រស្មី បញ្ជាក់ថា ករណីនេះមិនមែនសមត្ថកិច្ចបណ្តោយឱ្យជនសង្ស័យរត់គេចខ្លួននោះទេ ប៉ុន្តែដោយសារតែការល្បាតចល័តនៅលើទឹកមានភាពស្មុគស្មាញ។ នៅពេលឃើញជនល្មើសជិះទូក សមត្ថកិច្ចនៅមិនទាន់អាចកំណត់ភ្លាមៗបានថាមានផ្ទុកបទល្មើសនោះទេ ក្រោយឃាត់ពិនិត្យទើបដឹងថា ពាក់ព័ន្ធបទល្មើសគ្រឿងញៀន។
លោកបានបញ្ជាក់បន្ថែមថា ជនសង្ស័យមានគ្នា ២ នាក់ ចំណែកវត្ថុតាងមានគ្រឿងញៀនមេតំហ្វេតាមីនចំនួន ១០ ការុង ស្មើនឹង ១៧០ ដុំ។នៅរសៀលថ្ងៃទី ២៥ ខែវិច្ឆិកា សមត្ថកិច្ចកំពុងបើកកញ្ចប់វត្ថុតាងដើម្បីថ្លឹងឲ្យដឹងចំនួនគ្រឿងញៀន ហេតុនេះនៅមិនទាន់អាចបញ្ជាក់បានថា មានចំនួនប៉ុន្មានគីឡូឲ្យប្រាកដនោះទេ។
យោងតាមសេចក្តីប្រកាសព័ត៌មានរបស់ក្រសួងមហាផ្ទៃកាលពីថ្ងៃទី ២២ ខែវិច្ឆិកា ឆ្នាំនេះ បង្ហាញថា លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញចូលរួមធ្វើជាសហប្រធានដឹកនាំកិច្ចប្រជុំវាយតម្លៃលទ្ធផលកិច្ចសហប្រតិបត្តិការឆ្នាំ ២០២០-២០២១ និងបានចុះហត្ថលេខាលើកំណត់ហេតុស្តីពីកិច្ចសហប្រតិបត្តិការឆ្នាំ ២០២២ ជាមួយលោកឧត្តមសេនីយ៍ឯក វីល័យ ឡាខាំហ្វង រដ្ឋមន្ត្រីក្រសួងសន្តិសុខសាធារណៈនៃសាធារណរដ្ឋប្រជាធិបតេយ្យប្រជាមានិតឡាវតាមរយៈប្រព័ន្ធវីដេអូសន្និសីទពីចម្ងាយ។
ក្នុងឱកាសនោះភាគីទាំង ២ បានពង្រីកនូវទំនាក់ទំនងនិងកិច្ចសហប្រតិបត្តិការកាន់តែសកម្មដោយបានឯកភាពបន្តបង្កើន និងពង្រឹងបន្ថែមនូវយន្តការសហប្រតិបត្តិការបង្ក្រាបសកម្មភាពជួញដូរគ្រឿងញៀនខុសច្បាប់ព្រមទាំងពង្រីកវិសាលភាពការផ្លាស់ប្តូរព័ត៌មាន ដើម្បីបង្ការទប់ស្កាត់ និងបង្ក្រាបសកម្មភាពជួញដូរ ដឹកជញ្ជូនគ្រឿងញៀនខុសច្បាប់ ដែលកើតឡើងតាមបណ្ដោយព្រំដែន។
ជាមួយគ្នានោះក៏បានឯកភាពបន្តបង្កើនការគ្រប់គ្រង និងត្រួតពិនិត្យតាមបណ្ដោយព្រំដែនក្នុងដែនសមត្ថកិច្ចរៀងៗខ្លួន និងចាត់វិធានការទាន់ពេលវេលាក្នុងការទប់ស្កាត់ និងបង្ក្រាបបទល្មើសឆ្លងដែនគ្រប់ប្រភេទ។ ជាពិសេសការលួចឆ្លងដែនខុសច្បាប់ បទល្មើសព្រៃឈើ ការទន្ទ្រានកាប់ព្រៃធ្វើការដាំដុះ និងការបរបាញ់សត្វដោយខុសច្បាប់ និងសកម្មភាពផ្សេងទៀតដែលផ្ទុយនឹងបទប្បញ្ញត្តិព្រំដែន៕
