បាត់ដំបងៈ នគរបាលប្រឆាំងការជួញដូរមនុស្ស និងការពារអនីតិជន ខេត្តបាត់ដំបងបញ្ជូនយុវជនសង្ស័យ ៣ នាក់ទៅសាលាដំបូងខេត្តបាត់ដំបង នៅថ្ងៃទី ២៥ វិច្ឆិកា បន្ទាប់ពីឃាត់ខ្លួនបាន៣ថ្ងៃករណីព្រួតគ្នារំលោភក្មេងស្រីម្នាក់អាយុ ១៥ ឆ្នាំ ប្រព្រឹត្តនៅឃុំ រស្មីសង្ហា ស្រុករតនមណ្ឌល ខេត្តបាត់ដំបង។
លោកស្រីឧត្តមសេនីយ៍ត្រី រស់ ជីវី ស្នងការរងទទួលផែនការងារនគរបាលប្រឆាំងការជួញដូរមនុស្សនៃស្នងការដ្ឋាននគរបាលខេត្តបាត់ដំបងឱ្យ ភ្នំពេញ ប៉ុស្តិ៍ ដឹងនៅរសៀលថ្ងៃទី ២៥ វិច្ឆិកាថា ជនសង្ស័យទាំង ៣ នាក់ ទី១- ឈ្មោះ ពៅ សម្បត្តិ អាយុ ២១ ឆ្នាំ រស់នៅភូមិ -ឃុំ រស្មីសង្ហា ស្រុករតនមណ្ឌល,ទី២- ឈ្មោះ រុណ ឆាយ អាយុ ១៧ ឆ្នាំ រស់នៅភូមិ បាដាកជើង ឃុំរស្មីសង្ហា ស្រុករតនមណ្ឌល និងទី៣- ឈ្មោះ សាន់ ហាន់ណាហ្វី អាយុ ២០ ឆ្នាំ រស់នៅភូមិអូរឃ្មុំ ឃុំរស្មីសង្ហា ស្រុករតនមណ្ឌល ខេត្តបាត់ដំបង។ ពួកគេត្រូវបានសមត្ថកិច្ចជំនាញរបស់លោកស្រីបញ្ជូនទៅសាលាដំបូងខេត្តបាត់ដំបងនៅរសៀលថ្ងៃទី ២៥ វិច្ឆិកា។
លោកស្រីថា៖ «តាមពិតទៅនីតិវិធីគឺយើងបានបញ្ជូនក្រុមជនសង្ស័យទៅតុលាការតាំងពីថ្ងៃទី ២៤ វិច្ឆិកា ប៉ុន្តែខាងតុលាការបានផ្ញើពួកគេទុកនៅស្នងការដ្ឋាន ១ ថ្ងៃទៀត។ អ៊ីចឹងនៅល្ងាចថ្ងៃនេះ (ថ្ងៃទី ២៥ វិច្ឆិកា) យើងបញ្ជូនពួកគាត់ទៅតុលាការម្តងទៀត។ ប៉ុន្តែលទ្ធផលចោទប្រកាន់យើងអត់ទាន់ដឹងទេ»។
លោក ប៊ន់ វណ្ណារ៉ា នាយការិយាល័យប្រឆាំងការជួញដូរមនុស្ស និងការពារអនីតិជនខេត្តបាត់ដំបងប្រាប់នៅរសៀលថ្ងៃទី ២៥ វិច្ឆិកា ថា ក្មេងស្រីរងគ្រោះឈ្មោះ ន.ស អាយុ ១៥ ឆ្នាំ រស់នៅឃុំ រស្មីសង្ហា ក្នុងស្រុករតនមណ្ឌល បានស្គាល់គ្នាជាមួយជនសង្ស័យម្នាក់ក្នុងចំណោម ៣ នាក់ ព្រោះនាងធ្លាប់រៀនជាមួយគ្នាកាលពីឆ្នាំ ២០១៩។ នៅថ្ងៃទី ១៩ វិច្ឆិកា ឆ្នាំ ២០២១ មានពិធីមង្គលការមួយនៅក្នុងស្រុករតនមណ្ឌលតាំងពីម៉ោង ១ រសៀលរហូតដល់ម៉ោង ១២ យប់ថ្ងៃដដែល។ នៅពេលនោះក្រុមជនសង្ស័យបានអង្គុយហូបអាហាររួមតុជាមួយក្មេងរងគ្រោះ និងជាមួយកូនកំលោះកូនក្រមុំផង។
លោកថ្លែងថា៖ «រឿងនេះក្រុមជនសង្ស័យបានសារភាពអស់ហើយគឺថា ពួកគាត់នាំគ្នារំលោភក្មេងស្រីម្នាក់ម្តងៗ។ អ៊ីចឹងករណីនេះកសាងសំណុំរឿងបញ្ជូនពួកគេទៅតុលាការ»។
លោកបន្តថា ក្រោយពីរួមគ្នាហូបអាហារអស់ចិត្ត ទាំងកូនកំលោះកូនក្រមុំ និងក្រុមជនសង្ស័យរួមទាំងក្មេងរងគ្រោះផងបាននាំគ្នាទៅហូបស៊ុបនៅផ្ទះរបស់កូនកំលោះម្តងទៀត។ បន្ទាប់មកកូនកំលោះកូនក្រមុំបាននាំគ្នាត្រឡប់ទៅផ្ទះវិញ។ នៅពេលនោះក្រុមជនសង្ស័យបានលួងលោមក្មេងរងគ្រោះចូលដេកផ្ទះសំណាក់យីហោឈ្មោះ ឌូឌូ ស្ថិតនៅភូមិស្តៅ ឃុំស្តៅ ស្រុករតនមណ្ឌល ហើយក្រុមជនសង្ស័យបានចាប់នាងរំលោភបានសម្រេចម្នាក់ម្តងនៅក្នុងបន្ទប់ផ្ទះសំណាក់នោះ។
លោកបានរៀបរាប់ថា ជនសង្ស័យទាំង៣នាក់ខាងលើត្រូវបានឪពុករបស់ក្មេងស្រីរងគ្រោះប្តឹងកាលពីថ្ងៃទី ២២ វិច្ឆិកា។ បន្ទាប់ពីទទួលបានបណ្តឹងមកលោកបានរាយការណ៍ជូនលោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង និងបានចុះឃាត់ខ្លួនពួកគេនៅថ្ងៃទទួលបណ្តឹងនោះ៕