ភ្នំពេញៈ ស្រី្តខ្មែរចំនួន ២ នាក់ ដែលរស់នៅខុសច្បាប់នៅប្រទេសចិន ត្រូវបានមន្ត្រីស្ថានអគ្គកុងស៊ុលកម្ពុជាប្រចាំទីក្រុងឆងឈីង សហការជាមួយអាជ្ញាធរចិនបញ្ជូនត្រឡប់មកកម្ពុជាវិញ។
លោក កុយ គួង រដ្ឋលេខាធិការនិងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិបានឱ្យដឹងថាស្ថានអគ្គកុងស៊ុលកម្ពុជាប្រចាំទីក្រុងឆុងឈីងប្រទេសចិន នៅថ្ងៃទី ២៥ ខែ វិច្ឆិកា ឆ្នាំ ២០២១ បានសហការជាមួយអាជ្ញាធរចិន សម្របសម្រួលបញ្ជួនស្ត្រីខ្មែរចំនួន ២ រូប ដែលរស់នៅខុសច្បាប់ក្នុងប្រទេសចិនឱ្យវិលត្រឡប់ទៅប្រទេសកម្ពុជាវិញ។
លោកបានញ្ជាក់ថា៖ «ស្ត្រីទាំង ២ រូប មកដល់អាកាសយានដ្ឋានអន្តរជាតិភ្នំពេញនៅវេលាម៉ោង ១៥ និង ៣៥ រសៀលថ្ងៃដដែល»។
លោក ឃុន ថារ៉ូ អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស (សង់ត្រាល់) បានថ្លែងថា កន្លងមកយើងឃើញថា ស្ថានទូតកម្ពុជានៅទីនោះ មានការជួយជ្រោមជ្រែងច្រើនទាក់ទងនឹងការធ្វើសមាហរណកម្មជួយជនរងគ្រោះដែលជារឿងមួយល្អ។
លោកថា៖«ក្នុងករណីនេះយើងគិតថាស្ថានទូតដើរតួនាទីសំខាន់ណាស់ក្នុងការផ្តល់កិច្ចអន្តរាគមន៍សេវាដើម្បីសង្គ្រោះជនរងគ្រោះហើយកន្លងមកយើងក៏ឃើញថាមានការបញ្ជូនអ្នករងគ្រោះមកជាហូរហែ ដោយមានកិច្ចអន្តរាគមន៍ពីខាងស្ថានទូត»។
លោកបានបន្តថា ការដែលសំខាន់លោកចង់ឃើញជនរងគ្រោះទាំងនោះទទួលបានការស្តារនីតិសម្បទា ការផ្តល់សេវា ដើម្បីឱ្យគាត់អាចវិលចូលសហគមន៍វិញ បន្ទាប់ពីស្ថានទូតកម្ពុជាជួយសង្គ្រោះឱ្យត្រឡប់មកកម្ពុជាវិញ។
ជាមួយគ្នានេះដែរលោកស្នើឱ្យអាជ្ញាធរមានសមត្ថកិច្ចជាពិសេសក្រសួងសង្គមកិច្ចអតីតយុទ្ធជននិងយុវនីតិសម្បទាសហការជាមួយសង្គមស៊ីវិលដើម្បីធានាជនរងគ្រោះដែលគាត់បញ្ជូនមកវិញ ត្រូវបានស្តារនីតិសម្បទា។
លោកថា៖ «ជួយជនរងគ្រោះក្នុងករណីដែលគាត់មានការប៉ះពាល់ផ្នែកស្មារតីឬការគាំទ្រផ្នែកសេដ្ឋកិច្ចដើម្បីឱ្យគាត់អាចធ្វើសមាហរណកម្មនៅក្នុងសហគមន៍ឱ្យគាត់មានលទ្ធភាពក្នុងការប្រកបរបរ ដើម្បីធានាថាពួកគាត់មិនត្រូវបានប្រឈមទៅនឹងការជួញដូរម្តងទៀត»។
បន្ថែមពីនេះលោកលើកទឹកចិត្តដល់ស្ថានទូតកម្ពុជាប្រចាំបរទេសសហការជាមួយសង្គមស៊ីវិលដើម្បីធ្វើកិច្ចការនេះរួមគ្នាដោយលោកថាករណីខ្លះជនរងគ្រោះក៏បានទាក់ទងមកសង្គមស៊ីវិលដើម្បីជួយអន្តរាគមន៍ដែរ ប៉ុន្តែជួបការលំបាកក្នុងការទំនាក់ទំនងជនរងគ្រោះ។
លោក កុយ គួង អ្នកនាំពាក្យក្រសួងការបរទេសធ្លាប់បានឱ្យដឹងថា រយៈពេល៦ខែ ដោយគិតពីខែមករា ដល់ខែមិថុនា ឆ្នាំ ២០២១ ស្ត្រីកម្ពុជាដែលបានជួយសង្គ្រោះពីប្រទេសចិន សរុបមាន២៣០នាក់៕