The Phnom Penh Post Search

Search form




Logo of Phnom Penh Post newspaper Phnom Penh Post - សមាគម​សិ​ល្បៈ​សុវណ្ណ​ភូមិ បានរៀបចំ​ព្រឹត្តិការណ៍​សម្ដែង​ទម្រង់​សិ​ល្បៈ «ល្ខោន​ស្រមោល​ស្បែក​ធំ» ឡើង​វិញ​

សមាគម​សិ​ល្បៈ​សុវណ្ណ​ភូមិ បានរៀបចំ​ព្រឹត្តិការណ៍​សម្ដែង​ទម្រង់​សិ​ល្បៈ «ល្ខោន​ស្រមោល​ស្បែក​ធំ» ឡើង​វិញ​

Content image - Phnom Penh Post
ការ​សម្តែង​ល្ខោន​ស្រមោល​ស្បែក​ធំកាលពី​ឆ្នាំ​២០១៦។ ហុង មិនា

សមាគម​សិ​ល្បៈ​សុវណ្ណ​ភូមិ បានរៀបចំ​ព្រឹត្តិការណ៍​សម្ដែង​ទម្រង់​សិ​ល្បៈ «ល្ខោន​ស្រមោល​ស្បែក​ធំ» ឡើង​វិញ​

ភ្នំពេញៈ ដោយមាន​ការគាំទ្រ​ពី​ក្រសួង​វប្បធម៌ និងវិចិត្រ​សិ​ល្បៈ នៅ​រាត្រី​ថ្ងៃទី ២៥ ខែវិច្ឆិកា សមាគម​សិ​ល្បៈ​សុវណ្ណ​ភូមិ សហការ​ជាមួយ​សាលា​មធ្យម​វិចិត្រ​សិ​ល្បៈ បានរៀបចំ​ព្រឹត្តិការណ៍​សម្ដែង​ទម្រង់​សិ​ល្បៈ «ល្ខោន​ស្រមោល​ស្បែក​ធំ» នៅ​សាល​មហោស្រប​ នៃ​សាលា​ធ្យ​ម​វិចិត្រ​សិ​ល្បៈ ដែលមាន​ទីតាំង​នៅក្នុង​ខណ្ឌ​សែន ខណៈ​ការឆ្លង​រាល​ដាល​នៃ​ជំងឺ​កូវីដ​ ១៩​​ មានការ​ថយ​ចុះ​​។

លោក ម៉ាន់ កុសល ប្រធាន​សមាគម​សិ​ល្បៈសុវណ្ណ​ភូមិ បាន​ប្រាប់​ ភ្នំពេញ​ ប៉ុស្តិ៍​ថា​ សមាគម​របស់លោក បាន​ខកខាន​ ការសម្ដែង​នូវ​ទម្រង់​សិ​ល្បៈ​ល្ខោន​ស្រមោល​ស្បែក​ធំ​នេះ ជាង ១ ឆ្នាំ​មកហើយ ដោយសារតែ​វិបត្តិ​នៃ​ការឆ្លង​រីក​រាលដាល​ជំងឺ​កូ​វីដ ១៩។

​នៅ​ថ្ងៃទី ២៥ ខែ វិច្ឆិកា ឆ្នាំ ២០២១ នេះ ជា​ថ្ងៃ​អបអរសាទរ​ខួប​លើក​ទី១៦ នៃ​ការដាក់បញ្ចូល​នូវ​ទម្រង់​សិ​ល្បៈ​ «ល្ខោន​ស្រមោល​ស្បែក​ធំកម្ពុជា» ចូលទៅក្នុង​បញ្ជី​បេតិកភណ្ឌ​វប្បធម៌​អរូបី​នៃ​មនុស្សជាតិ របស់​អង្គការ​យូណេស្កូ ទើប​សមាគម​របស់លោក ក្រោម​កិច្ចសហការ​ចូលរួម គាំទ្រ​ពីសា​លា​មធ្យម​វិចិត្រ​សិ​ល្បៈ និង​ក្រសួង​វប្បធម៌​វិចិត្រ​សិ​ល្បៈ រៀបចំ​សម្ដែង​សិ​ល្បៈ​ល្ខោន​ស្រមោល​ស្បែក​ធំ នេះ​ជា​សាធារណៈ​ឡើងវិញ។

លោក​បញ្ជាក់ថា៖ «ការសម្ដែង​សិ​ល្បៈ​ល្ខោន​ស្រមោល​ស្បែក​ធំ របស់​សមាគម​យើងខ្ញុំ​នៅពេលនេះ គឺ​ចង់បង្ហាញ​ទស្សនិកជន ជាតិ​និង​អន្តរជាតិ​ ឱ្យ​បាន​ស្គាល់​កាន់តែច្បាស់​ថែមទៀត ពី​មរតក​នៃ​ទម្រង់​សិ​ល្បៈ​បុរាណ​ខ្មែរ​ ដើម្បី​ទុក្ខ​ជា​ប្រយោជន៍​សម្រាប់​មនុស្សជាតិ​ជំនាន់​ក្រោយ​បាន​សិក្សា​រៀនសូត្រ និង​បន្ត​ថែរក្សា​នូវ​គុណ​តម្លៃ​នៃ​មរតក​វប្បធម៌​សិ​ល្បៈ​មួយ​នេះ​បាន​ឋិត​នៅ​គង់វង្ស​ជា​រៀងរហូត​ទៅ»។

បើតាម​លោក​ កុសល​ ក្នុងអំឡុងពេល​នៃ​ការសម្ដែង​ល្ខោន​ស្រមោល​ស្បែក​ធំ​នេះ នឹងមាន​ការថត​ផ្សាយ​បន្ត​ផ្ទាល់​នៅតាម​បណ្ដាញ​សង្គម​របស់​សមាគម​សិ​ល្បៈ​សុវណ្ណ​ភូមិ បណ្ដាញ​សង្គម​របស់​សាលា​មធ្យម​វិចិត្រ​សិ​ល្បៈ និង បណ្ដាញ​សង្គម​របស់​ក្រសួង​វប្បធម៌ និង​វិចិត្រ​សិ​ល្បៈ​ផងដែរ។

លោក​បាន​ថ្លែងថា៖«តាមរយៈ​ការសម្ដែង​ផ្ទាល់​ជា​សាធារណៈ និងការថត​ផ្សាយ​បន្ត​ផ្ទាល់​តាម​ប្រព័ន្ធ​បណ្ដាញ​សង្គម​នេះ យើង​រំពឹងថា នឹងមាន​ការចូលរួម​គាំទ្រ​ទស្សនា ច្រើន​កុះករ​ ពី​បងប្អូន​ប្រជាពលរដ្ឋ​របស់​យើង ពិសេស​ពី​យុវជន»។

ជុំវិញ​ថ្ងៃ​ប្រារព្ធ​ខួប​លើក​ទី១៦ នៃ​ការដាក់បញ្ចូល​នូវ​ទម្រង់​សិ​ល្បៈ«ល្ខោន​ស្រមោល​ស្បែក​ធំ កម្ពុជា» ចូលទៅក្នុង​បញ្ជី​បេតិកភណ្ឌ​វប្បធម៌​អរូបី​នៃ​មនុស្សជាតិ របស់​អង្គការ​យូណេស្កូ​នេះ​ផងដែរ លោក ស៊ី​យ៉ុ​ន សុភា​រិ​ទ្ធ អគ្គនាយក នៃ​អគ្គនាយកដ្ឋាន​បច្ចេកទេស​បេតិកភណ្ឌ​វប្ប​ធម៌ នៃ​ក្រសួង​វប្បធម៌ និង វិចិត្រ​សិ​ល្បះ បាន​ប្រាប់​ភ្នំពេញ​ប៉ុស្តិ៍​ថា នៅក្នុង​បរិបទ​នៃ​ជំងឺ​កូ​វីដ១៩ ការបើក​ឱ្យ​មានការ​សម្ដែង​នៅតាម​ទី​មណ្ឌល​សាធារណៈ គឺ ត្រូវ​ធ្វើ​ឡើង​​ស្របទៅតាម​ស្ដង់ដា​សុខាភិបាល ដែល​បានកំណត់។

លោក​ថ្លែងថា៖«ជាការ​ពិត នៅពេលនេះ​ស្ថានភាព​នៃ​ជំងឺ​កូ​វីដ-១៩ នៅ​កម្ពុជា​យើង គឺ បាន​ធូរស្រាល​ជាបណ្ដើរៗហើយ។ ប៉ុន្តែ​យើង​ត្រូវ​បន្ត​អនុវត្ត​វិធានការ៣កុំ ៣ការពារ ឱ្យ​បាន​ខ្ជាប់ខ្ជួន ។ ដូច្នេះ​ទើប​ក្រសួង​គាំទ្រ​ឱ្យសមាគម​សិ​ល្បៈ​សុវណ្ណ​ភូមិ ដែលជា​អ្នក​អភិរក្ស​ល្ខោន​ស្រមោល​ស្បែក​ធំ បើក​សម្ដែង​ឡើងវិញ នៅក្នុង​បរិវេណ​មួយ ដែលមាន​ការគ្រប់គ្រង នូវ​ស្ដង់ដា​សុខាភិបាល​បានល្អ»។

បើតាម​ លោក​ កុសល​ ការរក្សា​ការពារ​បេតិកភណ្ឌ​វប្បធម៌​អរូបី គឺជា​ការទទួលខុសត្រូវ​របស់​សហគមន៍ ដោយ​មាន​​ការគាំទ្រ​លើកទឹកចិត្ត​ពី​អាជ្ញាធរ​មូលដ្ឋាន និង ស្ថាប័ន​ជំនាញ​ពាក់ព័ន្ធ។

ចំណែក​ការរក្សា​ការពារ​បេតិកភណ្ឌ​វប្បធម៌​រូបី គឺជា​ការទទួលខុសត្រូវ​របស់​រដ្ឋាភិបាល។ ដូច្នេះ​សហគមន៍ ដែល​បានទទួល​នូវ​មរតក​វប្បធម៌​អរូបី​ ល្ខោន​ស្រមោល​ស្បែក​ធំ នេះ​គប្បី ប្រឹងប្រែង​អភិរក្ស និង អភិវឌ្ឍន៍​ទំនើបកម្ម​លើ​វិស័យនេះ​បន្ថែមទៀត​ ដើម្បី​ផលប្រយោជន៍​របស់​សហ​គម​ន៍ ហើយ​ក្រសួង​នឹង​បន្ត​គាំទ្រ​និង​លើកទឹកចិត្ត​បន្ថែម​ក្នុងការ​ផ្សព្វផ្សាយ​ពង្រីក​នូវ​ស្នាដៃ​វប្បធម៌​សិ​ល្បៈ​អរូបី​នេះ។

លោក​បាន​ឱ្យ​ដឹងផង​ដែរ​ថា សិល្បៈ​ល្ខោន​ស្រមោល​ស្បែក​ធំ មាន​ប្រវត្តិ និង​អាយុកាល​ជា​យូរលង់​ណាស់​មកហើយ​ លើទឹក​ដី​នៃ​ព្រះរាជាណាចក្រ​កម្ពុជា ត្រូវបាន​សកលលោក​ទ​ទួល​ស្គាល់ និង​ឱ្យ​តម្លៃ​ថា​ ជា​សម្បត្តិ​មនុស្សជាតិ​ដ៏​អស្ចារ្យ និង​បានដាក់​បញ្ចូល ជា​បេតិកភណ្ឌ​ពិភពលោក​ ខាង​បេតិកភណ្ឌ​បញ្ចេញ​សំឡេង និង​អរូបិយ​​របស់​មនុស្សជាតិ របស់​អង្គការ​យូណេស្កូ នៅ​ថ្ងៃទី២៥ ខែវិច្ឆិកា ឆ្នាំ២០០៥។

ជុំវិញ​ប្រវត្តិ និងរបៀប​នៃ​ការសម្ដែង​សិ​ល្បៈ​ល្ខោន​ស្រមោល​ស្បែក​ធំ​នេះ​ផងដែរ លោក ភី​ម មាឃ អនុប្រធាន​សមាគម​សិ​ល្បៈ​សុវណ្ណ​ភូមិ បាន​ប្រាប់​ភ្នំពេញ​ប៉ុស្តិ៍​ថា ទម្រង់​សិ​ល្បៈ​ល្ខោន​ស្រោ​ល​ស្បែក​ធំ​នេះ ត្រូវបាន​គេ​ហៅ​ម្យ៉ាង​ទៀតថា «ណាំងស្បែក​ធំ» ហើយ​វា​ជា​សិល្បៈ​ស្រមោល​មួយបែប ដែល​ប្រើប្រាស់​ផ្ទាំង​រូប​ឆ្លាក់​ពី​ស្បែក​សត្វធំៗដូចជា​ស្បែក​គោ ស្បែក​ក្របី​មក​សម្តែង​ជា​ឈុត​ឆាក​សាច់រឿង ហើយ​រូប​ឆ្លាក់​ពី​ស្បែក​សត្វ​ទាំងនោះ​ត្រូវគេ​ដាប់​និង​ឆ្លាក់​ជា​រូប​អាទិទេព ដែល​ភាគច្រើន​ជា​រឿង​បែប​ព្រហ្ម​ញ្ញសាសនា។

លោក មាឃ បាន​បន្ថែមថា ៖«ដោយសារ​ទម្រង់​សិ​ល្បៈ​នេះ​ជា​ប្រភេទ ល្ខោន​ស្រោ​ល ដូច្នេះ​ការសម្ដែង​ចាំបាច់ ធ្វើឡើង​នៅពេល​យប់ ឬ នៅ​ទី​ងងឹត​ដែលមាន​បរិវេណ​ធំ​ទូលាយ ដូចជា​នៅ​វាលស្រែ និង​ទីវ​ត្ត​អារាម​ហើយ​សិល្បៈ​នេះ សម្តែង​លើ​ផ្ទាំង​ក្រណាត់​ធំ ដែល​ត្រូវគេ​លាត​ជា​លក្ខណៈ​បញ្ឈរ​ឡើងលើ។

ក្រៅពី​ផ្ទាំង​ឆ្លាក់​ពី​ស្បែក និង​ក្រណាត់ស គេ​ត្រូវ​ប្រើ​ភ្លើង​ដើម្បី​ជះ​ទៅលើ​ផ្ទាំង​ក្រណាត់ស។

នៅ​សម័យ​ដើម​គេ​យក​ចន្លុះ ឬ​ត្រឡោក​ដូង មក​ដុត​ជា​ភ្លើង។ ប៉ុន្តែ​បច្ចុប្បន្ននេះ គេ​យក​អំពូល​ភ្លើង​អគ្គិសនី ឬ​ប្រើ​ម៉ាស៊ីន LCD Projector ដើម្បី​បញ្ចាំង​ស្រមោល​ផ្ទាំង​ស្បែក​ឱ្យ​ទៅ​ប៉ះ​នឹង​ផ្ទាំង​ក្រណាត់ស។

ការសម្តែង​សិល្បៈ​នេះ ត្រូវ​អម​ជាមួយនឹង​ការប្រគំ​ភ្លេងខ្មែរ​ដូចជា​វង់ភ្លេង​ពិណពាទ្យ និង​ការ​និទានរឿង ឬ​ពោល​ប្រាប់​រឿង៕

អត្ថបទគួរចាប់អារម្មណ៍