.jpg)
ក្មេងស្រីដែលទទួលរងអំពើហិង្សាពីមេបញ្ជាការប៉េអឹមក្រុងក្រចេះពីខែមុន។ រូប សហការី
ភ្នំពេញៈ ក្រសួងកិច្ចការនារី និងមជ្ឈមណ្ឌលសិទ្ធិមនុស្សកម្ពុជា (មសមក) បានប្រកាសធ្វើយុទ្ធនាការ ១៦ ថ្ងៃ ដើម្បីចូលរួមបញ្ឈប់អំពើហិង្សាលើស្ត្រី និងក្មេងស្រី ដោយយុទ្ធនាការនេះ ចាប់ផ្តើមពីថ្ងៃទី ២៥ វិច្ឆិកា ដល់ថ្ងៃទី ១០ ធ្នូ។ នៅក្នុងយុទ្ធនាការនេះ ភាគីពាក់ព័ន្ធនឹងបង្ហាញការប្តេជ្ញាចិត្តរបស់ពួកគេក្នុងការការពារ និងបញ្ឈប់អំពើហិង្សាលើស្ត្រី និងក្មេងស្រី។
ក្រសួងកិច្ចការនារីបានប្រកាសនៅលើទំព័រហ្វេសប៊ុករបស់ខ្លួននៅថ្ងៃទី ២៥ វិច្ឆិកាថា ក្រសួងនឹងធ្វើយុទ្ធនាការ ១៦ ថ្ងៃនេះ ដើម្បីចូលរួមបញ្ឈប់អំពើហិង្សាលើស្ត្រី និងក្មេងស្រី ដោយយុទ្ធនាការនេះ ចាប់ផ្តើមពីថ្ងៃទី ២៥ វិច្ឆិកា ដល់ថ្ងៃទី ១០ ធ្នូ ឆ្នាំ ២០២១។
ក្រសួងកិច្ចការនារីបានបញ្ជាក់ថា ក្នុងសកម្មភាពយុទ្ធនាការនេះក្រសួងនឹងបង្កើតកម្មវិធីប្រកួតប្រជែងមួយចំនួន ដើម្បីផ្តល់ឱកាសដល់យុវជន និងធ្វើការផ្សព្វផ្សាយសារអប់រំនានា ដើម្បីចូលរួមលុបបំបាត់អំពើហិង្សាលើស្ត្រីក្នុងនោះក៏មានកម្មវិធីប្រកួតប្រជែងផលិតវីដេអូស្តីពី «សុខភាពផ្លូវចិត្តវ័យជំទង់» ផងដែរ។
លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីបានថ្លែងថា ការរួមគ្នាបញ្ឈប់អំពើហិង្សាលើស្ត្រី និងក្មេងស្រី គឺជាគោលដៅរួម និងបេសកកម្មរួមគ្នារបស់យើងទាំងអស់គ្នា ហើយសកម្មភាពទាំងនេះនឹងអាចធ្វើបាន មិនថាវិស័យសាធារណៈរបស់រដ្ឋ ឯកជន អង្គការសង្គមស៊ីវិល និងសហគមន៍នោះទេ។ លោកស្រីបានសង្កត់ធ្ងន់ថា៖ «ពិភពលោកពណ៌ទឹកក្រូច បញ្ចប់អំពើហិង្សាលើស្ត្រី និងក្មេងស្រី ចាប់ពីថ្ងៃនេះ»។
ជាមួយគ្នានេះ មជ្ឈមណ្ឌលសិទ្ធិមនុស្សកម្ពុជា នៅថ្ងៃទី ២៤ វិច្ឆិកាក៏បានចេញសេចក្តីប្រកាសព័ត៌មានមួយដែរថា នៅថ្ងៃទី ២៥ ខែវិច្ឆិកា គឺជាទិវាអន្តរជាតិ ដើម្បីបំបាត់អំពើហិង្សាទៅលើស្ត្រី។ ដើម្បីប្រារព្ធទិវានេះ មសមក ផ្ដួចផ្ដើមយុទ្ធនាការមួយដែលមានឈ្មោះថា «សកម្មភាព ១៦ ថ្ងៃ ដើម្បីបញ្ចប់អំពើហិង្សាផ្អែកទៅលើយេនឌ័រ» ដែលចាប់ផ្តើមពីថ្ងៃទី ២៥ ខែវិច្ឆិកា រហូតដល់ទិវាសិទ្ធិមនុស្សថ្ងៃទី ១០ ខែធ្នូ ឆ្នាំ ២០២១។
អង្គការនេះបានបន្តថា អំពើហិង្សាទៅលើស្ត្រីគឺជាការរំលោភបំពានមួយនៃការរំលោភបំពានសិទិ្ធមនុស្សដែលកើតមានធ្ងន់ធ្ងរបំផុតក្នុងពិភពលោកនៅពេលបច្ចុប្បន្ន ហើយក៏ជាបញ្ហាប្រឈមសម្រាប់កម្ពុជាផងដែរ ខណៈតាមការប៉ាន់ស្មាន មានស្ត្រីខ្មែរម្នាក់ក្នុងចំណោម ៥ នាក់ ទទួលរងអំពើហិង្សាពីដៃគូរបស់ពួកគេដែលចំនួននេះត្រូវបានគេជឿជាក់ថា បានកើនឡើងចាប់តាំងពីការរីករាលដាលនៃជំងឺកូវីដ ១៩។
មសមក ក៏បានប្រកាសផងដែរថា មសមក នឹងចូលរួមក្នុងយុទ្ធនាការនេះ ដើម្បីលើកកម្ពស់ការយល់ដឹងអំពីសិទ្ធិស្ត្រី និងផលប៉ះពាល់នៃអំពើហិង្សាទាក់ទងនឹងយេនឌ័រនៅក្នុងសហគមន៍ និងអំពាវនាវដល់រាជរដ្ឋាភិបាលកម្ពុជា ចាត់វិធានការឱ្យបានច្បាស់លាស់ និងទាន់ពេលវេលា ដើម្បីបញ្ចប់អំពើហិង្សាទាក់ទងនឹងយេនឌ័រនៅកម្ពុជា។ មសមក រំពឹងថា៖ «នៅក្នុងថ្ងៃសំខាន់ៗទាំងនេះ ជាឱកាសសម្រាប់ភាគីពាក់ព័ន្ធ ជាពិសេសអ្នកជាប់កាតព្វកិច្ច ពោលគឺរដ្ឋាភិបាល និងតួអង្គសង្គមស៊ីវិល បង្ហាញការប្តេជ្ញាចិត្តរបស់ពួកគេឡើងវិញ ក្នុងការការពារ និងលើកកម្ពស់សិទ្ធិមនុស្ស»។
បើតាមសេចក្តីប្រកាសដដែលរបស់ មសមក ឱ្យដឹងទៀតថា នៅក្នុងអំឡុងពេលយុទ្ធនាការនោះ មសមក ក៏នឹងចូលរួមក្នុងទិវាសំខាន់ៗមួយចំនួនផ្សេងទៀត នៅក្នុងប្រតិទិននៃទិវាសិទ្ធិមនុស្ស ដែលមានថ្ងៃទី ២៨ ខែវិច្ឆិកា ថ្ងៃទី ៩ ខែធ្នូ និងថ្ងៃទី ១០ ខែធ្នូ ជាទិវាសិទ្ធិមនុស្ស ដែលជាថ្ងៃដ៏សំខាន់ ដើម្បីប្រារព្ធខួបនៃសេចក្តីប្រកាសជាសកលស្តីពីសិទ្ធិមនុស្ស ដែលជាឯកសារគោលនៃក្របខ័ណ្ឌសិទ្ធិមនុស្សអន្តរជាតិ និងមានចែងពីសិទ្ធិជាមូលដ្ឋានសម្រាប់មនុស្សគ្រប់គ្នា។
តាម មសមក ប្រធានបទនៃទិវាសិទ្ធិមនុស្សសម្រាប់ឆ្នាំ ២០២១ គឺត្រូវបានប្រកាស «សមភាព ៖ កាត់បន្ថយវិសមភាព តាមរយៈការជំរុញការគោរពសិទ្ធិមនុស្ស ដែលជាឱកាសសម្រាប់សង្គមស៊ីវិល ក៏ដូចជា មសមក បន្តចូលរួមក្នុងការលុបបំបាត់វិសមភាពនៅក្នុងប្រទេសកម្ពុជា និងធ្វើការតស៊ូមតិ ដើម្បីសិទ្ធិស្មើគ្នា សម្រាប់ទាំងអស់គ្នា»៕
