ភ្នំពេញៈ បេក្ខជន ៣ រូបក្នុងចំណោម ៥ រូប ឈ្នះជយលាភីក្នុងការប្រកួតវគ្គផ្ដាច់ព្រ័ត្រក្នុងកម្មវិធីប្រកួតនិយាយសាធារណៈលើប្រធានបទ «ហេតុអ្វីបានជាកម្ពុជាចាំបាច់ត្រូវដំឡើងពន្ធថ្នាំជក់» ខណៈក្រសួងពាក់ព័ន្ធចំនួន ៣ បង្ហាញបំណងរួមគ្នាគាំទ្រការដំឡើងពន្ធលើផលិតផលថ្នាំជក់។
នៅថ្ងៃទី ២៥ វិច្ឆិកា បេក្ខជនចំនួន ៥ រូបបានបង្ហាញសមត្ថភាពរបស់ខ្លួន ដោយបាននិយាយជាសាធារណៈលើប្រធានបទនេះ ដើម្បីឈ្នះជយលាភីពីលេខ ១ ដល់លេខ ៣ ដែលទទួលបានទឹកប្រាក់ចន្លោះ ពី ៨ សែនរៀល ដល់ ២ លានរៀល និងពានរង្វាន់ ១។ បេក្ខជនទាំង ៣ ដែលបានឈ្នះការប្រកួត គឺមានបេក្ខជន សយ ស្រីនិច្ច ទទួលបានចំណាត់ថ្នាក់លេខ ១ បេក្ខជនតុន ច័ន្ទរិទ្ធ ទទួលបានចំណាត់ថ្នាក់លេខ ២ និងបេក្ខជន សៀក ពេជ្ររចនា ទទួលបានចំណាត់ថ្នាក់លេខ ៣។
អង្គការចលនាដើម្បីសុខភាពកម្ពុជាឱ្យដឹងក្នុងសេចក្តីប្រកាសព័ត៌មាននាថ្ងៃទី ២៥ វិច្ឆិកា ថា តាមរយៈការបកស្រាយរបស់បេក្ខជន ការជក់បារីបង្កឱ្យមានជំងឺផ្សេងៗជាច្រើន។ ជាពិសេស បណ្ដាលឱ្យខូចសួត និងប្រឈមនឹងគ្រោះថ្នាក់ដល់អាយុជីវិតកាន់តែធ្ងន់ធ្ងរ បើពួកគេឆ្លងជំងឺកូវីដ ១៩។ ម្យ៉ាងទៀតការជក់បារី ក៏បង្កើនឱកាសនៃការឆ្លងជំងឺកូវីដ ១៩ ដោយសារការប៉ះពាល់ផ្ទាល់ រវាងដៃ មាត់ និងបារី ធ្វើឱ្យមានហានិភ័យខ្ពស់ក្នុងការឆ្លង។
អង្គការនេះបន្តថា យុវជនជយលាភីទាំងនោះក៏បានជំរុញឱ្យមានការដំឡើងពន្ធថ្នាំជក់ដែលជា វិធានការឈ្នះ ឈ្នះដើម្បីឆ្លើយតបនឹងជំងឺកូវីដ ១៩ និងសេដ្ឋកិច្ចជាតិ។
អង្គការនេះបញ្ជាក់ថា៖ «មួយវិញទៀត ហេតុផលដែលត្រូវដំឡើងពន្ធ គឺដោយសារអត្រាពន្ធថ្នាំជក់នៅកម្ពុជាមានកម្រិតទាបខ្លាំងណាស់ ត្រឹមតែ ២៨% ប៉ុណ្ណោះ ធៀបទៅនឹងប្រទេសអាស៊ាន ដូចជា ប្រ៊ុយណេ ឥណ្ឌូនេស៊ី ម៉ាឡេស៊ី ភូមា សិង្ហបុរី ហ្វីលីពីន ថៃ សុទ្ធតែមានអត្រាពន្ធលើផលិតផលថ្នាំជក់ លើស ៥០% ធៀបតម្លៃលក់រាយ»។
លោក មុំ គង់ នាយកប្រតិបត្តិអង្គការចលនា ដើម្បីសុខភាពកម្ពុជា និយាយថា ជាក់ស្ដែងតាមការបកស្រាយរបស់បេក្ខជន វិធានការដំឡើងពន្ធថ្នាំជក់ជួបប្រទះឧបសគ្គផ្សេងៗជាច្រើន ដោយក្រុមហ៊ុនថ្នាំជក់ប្រើប្រាស់កលល្បិចបំភាន់ថា ការដំឡើងពន្ធនាំឱ្យបាត់បង់ចំណូលពន្ធរដ្ឋ។ បង្កើនការគេចពន្ធនាំឱ្យប៉ះពាល់ដល់អ្នកមានចំណូល ទាប និងបាត់បង់ឱកាសការងារជាដើម។ លោកថា ការលើកឡើងនេះមិនមែនជាការពិតនោះទេ។
លោកថ្លែងថា៖ «ការដំឡើងពន្ធថ្នាំជក់មិនត្រឹមតែជួយបង្កើនចំណូលពន្ធរដ្ឋប៉ុណ្ណោះទេ ថែមទាំងធ្វើឱ្យជីវភាពប្រជាពលរដ្ឋប្រសើរជាងមុន។ ជាពិសេសនោះ គឺធ្វើឱ្យប្រជាពលរដ្ឋមានសុខភាពល្អទៀតផង។ ដូច្នេះកម្ពុជាគួរតែដំឡើងពន្ធថ្នាំជក់ឱ្យដល់អត្រា ៧៥% នៃតម្លៃបារីលក់រាយតាមអនុសាសន៍របស់អង្គការសុខភាពពិភពលោក»។
ការប្រើប្រាស់ផលិតផលថ្នាំជក់ ជាបន្ទុកមួយសម្រាប់រដ្ឋាភិបាលដោះស្រាយ ដោយសារការប្រើប្រាស់ផលិតផលថ្នាំជក់បង្កឱ្យប្រជាពលរដ្ឋ ឈឺ ស្លាប់ ពិការ ដែលក្នុងនោះប្រជាពលរដ្ឋកម្ពុជាប្រមាណ ១៥ ០០០ នាក់ស្លាប់ដោយសារការជក់បារីក្នុង ១ ឆ្នាំ។ មិនតែប៉ុណ្ណោះធ្វើឱ្យខាតបង់ថវិកាប្រមាណ ៦៤៩ លានដុល្លារអាមេរិក ក្នុង ១ ឆ្នាំ ដែលស្មើនឹង ៣ ភាគរយនៃផលិតផលក្នុងស្រុកសរុបរបស់កម្ពុជា។ នេះបើតាមអង្គការផ្តោតលើសុខភាពមួយនេះ។
ជាមួយគ្នានេះ តំណាងក្រសួងពាក់ព័ន្ធចំនួន ៣ មានក្រសួងសុខាភិបាល ក្រសួងអប់រំ យុវជន និងកីឡា និងក្រសួងសេដ្ឋកិច្ច និងហិរញ្ញវត្ថុ ក៏បានបង្ហាញបំណងរួមគ្នាក្នុងការគាំទ្រ និងជំរុញការដំឡើងពន្ធថ្នាំជក់នេះ។
លោកស្រី វុធ តំណាងក្រសួងសេដ្ឋកិច្ច ថ្លែងនាឱកាសនោះថា ការងារនេះមិនអាចធ្វើតែរដ្ឋាភិបាលម្នាក់ឯងបានទេ ទាមទារឱ្យមានការចូលរួមពីគ្រប់ភាគីពាក់ព័ន្ធ ដើម្បីសម្រេចបានជោគជ័យដ៏ធំ។ បច្ចុប្បន្នក្រសួងកំពុងពិចារណាដំឡើងពន្ធថ្នាំជក់ ដោយផ្តោតទៅលើគុណសម្បត្តិ និងគុណវិបត្តិនៃការដំឡើងពន្ធនេះផងដែរ។
លោកថា៖ «នៅក្នុងការអនុវត្តជាក់ស្តែងជាគោលដៅតាមប្រទេសនីមួយៗ គឺយើងកំពុងដើរទៅរកទិសដៅហ្នឹងហើយ ដូចដែលបេក្ខជនយើងបានធ្វើបទបង្ហាញ និងគាំទ្រឱ្យមានការដំឡើងពន្ធលើផលិតផលថ្នាំជក់»។
លោកស្រី រ៉ាយ រ៉ានី តំណាងក្រសួងសុខាភិបាលថ្លែងថា ថ្នាំជក់ពិតជា ផ្តល់ផលប៉ះពាល់ដល់សុខភាព និងសេដ្ឋកិច្ច ដែលទាមទារឱ្យមានការរួមគ្នាក្នុងការទប់ស្កាត់ការប្រើប្រាស់ថ្នាំជក់ពីសំណាក់ពលរដ្ឋ ជាពិសេសយុវជន។
លោកស្រីថា៖ «ទាក់ទងនឹងបញ្ហាថ្នាំជក់នេះរាជរដ្ឋាភិបាលយើង ក៏ដូចជាក្រសួងសុខាភិបាល ដោយមើលឃើញមានផលប៉ះពាល់យ៉ាងធ្ងន់ធ្ងរសុខភាពរបស់ពលរដ្ឋយើង បានជាយើងមានច្បាប់ជាតិនានាការពារជនគ្រប់រូបពីការស្រូបផ្សែង បារីពីគេ ឬកាត់បន្ថយពីការប្រើប្រាស់ថ្នាំជក់នេះ។ រាជរដ្ឋាភិបាលយើងមិនព្រងើយកន្តើយទេ»។
លោក គឹម សាញ់ តំណាងក្រសួងអប់រំថ្លែងថា៖ «ខ្ញុំសូមគាំទ្រទាំងស្រុងឱ្យដំឡើងពន្ធលើផលិតផលថ្នាំជក់ឱ្យបាន ៧៥ ភាគរយនៃតម្លៃលក់ និងបន្តរឹតបន្តឹងចរាចរណ៍ថ្នាំជក់»៕