.jpg)
ប្រជាពលរដ្ឋ បើកកម្មវិធី NEC-KH របស់ គជប នៅក្នុងទូរស័ព្ទដៃ។ ហេង ជីវ័ន
ភ្នំពេញៈ គណៈកម្មាធិការជាតិរៀបចំការបោះឆ្នោត (គជប) បានដាក់ឱ្យដំណើរការកម្មវិធីទូរស័ព្ទដៃឈ្មោះថា «NEC_KH» ចាប់ពីពេលនេះតទៅ ដើម្បីឱ្យប្រជាពលរដ្ឋកាន់តែមានភាពងាយស្រួលក្នុងការចូលទៅស្វែងរកឈ្មោះរបស់ខ្លួនក្នុងបញ្ជីបោះឆ្នោត និងអាចតាមដាន និងស្វែងយល់អំពីការងារបោះឆ្នោតបានទូលំទូលាយ។
យោងតាមសេចក្តីប្រកាសព័ត៌មានរបស់ គជប កាលពីថ្ងៃទី ២៤ វិច្ឆិកាថា កម្មវិធី «NEC_KH» ថ្មីនេះត្រូវបានដាក់ឱ្យប្រើដោយគ្របដណ្តប់លើកម្មវិធីចាស់ «Voterlist KH»។ កម្មវិធីថ្មីនេះ ក៏អាចចូលមើលអត្ថបទ កម្រងឯកសារ រូបភាព វីដេអូផ្សេងៗ ដែល គ.ជ.ប ផលិតឡើងដើម្បីផ្សព្វផ្សាយ និងអប់រំបណ្តុះបណ្តាលអ្នកបោះឆ្នោតផងដែរ។ សេចក្តីប្រកាសព័ត៌មាននេះបន្តថា ដើម្បីទាញយកកម្មវិធីនេះ សាធារណជនអាចចូលទៅកាន់ Google Play សម្រាប់ទូរស័ព្ទប្រើប្រព័ន្ធប្រតិបត្តិការ Android ឬ App Store សម្រាប់ទូរស័ព្ទប្រើប្រព័ន្ធប្រតិបត្តិការ iOS ហើយវាយដោយស្វែងរកពាក្យ «NEC KH» រួចធ្វើការដំឡើងជាការស្រេច។
ក្នុងជំហានជាបន្តបន្ទាប់ទៀត ដើម្បីឱ្យកម្មវិធីទូរស័ព្ទដៃ «NEC KH» នេះកាន់តែមានភាពពេញលេញ និងបំពេញបាននូវតម្រូវការរបស់ប្រជាពលរដ្ឋ គជប នឹងបន្តអភិវឌ្ឍកម្មវិធីឱ្យរឹតតែប្រសើរឡើង។ បន្ទាប់ពីអភិវឌ្ឍកម្មវិធីនេះរួចរាល់ គជប នឹងដាក់បញ្ចូលកម្មវិធីផ្សព្វផ្សាយព័ត៌មាន និងកម្មវិធីស្វែងរកបញ្ជីទីតាំង ការិយាល័យចុះឈ្មោះបោះឆ្នោត និងការិយាល័យបោះឆ្នោតបន្ថែមទៀត។
គជប សរសេរថា៖ «ការដាក់ឱ្យដំណើរការកម្មវិធីទូរស័ព្ទដៃ NECKH នេះគឺធ្វើឡើងស្របពេល ដែលការពិនិត្យបញ្ជីឈ្មោះ និងការចុះឈ្មោះបោះឆ្នោត បាននិងកំពុងប្រព្រឹត្តទៅនៅទូទាំងប្រទេសចាប់ពីថ្ងៃទី ១២ តុលាដល់ថ្ងៃទី ៣០ ខែវិច្ឆិកា ឆ្នាំ ២០២១»។
លោក សោម សូរីដា អ្នកនាំពាក្យ គជប ពន្យល់ថា ចំពោះកម្មវិធីចាស់ «Voterlist KH» នៅដដែលទេ គ្រាន់តែ គជប បញ្ចូលទៅក្នុងកម្មវិធីថ្មី «NEC KH» តែប៉ុណ្ណោះ។ កម្មវិធី «NEC KH» គឺជាកញ្ចប់ធំ ដែលគ្របដណ្តប់ទៅដោយកម្មវិធី «Voterlist KH» កម្មវិធីផ្សព្វផ្សាយអប់រំ និងលទ្ធផលនៃការចុះឈ្មោះបោះឆ្នោតរួមទាំងលទ្ធផលនៃការបោះឆ្នោតដែលត្រូវដាក់នៅក្នុងកញ្ចប់កម្មវិធី «NEC KH)។
លោកថ្លែងថា៖ «អ៊ីចឹង! ការដាក់ជំនួសនេះមានន័យថាយក Voterlist KH នេះ ទៅដាក់នៅក្នុង NEC KH ហើយគ្រាន់តែបើក NEC KH គឺយើងអាចជ្រើសរើស Voterlist KH នៅក្នុងហ្នឹងរួមជាមួយនឹងឯកសារអប់រំ អ្នកបោះឆ្នោតផ្សេងទៀត។ និយាយរួមវាមានលទ្ធផល បោះឆ្នោតដែល គជប បានសម្រេចអនុញ្ញាតឱ្យមានការធ្វើការផ្សព្វផ្សាយ»។
ការប្រែប្រួល ស្ថានភាពនៃកម្មវិធី Voterlist KH នេះមិនប៉ះពាល់ដល់ដំណើរការពិនិត្យបញ្ជី និងចុះឈ្មោះបោះឆ្នោតដែលកំពុងអនុវត្តនៅពេលនេះនោះទេ ពោលគឺអ្វីៗ នៅដដែលដោយគ្រាន់តែដូរទីតាំង កម្មវិធី Voterlist KH ទៅជា NEC KH ប៉ុណ្ណោះ។
បើតាមលោក សោម សូរីដា លទ្ធផលនៃការពិនិត្យបញ្ជី និងចុះឈ្មោះបោះឆ្នោត ឆ្នាំ ២០២១ នេះមិនទាន់ត្រូវបានដាក់បញ្ចូលទៅក្នុងកម្មវិធី Voterlist KH ទេ។ ចំពោះការប្តូរ ឬការប្រែប្រួលបញ្ជីបោះឆ្នោតបច្ចុប្បន្នដែលនៅក្នុង Voterlist KH នេះអាចកើតមាននៅពេលដែល គជប ប្រកាសសុពលភាពផ្លូវការលើលទ្ធផលនៃការពិនិត្យបញ្ជី និងចុះឈ្មោះបោះឆ្នោតនៅថ្ងៃទី ១២ ខែកុម្ភៈ ឆ្នាំ ២០២២ ខាងមុខ។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ និកហ្វិក យល់ឃើញថា ពាក់ព័ន្ធនឹងបច្ចេកវិទ្យា លោកមិនសូវជាយល់ និងចាប់អារម្មណ៍ប៉ុន្មានទេ ប៉ុន្តែ នៅពេលដែលមានការប្រែប្រួលច្រើនពេក វាធ្វើឱ្យលំបាកដល់ប្រជាពលរដ្ឋក្នុងការតាមដាន និងឆែកមើលឈ្មោះ និងព័ត៌មានផ្សេងៗ។
លោកថ្លែងថា៖ «អ្នកដែលតាមដានរឿងហ្នឹងវាលំបាកហើយ នៅពេលដែលមានការផ្លាស់ប្តូរអីចឹង។ បញ្ហាច្រើនហើយ អារឿងដូរហ្នឹងព្រោះប្រជាពលរដ្ឋ គាត់ឆែកមើល ហើយបើមានផ្លាស់ប្តូរទៀត ពលរដ្ឋតាមអត់ទាន់ទេ បើអាចទុក អា Voterlist វិញទៅ»៕
