តាកែវៈ អគ្គស្នងការនគរបាលជាតិលោក នេត សាវឿន ណែនាំស្នងការនគរបាលខេត្តតាកែវថ្មីត្រូវបន្តថែរក្សាសន្តិសុខ សុវត្ថិភាពជូនប្រជាពលរដ្ឋក្នុងមូលដ្ឋានឱ្យបានល្អប្រសើរ ជាពិសេសត្រូវបង្ក្រាបមេខ្លោងគ្រឿងញៀន និងបទល្មើសនៅតាមព្រំដែន។
ការណែនាំនេះត្រូវបានធ្វើឡើងក្នុងឱកាសលោកចូលរួមពិធីប្រកាសតែងតាំងលោក ឈាង ផាន់ណារ៉ា ដែលជាស្នងការរងនគរបាលរាជធានីភ្នំពេញឱ្យកាន់តំណែងជាស្នងការនគរបាលខេត្តតាកែវ ជំនួសលោក សុខ សំណាង ដែលត្រូវទទួលបានតួនាទីថ្មីជាអគ្គនាយករងនៃអគ្គនាយកដ្ឋានអត្តសញ្ញាណកម្ម កាលពីថ្ងៃទី ២៤ ខែវិច្ឆិកា។
លោក នេត សាវឿន ថ្លែងថា៖ «ដើម្បីអនុវត្តក្នុងតួនាទីភារកិច្ចទទួលបានជោគជ័យ ស្នងការថ្មីត្រូវព្យាករសភាពការណ៍មួយចំនួនពាក់ព័ន្ធការគ្រប់គ្រងជំងឺកូវីដ ១៩ បទល្មើសចរាចរណ៍ គ្រឿងញៀន និងបទល្មើសព្រំដែនជាដើម»។
ក្នុងនោះដែរ លោកក៏បានណែនាំការងារ ៥ ចំណុច រួមមាន ទី១ ស្នងការថ្មីត្រូវពង្រឹងតួនាទីដឹកនាំដោយផ្សារភ្ជាប់ទៅនឹងការទទួលខុសត្រូវខ្ពស់ជាងគេ។ ត្រូវចាត់ទុកខ្លួនឯងជាអាណាព្យាបាលជាអ្នកដឹកនាំត្រូវកសាងមនោសញ្ចេតនាក្នុងអង្គភាព និងត្រូវធ្វើជាគំរូគេក្នុងការបំពេញភារកិច្ច ប្រចាំការប្រចាំបញ្ជាចុះជាប់ជាប្រចាំជាមួយបងប្អូន។ ទី២ ត្រូវធ្វើជាសេនាធិការគ្រប់ជ្រុងជ្រោយដល់គណៈបញ្ជាការឯកភាពខេត្ត ដើម្បីបំពេញការងារសំដៅការពារសន្តិសុខ សុវត្ថិភាព និងសណ្តាប់ធ្នាប់ជូនប្រជាពលរដ្ឋក្នុងខេត្តទាំងមូល។
ទី៣ ត្រូវជួយលើកកម្ពស់សេវាចាំបាច់ដើម្បីបម្រើជូនប្រជាពលរដ្ឋ ការបំពេញលិខិតស្នាមរដ្ឋបាល និងធ្វើកិច្ចការដោយស្មោះត្រង់ដោយឥតលក្ខខណ្ឌ និងទទួលខុសត្រូវ មិនកោសរូសចាត់ទុកប្រជាពលរដ្ឋជាឪពុកម្តាយ។ ពិសេសលោកមេប៉ុស្តិ៍នគរបាលរដ្ឋបាលត្រូវបំពេញកិច្ចការចេញពីបេះដូងឱ្យបានល្អជូនពលរដ្ឋ។ ទី៤ ពង្រឹងគុណភាពស្នងការ និងមន្ត្រីនគរបាលទាំងអស់ក្នុងនាមជាកងកម្លាំងត្រូវមានសមត្ថភាព វិន័យ គុណធម៌ សីលធម៌ និងយកចិត្តទុកដាក់បំប៉ន បើកវគ្គបណ្តុះបណ្តាល និងការរៀនសូត្រជំនាញជាពិសេសស្ថិតក្នុងដំណាក់កាលនៃជំងឺឆ្លងកូវីដនេះ។
ត្រូវចេះរៀនរស់នៅតាមរបៀបថ្មី ទាំងការបំពេញការងារ ព្រមទាំងការប្រកបអាជីវកម្ម និងទី៥ ត្រូវពង្រឹងសាមគ្គីភាព និងលើកទង់សាមគ្គីផ្ទៃក្នុង ព្រមទាំងសហការហ្វឹកហាត់ ក្រោមដំបូលរាជរដ្ឋាភិបាល ក្រសួងមហាផ្ទៃ។ ពិសេសត្រូវរួបរួមគ្នាដើម្បីទទួលបានភាពជោគជ័យក្នុងការអនុវត្តគោលនយោបាយភូមិ-ឃុំ មានសុវត្ថិភាព។
លោកអគ្គស្នងការក៏បានស្នើឱ្យស្នងការដែលទទួលភារកិច្ចថ្មីត្រូវចាត់កម្លាំងនគរបាលពីខេត្ត-ស្រុក ដើម្បីទៅបំពេញភារកិច្ចតាមបណ្តាប៉ុស្តិ៍នគរបាលដែលកំពុងខ្វះខាតកម្លាំង តាមរយ:ការស្ម័គ្រចិត្ត ឬតាមការចាត់ឱ្យបំពេញបេសកកម្ម មានរយ:ពេល និងត្រូវធ្វើការហ្វឹកហាត់បំប៉នដើម្បីពង្រឹងគុណភាពការងារ។
លោក ឈាង ផាន់ណារ៉ា ស្នងការនគរបាលខេត្តតាកែវ ប្រាប់ ភ្នំពេញ ប៉ុស្តិ៍ថា លោកនឹងខិតខំបម្រើការងារជូនប្រជាពលរដ្ឋឱ្យបានល្អប្រសើរ និងបង្កើនទំនាក់ទំនងល្អជាមួយអង្គភាពពាក់ព័ន្ធ។ ជាពិសេសកិច្ចការពារព្រំដែន ដោយបង្កើនទំនាក់ទំនងល្អជាមួយវៀតណាម។
លោកបញ្ជាក់ថា៖ «យើងនឹងដឹកនាំកម្លាំងពង្រឹងសន្តិសុខ សុវត្ថិភាព និងពង្រឹងទាំងជំនាញ និងគុណភាព របស់មន្ត្រីយើង ហើយអ្វីដែលខ្ញុំចាប់អារម្មណ៍នោះ គឺទី១ ការបង្ក្រាបគ្រឿងញៀន។ ទី២ បញ្ហាចរាចរណ៍ដែលខ្ញុំត្រូវពង្រឹង»។
លោកថា ក្រៅពីនោះ លោកក៏នឹងមានការកែសម្រួលការដាក់ប៉ុស្តិ៍ត្រួតពិនិត្យចរាចរណ៍ណាមិនប្រក្រតី។ លោកនឹងដកចេញប៉ុស្តិ៍ត្រួតពិនិត្យដែលមានភាពមិនប្រក្រតី ដើម្បីកុំឱ្យថ្នាំងថ្នាក់ជាមួយប្រជាពលរដ្ឋ។
ពាក់ព័ន្ធនឹងបទល្មើសព្រំដែន លោក ផាន់ណារ៉ា បញ្ជាក់ថា ដោយសារខេត្តតាកែវ នៅជាប់ព្រំដែនវៀតណាម លោកនឹងខិតខំការពារបទល្មើសនៅតាមព្រំដែនទៅតាមអ្វីដែលអាចធ្វើបាន។
លោកថ្លែងថា៖ «ក្នុងកិច្ចការនេះ ខ្ញុំនឹងចុះត្រួតពិនិត្យព្រំដែន ជួបជាមួយវរការពារព្រំដែន ដើម្បីទប់ស្កាត់បទល្មើសព្រំដែន ដូចជាការរត់ពន្ធមនុស្ស ឬរត់ពន្ធគ្រឿងញៀន»។
លោក យន់ ផល្លី មន្ត្រីសម្របសម្រួលនៃអង្គការសិទ្ធិមនុស្ស (អាដហុក) ប្រចាំខេត្តតាកែវ ថ្លែងថា កន្លងទៅ ទោះបីសមត្ថកិច្ចខិតខំបង្ក្រាបបទល្មើសជាបន្តបន្ទាប់ក៏ដោយ ប៉ុន្តែក៏នៅមានភាពឆកល្វែងពាក់ព័ន្ធការលេងល្បែង និងបទល្មើសគ្រឿងញៀនជាដើម។ ទោះយ៉ាងណា លោករំពឹងថា ស្នងការនគរបាលថ្មី មកបំពេញភាពខ្វះចន្លោះទាំងនេះ ដើម្បីសុខសុវត្ថិភាពប្រជាពលរដ្ឋ។
មន្ត្រីសិទ្ធិមនុស្សរូបនេះ បានថ្លែងថា៖ «យើងសង្ឃឹមថាស្នងការថ្មីនឹងមានវិធានការតឹងរ៉ឹងក្នុងការទប់ស្កាត់រាល់បទល្មើសទាំងឡាយនៅក្នុងខេត្ត ដើម្បីសុវត្ថិភាពប្រជាពលរដ្ឋក្នុងការរស់នៅ»៕