កំពង់ស្ពឺៈ ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) លោក ជា ហ៊ាន កំពុងអង្កេតអំពីសាវតារជនប្រព្រឹត្តបទល្មើសព្រៃឈើ ដើម្បីកសាងសំណុំរឿងបញ្ជូនទៅតុលាការ ក្រោយពីជនល្មើសបានគំរាមសម្លាប់ នៅពេលរូបលោកបានសហការជាមួយមន្ត្រីឧទ្យានុរក្សបង្ក្រាបឈើខុសច្បាប់នៅឃុំត្រពាំងជោរ ស្រុកឱរ៉ាល់។
លោក ជា ហ៊ាន ប្រធានអង្គការ ACNCIPO ថ្លែងនៅថ្ងៃទី ២៥ ខែវិច្ឆិកាថា នៅថ្ងៃទី ២៤ ខែវិច្ឆិកា លោកបានចុះសង្កេតមើលធនធានធម្មជាតិនៅក្នុងដែនជម្រកសត្វព្រៃភ្នំឱរ៉ាល់ ភូមិពោធិ៍ ឃុំត្រពាំងជោរ ស្រុកឱរ៉ាល់បានប្រទះឃើញគំនរឈើជាង ៥០ កំណាត់ ស្មើប្រមាណជិត ២ ម៉ែត្រគុប។ លោកបានសុំអន្តរាគមន៍ពីមន្ត្រីឧទ្យានុរក្ស ដើម្បីបង្ក្រាប និងយកឈើនោះទៅរក្សាទុកនៅស្នាក់ការបរិស្ថានអូរត្រាវ។ គំនរឈើនោះជនប្រព្រឹត្តបទល្មើសអារពីឃុំសន្ទ្រែ ស្រុកភ្នំក្រវាញ ខេត្តពោធិ៍សាត់ ចម្ងាយប្រមាណជិត ១០ គីឡូម៉ែត្រយកមកទម្លាក់ទុក ក្នុងឃុំត្រពាំងជោរ ស្រុកឱរ៉ាល់ សម្រាប់ត្រៀមយកទៅលក់នៅតាមបណ្តាដេប៉ូឈើ។
សមត្ថកិច្ចបានជួលគោយន្តអ្នកស្រុក ដើម្បីដឹកជញ្ជូនឈើមកទុកនៅស្នាក់ការ។ ប៉ុន្តែក្រោយលើកឈើដាក់គោយន្តត្រូវជនល្មើសបានយកសាំងចំនួន ៥ លីត្រមកចាក់ពីលើឈើ និងគោយន្ត បំណងដុតបំផ្លាញវត្ថុតាងតែមិនបានសម្រេចក៏គេចចេញដោយបោះពាក្យថា នឹងសម្លាប់អ្នករំខានកិច្ចការរបស់ពួកគេចោល។
លោកថ្លែងថា៖ «ករណីនេះខ្ញុំកំពុងតែអង្កេតអំពីសាវតារដើម្បីកសាងសំណុំរឿងបញ្ចូនទៅតុលាការ យើងមិនអាចឱ្យជនប្រព្រឹត្តបទល្មើស ប្រព្រឹត្តឧក្រិដ្ឋកម្មព្រៃឈើហើយបន្តប្រព្រឹត្តអំពើហិង្សាមកលើសមត្ថកិច្ចក្នុងការអនុត្តច្បាប់បែបនេះនោះទេ»។
លោក ជា ហ៊ាន បញ្ជាក់ថា សមត្ថកិច្ចបរិស្ថានមិនអាចចាប់ ឬឃាត់ជនល្មើសបាន ដោយសារជនល្មើសមានគ្នាច្រើនរហូតជាង ១០ នាក់ ចំណែកសមត្ថកិច្ចបរិស្ថានមានតែ ២ នាក់រួមជាមួយកម្លាំងខាងអង្គការរបស់លោក ២ នាក់សរុបតែ ៤ នាក់ប៉ុណ្ណោះ។
នៅទីនោះកម្លាំងអង្គការរបស់លោកធ្លាប់សហការជាមួយមន្ត្រីបរិស្ថាន ធ្លាប់ធ្វើការបង្ក្រាបម្តងរួចមកហើយ ប៉ុន្តែជនល្មើសតែងតែដាក់បំផ្ទុះកង់ឡានដោយបង្កប់ដែកគោលនៅតាមផ្លូវ នៅពេលកម្លាំងបរិស្ថាន ដឹកឈើយកទៅរក្សាទុកនៅស្នាក់ការ។
លោកថ្លែងថា៖ «បើយើងមិនអនុវត្តច្បាប់ទៅលើបុគ្គលដែលប្រព្រឹត្តបទល្មើសទេ វាធ្វើឱ្យបុគ្គលផ្សេងទៀត ធ្វើជាគំរូអាក្រក់។ នៅពេលធ្វើជាគំរូអាក្រក់អ៊ីចឹង យើងពិបាកក្នុងការអនុវត្តច្បាប់ណាស់ ចង់មិនចង់ ជនល្មើសនៅទីនោះគាត់មានកាំភ្លើងកែច្នៃលាក់ទុកផង អ៊ីចឹងយើងត្រូវតែអនុវត្តច្បាប់»។ លោក ជា ហ៊ាន ថា លោកនឹងបន្តចុះប្រតិបត្តិការអង្កេត និងសហការបង្ក្រាបបទល្មើសព្រៃឈើបន្តទៀតបើទោះបីមានការរារាំង និងប៉ុនប៉ងណាមួយពីជនល្មើសក្នុងការប្រព្រឹត្តបទឧក្រិដ្ឋកម្មព្រៃឈើក៏ដោយ។
លោក ឈឹម សាម៉ុន ប្រធានស្នាក់ការបរិស្ថានអូរត្រាវ ថ្លែងនៅថ្ងៃទី ២៥ ខែវិច្ឆិកាថា ឈើទាំងអស់បានដឹកយកទៅដល់ស្នាក់ការបរិស្ថានអស់ហើយ។ ប៉ុន្តែនៅមិនទាន់បានវាស់វែងឱ្យដឹងប្រាកដថា មានប៉ុន្មានម៉ែត្រគុបនៅឡើយទេ។ លោកថា ពេលអនុវត្តច្បាប់ជួបរឿងបែបនេះគឺជាការលំបាកមួយ ប៉ុន្តែយ៉ាងណាក៏ដោយ មន្ត្រីឧទ្យានុរក្ស មិនរារែកក្នុងការចុះល្បាត បង្ក្រាប និងអភិរក្សតំបន់ការពារធម្មជាតិឡើយ។ លោកថ្លែងថា៖ «ពិបាកដែរយើងប្រឈមមុខជាមួយពួកគាត់ជួនកាលយប់ ជួនកាលថ្ងៃធម្មតាយើងនៅផ្លូវភ្លឺ ជនល្មើសនៅផ្លូវងងឹត ប៉ុន្តែធ្វើម៉េចយើងនៅតែអនុវត្តកិច្ចការងាររបស់យើងជាបន្តបន្ទាប់រហូត»។
ដោយឡែកនៅខេត្តព្រះវិហារ លោក វង្ស វិស្សិត នាយផ្នែករដ្ឋបាលព្រៃឈើ ត្បែងមានជ័យ ថ្លែងនៅថ្ងៃទី ២៥ ខែវិច្ឆិកាថា កម្លាំងផ្នែករដ្ឋបាលព្រៃឈើត្បែងមានជ័យ សហការជាមួយនគរបាលស្រុកត្បែងមានជ័យ កាលពីថ្ងៃទី ២៤ ខែវិច្ឆិកា បានចុះបង្ក្រាបទីតាំងសិប្បកម្ម កែច្នៃឈើខុសច្បាប់ ១ កន្លែង នៅភូមិពោធិ៍ ឃុំពោធិ៍ ស្រុកត្បែងមានជ័យ រឹបអូសសម្ភារមានដូចជាឈើមួយចំនួនធំ ម៉ាស៊ីនភ្លើង តាបឈូស ម៉ាស៊ីនវៀល និងសម្ភារផ្សេងៗមួយចំនួនធំ ដឹកយកមករក្សាទុក នៅផ្នែករដ្ឋបាលព្រៃឈើ ត្បែងមានជ័យ ដើម្បីចាត់ការតាមនីតិវិធី។
លោកនាយផ្នែករដ្ឋបាលព្រៃឈើត្បែងមានជ័យ បញ្ជាក់ថា សិប្បកម្មនេះបានធ្វើសកម្មភាពកែច្នៃឈើលេខ ១ ប្រភេទឈើសុក្រម ផ្ចឹក ត្រាច និងឈើពពេល ជាច្រើនឆ្នាំ កន្លងមកហើយ។ មន្ត្រីជំនាញរដ្ឋបាលព្រៃឈើ ត្បែងមានជ័យបានចុះអប់រំធ្វើ កិច្ចសន្យាឱ្យបញ្ឈប់ ព្រោះសិប្បកម្មនេះគ្មានច្បាប់អនុញ្ញាត។
លោកថ្លែងថា៖ «យើងណែនាំច្រើនដងហើយគាត់មិនស្តាប់ទើបយើងអនុវត្តច្បាប់ ហើយម្យ៉ាងកន្លែងគាត់នៅតំបន់ធនធានធម្មជាតិ ដែលគេហាមឃាត់មិនឱ្យមានសិប្បកម្មនៅតំបន់ហ្នឹង។ វត្ថុតាង និងអត្តសញ្ញាណម្ចាស់សិប្បកម្មនោះយើងនឹងកសាងសំណុំរឿងបញ្ជូនទៅតុលាការនៅសប្តាហ៍ក្រោយ»៕