.jpg)
កិច្ចប្រជុំរវាងអភិបាលខេត្តបន្ទាយមានជ័យ លោក អ៊ុំ រាត្រី អភិបាលខេត្តបាត់ដំបង លោក សុខ លូ និងអភិបាលខេត្តស្រះកែវ ប្រទេសថៃ លោក បរិនបញ្ញា ភោធិសាធ កាលពីថ្ងៃទី២៥ ខែវិច្ឆិកា នៅទីស្នាក់ការអន្តរជាតិក្លងលឹក ស្រុកអារ័ញ្ញ ខេត្តស្រះកែវ ដើម្បីពង្រឹងកិច្ចសហប្រតិបត្តិការសម្ព័ន្ធមេត្រីភាព។ រូបថត ក្រសួងមហាផ្ទៃ
បន្ទាយមានជ័យៈ កម្ពុជាបានស្នើថៃ អនុញ្ញាតឱ្យប្រជាពលរដ្ឋកម្ពុជាចេញចូលទៅធ្វើការនៅប្រទេសថៃ ក្នុង ១ ថ្ងៃត្រឹម ៣០០០នាក់ គឺទៅព្រឹកវិលល្ងាច ខណៈពលករដែលមានបណ្ណឆ្លងព្រំដែន ត្រូវអនុញ្ញាតរយៈពេល ៣ខែ សម្រាប់ធ្វើកសិកម្មតាមបន្ទាត់ព្រំដែន។
ការស្នើនេះធ្វើឡើងក្នុងកិច្ចប្រជុំរវាងអភិបាលខេត្តបន្ទាយមានជ័យ លោក អ៊ុំ រាត្រី អភិបាលខេត្តបាត់ដំបង លោក សុខ លូ និងអភិបាលខេត្តស្រះកែវ ប្រទេសថៃ លោក បរិនបញ្ញា ភោធិសាធ កាលពីថ្ងៃទី២៥ ខែវិច្ឆិកា។
កិច្ចប្រជុំធ្វើឡើងនៅទីស្នាក់ការអន្តរជាតិក្លងលឹក ស្រុកអារ័ញ្ញ ខេត្តស្រះកែវ ដើម្បីពង្រឹងកិច្ចសហប្រតិបត្តិការសម្ព័ន្ធមេត្រីភាព។
យោងតាមហ្វេសប៊ុក ក្រសួងមហាផ្ទៃ នៅថ្ងៃទី២៦ ខែវិច្ឆិកា បានឱ្យដឹងថា ភាគីទាំង ២ បានពិភាក្សាគ្នាដើម្បីឈានដល់ការបើកច្រកជាប់ព្រំដែនខេត្តបន្ទាយមានជ័យរួមមាន ច្រកទ្វារអន្តរជាតិប៉ោយប៉ែត ច្រកម៉ាឡៃ ច្រកបឹងត្រកួន រីឯខេត្តបាត់ដំបងនឹងគ្រោងបើកច្រកទ្វារអន្តរជាតិគីឡូ១៣ ស្រុកសំពៅលូន ឈមភាគីច្រកខៅឌិន ស្រុកក្លងហាត ខេត្តស្រះកែវផងដែរ។
ប្រភពដដែលបញ្ជាក់ថា៖ «នៅក្នុងកិច្ចប្រជុំនោះ ភាគីកម្ពុជាបានស្នើសុំឱ្យប្រជាពលរដ្ឋកម្ពុជាទៅធ្វើការព្រឹកវិលល្ងាច ១ថ្ងៃត្រឹម ៣០០០នាក់ ពោលចេញចូលម៉ោង ៦ ព្រឹក ដល់ម៉ោង ១០យប់។ អ្នកអូសរទេះ ១ថ្ងៃ អនុញ្ញាតត្រឹម ៣០០ រទះ ក្នុង ១រទេះ តែ ១ជើង តែត្រូវអនុវត្តតាមការណែនាំរបស់ ក្រសួងសុខាភិបាលជានិច្ច។ សម្រាប់ពលករដែលមានបណ្ណឆ្លងព្រំដែនត្រូវអនុញ្ញាតរយៈពេល ៣ខែ សម្រាប់ធ្វើកសិកម្មតាមបន្ទាត់ព្រំដែន»។
ហ្វេសប៊ុកដដែលបញ្ជាក់ថា ភាគីថៃ បានទទួលយកសំណើរបស់ភាគីកម្ពុជាដើម្បីស្នើសុំបន្តទៅថ្នាក់ដឹកនាំរដ្ឋាភិបាលថៃ ដើម្បីសម្រេចពេលក្រោយ ហើយកម្ពុជានឹងស្នើសុំគោលការណ៍ឯកភាពពីលោកនាយករដ្ឋមន្ត្រី ហ៊ុន សែន ផងដែរ៕
វីដេអូ៖
