.jpg)
កិច្ចប្រជុំកំពូល អាស៊ី-អឺរ៉ុប លើកទី១៣ (ASEM13) កាលពីថ្ងៃទី ២៥ និងថ្ងៃទី ២៦ ខែ វិច្ឆិកា តាមរយៈប្រព័ន្ធវីដេអូ ក្រោមអធិបតីភាពលោកនាយករដ្ឋមន្ត្រី ហ៊ុន សែន ដែលកម្ពុជាធ្វើជាម្ចាស់ផ្ទះ។ រូបថត SPM
ភ្នំពេញៈ ថ្នាក់ដឹកនាំបណ្តាប្រទេសអាស៊ី និងអឺរ៉ុប ប្តេជ្ញាការពារសន្តិភាព សន្តិសុខ លុបបំបាត់ភាពក្រីក្រ ដោះស្រាយបម្រែបម្រួលអាកាសធាតុ និងការពារសិទ្ធិមនុស្ស ដោយផ្អែកលើការគោរពច្បាប់អន្តរជាតិ។
ការប្តេជ្ញាចិត្តបែបនេះធ្វើឡើងក្នុងកិច្ចប្រជុំកំពូល អាស៊ី-អឺរ៉ុប លើកទី១៣ (ASEM13) កាលពីថ្ងៃទី ២៥ និងថ្ងៃទី ២៦ ខែ វិច្ឆិកា តាមរយៈប្រព័ន្ធវីដេអូ ក្រោមអធិបតីភាពលោកនាយករដ្ឋមន្ត្រី ហ៊ុន សែន ដែលកម្ពុជាធ្វើជាម្ចាស់ផ្ទះ។
សេចក្តីប្រកាសព័ត៌មានក្រសួងការបរទេសបញ្ជាក់ កាលពីថ្ងៃទី ២៦ ខែវិច្ឆិកា ថា៖ «ថ្នាក់ដឹកនាំ ASEM ប្តេជ្ញាចិត្តធ្វើការរួមគ្នាដើម្បីសន្តិភាព និងសន្តិសុខ ការអភិវឌ្ឍប្រកបដោយចីរភាព និងកំណើនប្រកបដោយបរិយាប័ន្ន ដោយផ្អែកលើការគោរពច្បាប់អន្តរជាតិ ក្នុងនោះរួមទាំងការលើកកម្ពស់ និងការការពារសិទ្ធិមនុស្ស អនុលោមតាមធម្មនុញ្ញអង្គការសហប្រជាជាតិ និង សេចក្តីប្រកាសជាសកលស្តីពីសិទ្ធិមនុស្ស»។
ថ្នាក់ដឹកនាំ ASEM ក៏បានប្តេជ្ញាចិត្តអនុវត្តរបៀបវារៈឆ្នាំ២០៣០ ស្តីពីការអភិវឌ្ឍប្រកបដោយចីរភាព និងរបៀបវារៈសកម្មភាព Addis Ababa ដើម្បីលុបបំបាត់ភាពក្រីក្រ បញ្ចប់ភាពអត់ឃ្លាន កាត់បន្ថយវិសមភាព និងកសាងអនាគតមួយប្រកបដោយបរិយាប័ន្ន និងនិរន្តរភាព សំដៅធានាឱ្យបានថា មិនមាននរណាម្នាក់ត្រូវបានទុកចោលឡើយ។
លើសពីនេះ ថ្នាក់ដឹកនាំ ASEM ក៏បានបញ្ជាក់ពីការតាំងចិត្ត និងឆន្ទៈ ស្របតាមលទ្ធផលសន្និសីទកំពូលលើកទី ២៦ ក្រោមអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ (COP26) ដែលបានបញ្ចប់កាលពីពេលថ្មីៗនេះ ក្នុងការដោះស្រាយបញ្ហាប្រឈមសកលដែលកំពុងបន្តកើនឡើងពាក់ព័ន្ធនឹងបម្រែបម្រួលអាកាសធាតុ ព្រឹត្តិការណ៍ធាតុអាកាសធ្ងន់ធ្ងរ ការបាត់បង់ជីវចម្រុះ និងការបំពុល។
ថ្នាក់ដឹកនាំ ASEM ព្រមទាំងបញ្ជាក់ពីសារៈសំខាន់នៃការផ្តល់ហិរញ្ញប្បទាន និងបច្ចេកវិទ្យា ដើម្បីជួយសម្រួលដល់ការផ្លាស់ប្តូរ និងបានប្តេជ្ញាពង្រឹងកិច្ចសហប្រតិបត្តិការអន្តរជាតិសម្រាប់គោលបំណងនេះ៕
