.jpg)
អគ្គស្នងការដ្ឋាននគរបាលជាតិ ប្រកាសឱ្យសាធារណជនអាចហៅទូរស័ព្ទទៅលេខ «១១៧ »ដោយឥតគិតថ្លៃ ដើម្បីផ្តល់ព័ត៌មានពិតជូននគរបាល។ រូបថត នគរបាល
ភ្នំពេញៈ នាយកដ្ឋានវិទ្យុទាក់ទង នៃអគ្គស្នងការដ្ឋាននគរបាលជាតិ នៅថ្ងៃទី ២៦ ខែវិច្ឆិកា បានប្រកាសសម្រេចឱ្យសាធារណជនអាចហៅទូរស័ព្ទទៅលេខ «១១៧»ដោយឥតគិតថ្លៃ ដើម្បីផ្តល់ព័ត៌មានពិតជូននគរបាលដូចជា បទល្មើសព្រហ្មទណ្ឌ គ្រោះថ្នាក់ចរាចរណ៍ អគ្គិភ័យ ឬភាពអសកម្មរបស់នគរបាលជាតិតាមមូលដ្ឋាន។
លោកឧត្ដមសេនីយ៍ទោ ឈឿន ប៊ុនឆន ប្រធាននាយកដ្ឋានវិទ្យុទាក់ទង ថ្លែងនៅថ្ងៃទី ២៧ ខែវិច្ឆិកាថា ការសម្រេចកែសម្រួលរបៀបអនុវត្តការងារក្នុងមជ្ឈមណ្ឌលប្រចាំបញ្ជា នៃអគ្គស្នងការដ្ឋាននគរបាលជាតិនេះ ដើម្បីឱ្យសាធារណជនអាចហៅទូរស័ព្ទទៅលេខ «១១៧» ផ្តល់ព័ត៌មានពិតជូននគរបាលពាក់ព័ន្ធ បទល្មើសព្រហ្មទណ្ឌ គ្រោះថ្នាក់ចរាចរណ៍ អគ្គិភ័យ ឬភាពអសកម្មផ្សេងៗរបស់នគរបាលជាតិតាមមូលដ្ឋានជាដើម។
លោកប្រធាននាយកដ្ឋានវិទ្យុទាក់ទង បញ្ជាក់ថា៖ «លេខ ១១៧ ហៅចូលដោយឥតបង់ប្រាក់ និងរង់ចាំទទួលព័ត៌មានពិតពីជនរួមជាតិកម្ពុជា ២៤ ម៉ោងលើ ២៤ ម៉ោង ទូទាំងប្រទេស និងដោះស្រាយជូនឱ្យអស់លទ្ធភាព»។
លោក ឈឿន ប៊ុនឆន សង្ឃឹមទុកថា ជនរួមជាតិនឹងផ្តល់ទំនុកចិត្តលើលេខ ១១៧ តាមរយៈការផ្តល់ព័ត៌មានពិតមកដល់សមត្ថកិច្ចនគរបាល។ យ៉ាងណាលោកថា ជាការកត់សម្គាល់ ក្រោយសេចក្តីប្រកាសឃើញមានពលរដ្ឋផ្តល់ទំនុកចិត្តទូរស័ព្ទចូលរហូតម៉ោងអធ្រាត្រ។
លោកថ្លែងថា៖ «យើងខ្ញុំកំពុងសាកល្បងប្រព័ន្ធថ្មី និងការអនុវត្តន៍របៀបថ្មី ដូចនេះយើងខ្ញុំក៏រង់ចាំការរិះគន់កែលម្អក្នុងន័យស្ថាបនាពីជនរួមជាតិផងដែរពាក់ព័ន្ធលេខ ១១៧ នេះ។ ផ្សព្វផ្សាយឱ្យបានទូលំទូលាយថាលេខ ១១៧ រង់ចាំទទួលព័ត៌មានពិតពីជនរួមជាតិកម្ពុជា ២៤ ម៉ោងលើ ២៤ ម៉ោង ទូទាំងប្រទេស និងដោះស្រាយជូនឱ្យអស់លទ្ធភាព»៕
