.jpg)
លោក ឃឹម ហ្វីណង់ អភិបាលស្រុកបន្ទាយស្រី ថ្លែងនាពេលកន្លងទៅ។ រូបថត ឃឹម ហ្វីណង់ - Khim Finan
សៀមរាបៈ រដ្ឋបាលស្រុកបន្ទាយស្រីនៃខេត្តសៀមរាបនឹងពង្រីកសេវាប្រមូលសំរាមនៅតាមផ្ទះទៅដល់គ្រប់ភូមិទាំងអស់នៅក្នុងស្រុកទាំងមូល ចាប់ពីខែមករា ឆ្នាំ ២០២២ ដើម្បីធានាឱ្យបាននូវភាពស្អាតនៅក្នុងគ្រប់ទីកន្លែងនៅក្នុងស្រុក។
លោក ឃឹម ហ្វីណង់ អភិបាលស្រុកបន្ទាយស្រី សរសេរនៅលើហ្វេសប៊ុករបស់កាលពីថ្ងៃទី ២៦ ខែវិច្ឆិកាថា៖ «សេវាប្រមូលសំរាមនៅតាមផ្ទះនឹងត្រូវបានពង្រីកទៅដល់គ្រប់ភូមិទាំងអស់នៅក្នុងស្រុកបន្ទាយស្រីទាំងមូល ចាប់ពីខែមករាឆ្នាំ ២០២២ នេះតទៅ»។
លោកបញ្ជាក់ថា ក្រោយពីបានសិក្សាយ៉ាងហ្មត់ចត់ពីស្ថានភាពជាក់ស្តែងនៅតាមមូលដ្ឋាននៃភូមិនីមួយៗ នៅក្នុងស្រុកនេះ និងបន្ទាប់ពីភាពជោគជ័យនៃគម្រោងសហគមន៍ស្វ័យគ្រប់គ្រងនៅក្នុងភូមិព្រះដាក់របស់ស្រុកមួយនេះ រដ្ឋបាលស្រុកបន្ទាយស្រីបានសម្រេចពង្រីកវិសាលភាពនៃការប្រមូលសំរាមនៅតាមខ្នងផ្ទះឱ្យបានទៅដល់គ្រប់ទីកន្លែងទាំងអស់នៅក្នុងស្រុកនេះ ដោយរៀបចំជាប្រព័ន្ធចម្រុះ រវាងសេវាពីក្រុមហ៊ុនឯកជនផង និងសេវារបស់សហគមន៍ផង។
លោកអភិបាលស្រុករូបនេះបញ្ជាក់ថា៖ «ការបោះជំហានថ្មីតាមទម្រង់បែបផ្តល់សេវាកម្មនេះ គឺដើម្បីធានាឱ្យបាននូវភាពស្អាតនៅក្នុងគ្រប់ទីកន្លែងនៅក្នុងស្រុក ស័ក្តិសមជាភូមិដ្ឋានទេសចរណ៍ និងដើម្បីធ្វើឱ្យមាននិរន្តរភាពនៃការងារគ្រប់គ្រងសំរាម និងកាកសំណល់រឹងតាមលក្ខណៈជាប្រព័ន្ធ»។
លោក ឃឹម ហ្វីណង់ បន្តថារដ្ឋបាលស្រុករបស់លោករក្សាទុកទម្រង់សហគមន៍ស្វ័យគ្រប់គ្រងនៅក្នុងភូមិព្រះដាក់ដដែល តែតម្រូវឱ្យសហគមន៍ចូលរួមចំណែកវិភាគទានថវិកាតិចតួចដើម្បីឱ្យក្រុមហ៊ុនឯកជនអាចដឹកបន្តយកទៅចាក់នៅទីលានចាក់សំរាម ហើយរដ្ឋបាលស្រុកក៏លើកចិត្ត និងផ្តល់ជម្រើសដល់ភូមិដទៃទៀត ឱ្យមានលទ្ធភាពអាចបង្កើតសេវាតាមបែបសហគមន៍ស្វ័យគ្រប់គ្រងផងដែរ។
លោកសរសេរថា កន្លែងរក្សាទុកសំរាមបណ្តោះអាសន្ននៅតាមភូមិ និងកម្មវិធីសម្អាតបរិស្ថានប្រចាំខែនៅគ្រប់ភូមិ ក៏ត្រូវបានរក្សាទុកដដែលដែរ ដរាបណាភាពស្អាតមិនទាន់សម្រេចបានទាំងស្រុងនៅឡើយ។
លោក ឃឹម ហ្វីណង់ សរសេរថា៖ «បន្ទាយស្រីស្អាតមិនមែនដោយសារមានអ្នកពូកែរើសសំរាមនោះទេ! តែភាពស្អាតវាចេញពីការចូលរួមរបស់បងប្អូនប្រជាពលរដ្ឋ ចេញពីទម្លាប់រស់នៅស្អាតរបស់សហគមន៍ និងចេញពីប្រព័ន្ធគ្រប់គ្រងមួយដែលមានប្រសិទ្ធភាព មានភាពសមហេតុផល និងមានការជឿជាក់ពីសំណាក់ប្រជាពលរដ្ឋនៅក្នុងមូលដ្ឋានផ្ទាល់ នោះទើបភាពស្អាតនេះអាចត្រូវបានថែរក្សាយូរអង្វែង និងមាននិរន្តរភាពទៅបាន»៕
