ត្បូងឃ្មុំៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ សម្ពោធដាក់ឱ្យប្រើប្រាស់ «អគារពិនិត្យព្យាបាលជំងឺទូទៅតេជោសែន តំបែរ» ដែលមានទីតាំងស្ថិតនៅក្នុងមន្ទីរពេទ្យបង្អែកតំបែរ ស្រុកតំបែរ ខេត្តត្បូងឃ្មុំ។
ថ្លែងក្នុងពិធីសម្ពោធដាក់ឱ្យប្រើប្រាស់អគារនេះនៅថ្ងៃទី ២៧ ខែវិច្ឆិកា លោកបានជំរុញដល់មន្ត្រីសុខាភិបាលនៃមន្ទីរពេទ្យបង្អែកតំបែរឱ្យយកចិត្តទុកដាក់ផ្តល់សេវាសុខភាពជូនប្រជាពលរដ្ឋឱ្យបានទូលំទូលាយ ទាន់ពេលវេលា និងមានប្រសិទ្ធភាព ដោយមិនប្រកាន់វណ្ណ: និន្នាការ ជាតិសាសន៍ បក្ខពួកឡើយ។ នេះបើយោងតាមទំព័រហ្វេសប៊ុករបស់លោក វេង សាខុន នៅថ្ងៃទី ២៧ ខែវិច្ឆិកា នេះ។
លោក វេង សាខុន ថ្លែងថា៖ «លោកគ្រូ អ្នកគ្រូពេទ្យត្រូវខិតខំសិក្សា ស្រាវជ្រាវបន្ថែម ដើម្បីបង្កើនសមត្ថភាពលើការងារបច្ចេកទេស ផ្តល់សេវាជូនប្រជាពលរដ្ឋមានប្រសិទ្ធភាពខ្ពស់តាមវិជ្ជាជីវ:។ គ្រប់ភាគីពាក់ព័ន្ធ ពិសេសបងប្អូនប្រជាពលរដ្ឋ និងលោកគ្រូ អ្នកគ្រូពេទ្យ បុគ្គលិក កម្មករ ត្រូវរួមគ្នាថែរក្សាអគារនេះឱ្យបានគង់វង្សទុកប្រើប្រាស់ជាប្រយោជន៍រួមសម្រាប់បម្រើសុខភាពជូនបងប្អូនស្រុកតំបែរតរៀងទៅ»។
បើតាមហ្វេសប៊ុកដដែល អគារនេះមានទំហំ ១ ៥៨៦ ម៉ែត្រការ៉េ កម្ពស់៣ជាន់ដោយគិតទាំងជាន់ផ្ទាល់ដី អាចទទួលអ្នកជំងឺសម្រាកព្យាបាលបានចំនួន ៨០ នាក់ និងបានបំពាក់កង្ហារភ្ជាប់ជញ្ជាំងចំនួន ២៦គ្រឿង កង្ហារភ្ជាប់ពិដានចំនួន ៤២ គ្រឿង។
អគារនេះត្រូវបានរៀបចំនូវប្រព័ន្ធភ្លើងសម្រាប់តម្រូវការប្រើប្រាស់ម៉ាស៊ីនត្រជាក់ និងប្រើប្រាស់សម្រាប់ឧបករណ៍បរិក្ខារពេទ្យធំៗ រៀបចំពាសសំណរក្នុងបន្ទប់ថតកាំរស្មីអ៊ិចប្រមាណ ៣០ ម៉ែត្រការ៉េ ចាក់បេតុង និងមានរៀបចំនូវសួនច្បារជុំវិញអគារ និងផ្លូវបេតុងភ្លោះតភ្ជាប់ពីខ្លោងទ្វារមកអគារថ្មី។
បើតាមហ្វេសប៊ុកដដែល រដ្ឋមន្ត្រីកសិកម្មរូបនេះ បានឧបត្ថម្ភតុការិយាល័យចំនួន ១០ កៅអីអង្គុយចំនួន ១០ ទូដាក់ឯកសារចំនួន៥ និងកៅអីស្នួរសម្រាប់អ្នកជំងឺអង្គុយរង់ចាំចំនួន ៥ និងរថយន្តសង្គ្រោះបន្ទាន់ចំនួន ២ គ្រឿង៕