ភ្នំពេញៈ ក្រសួងសាធារណការ និងដឹកជញ្ជូនបំពាក់ម៉ាស៊ីនផលិតទឹកបរិសុទ្ធបច្ចេកវិទ្យាទំនើបមកពីប្រទេសអ៊ីស្រាអែល ដែលអាចផលិតទឹកបរិសុទ្ធដោយស្វ័យប្រវត្តិពីខ្យល់ក្នុងបរិយាកាស ដោយមិនចាំបាច់តភ្ជាប់ជាមួយប្រភពទឹកទុយោ អាចផ្គត់ផ្គង់ទឹកប្រកបដោយគុណភាព មានសុវត្ថិភាពខ្ពស់ និងកាត់បន្ថយផលប៉ះពាល់បរិស្ថានផ្សេងៗថែមទៀតផង។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចុះពិនិត្យ និងសាកល្បងទទួលទានទឹកបរិសុទ្ធ ដែលផលិតចេញពីម៉ាស៊ីនផលិតទឹកបរិសុទ្ធ ដោយបរិយាកាស-WATERGEN (ប្រភេទ GEN-M) ដែលបានបំពាក់នៅក្នុងបរិវេណទីស្តីការក្រសួង ដោយមានការចូលរួមពីថ្នាក់ដឹកនាំក្រសួង និងមន្ត្រីក្រោមឱវាទក្រសួង នៅទីស្តី ការក្រសួង នៅថ្ងៃទី២៥ ខែវិច្ឆិកានេះ។
លោកទេសរដ្ឋមន្ត្រី គ្រោងនឹងរៀបចំឱ្យមានការបំពាក់ ម៉ាស៊ីន WATERGEN ខ្នាតតូច (ប្រភេទ GENNY) នៅគ្រប់ជាន់នៃអគាររដ្ឋបាលរបស់ទីស្តីការក្រសួងដើម្បីផ្គត់ផ្គង់ទឹកបរិសុទ្ធប្រចាំថ្ងៃជូនដល់ថ្នាក់ដឹកនាំ មន្ត្រីរាជការ បុគ្គលិកនិយោជិត ដែលកំពុងបំពេញ ការងាររបស់ខ្លួន ក៏ដូចជាសិស្សនិស្សិតរបស់វិទ្យាស្ថានតេជោ សែន សាធារណការ និងដឹកជញ្ជូន ផងដែរ ដើម្បីចូលរួមចំណែកថែរក្សាបរិស្ថាន សុខភាព អនាម័យ និងការសន្សំសំចៃ។
លោកទេសរដ្ឋមន្ត្រីបញ្ជាក់ថា ៖«ម៉ាស៊ីនផលិតទឹកបរិសុទ្ធនេះជាបច្ចេកវិទ្យាទំនើបមកពីប្រទេសអ៊ីស្រាអែល មានសមត្ថភាពអាចផលិត ទឹកបរិសុទ្ធដោយស្វ័យប្រវត្តិពីខ្យល់ក្នុងបរិយាកាស ដោយមិនចាំបាច់តភ្ជាប់ជាមួយប្រភពទឹកទុយោ និងអាចផ្គត់ផ្គង់ទឹកប្រកបដោយគុណភាព និងសុវត្ថិភាពខ្ពស់ និងកាត់បន្ថយផលប៉ះពាល់បរិស្ថានផ្សេងៗថែមទៀតផង»៕