.jpg)
ខេត្តសៀមរាបកំណត់យកស្រុកអង្គរជុំជាស្រុកគោលដៅទី១ ដែលនឹងបញ្ចប់ការបន្ទោបង់ពាសវាលពាសកាលនៅដំណាច់ខែវិច្ឆិកា ឆ្នាំ ២០២១។
សៀមរាបៈ ខេត្តសៀមរាបកំណត់យកស្រុកអង្គរជុំជាស្រុកគោលដៅទី១ ដែលនឹងបញ្ចប់ការបន្ទោបង់ពាសវាលពាសកាលនៅដំណាច់ខែវិច្ឆិកា ឆ្នាំ ២០២១ នេះ ខណៈប្រជាពលរដ្ឋនៅមានចំនួន ៧០ខ្នងផ្ទះទៀត ដែលនៅបន្ទោបង់ពាសវាលពាសកាល។
ហ្វេសប៊ុកមន្ទីរព័ត៌មានខេត្តសៀមរាបនៅថ្ងៃទី ២៧ ខែវិច្ឆិកា នេះ បានដកស្រង់សំដី លោក ង៉ាន់ ភិរុណ អភិបាលរងខេត្តសៀមរាប ថា ការលើកកម្ពស់អនាម័យនៅជនបទ គឺជាផ្នែកមួយដែលមិនអាចខ្វះបាន ក្នុងការធ្វើឱ្យប្រសើរឡើងនូវកម្រិតជីវភាពរស់នៅរបស់ប្រជាជន ហើយការផ្គត់ផ្គង់ទឹកស្អាត និងការលើកកម្ពស់អនាម័យជនបទ គឺជាផ្នែកមួយសំខាន់ដែលរដ្ឋបាលខេត្តបានយកចិត្តទុកដាក់ខ្ពស់។
លោកថ្លែងដូច្នេះក្នុងទិវាជាតិលើកកម្ពស់អនាម័យជនបទលើកទី១២ នៅស្រុកអង្គរជុំ កាលពីថ្ងៃទី ២៦ ខែវិច្ឆិកា។
លោក ង៉ាន់ ភិរុណ ថ្លែងថា៖ «ជាផែនការរបស់រដ្ឋបាលខេត្តសៀមរាប បានកំណត់យកស្រុកអង្គរជុំ ជាស្រុកគោលដៅទី១ ដែលត្រូវជំរុញសម្រេចឱ្យបាននូវការបញ្ឈប់ការបន្ទោបង់ពាសវាលពាសកាលថ្នាក់ស្រុក នៅក្នុងដំណាច់ខែវិច្ឆិកា ឆ្នាំ២០២១នេះ»។
លោកបន្តថា បច្ចុប្បន្នមានឃុំចំនួន៤ ក្នុងចំណោមឃុំទាំង៧ របស់ស្រុកនេះ បានបញ្ចប់ការបន្ទោបង់ពាសវាលពាសកាល បើទោះបីជាឃុំចំនួន៣ទៀត នៅមិនទាន់បានបញ្ចប់ការបន្ទោបង់ពាសវាលពាសកាលក៏ពិតមែន ក៏អត្រាអនាម័យបានគ្របដណ្តប់៩៩ភាគរយ ពោលនៅសល់តែពលរដ្ឋចំនួន៧០ខ្នងផ្ទះប៉ុណ្ណោះ ដែលពួកគាត់នៅបន្ទោបង់ពាសវាលពាសកាល។
ហ្វេសប៊ុកដដែលបញ្ជាក់ថា នៅក្នុងឆ្នាំ២០២០ កន្លងទៅ ខេត្តសៀមរាប មានអត្រាផ្គត់ផ្គង់ទឹកស្អាតមានរហូតដល់ទៅ៧៥ភាគរយ និងអត្រាគ្របដណ្តប់អនាម័យមានចំនួន៧៩ភាគរយ ហើយនៅក្នុងឆ្នាំ២០២១នេះ ខេត្តសៀមរាប មានភូមិដែលបញ្ឈប់ការបន្ទោបង់ពាសវាលពាលកាលចំនួន ២៥៥ ភូមិ និងឃុំមានចំនួន ១៥ ឃុំ៕
