.jpg)
ព្រះសីហនុៈ អាជ្ញាធរខេត្តព្រះសីហនុ ដឹកនាំមន្ត្រីជំនាញចុះពិនិត្យទំនប់ប្រមូលទឹកកខ្វក់បញ្ចូលអាងប្រព្រឹត្តិកម្មទី២ ស្ថិតនៅសង្កាត់លេខ៣ ក្រុងព្រះសីហនុ ខេត្តព្រះសីហនុ ព្រមទាំងពិនិត្យទីលានតេជោ នៅថ្ងៃទី ២៧ ខែវិច្ឆិកានេះ ដើម្បីត្រៀមរៀបចំវេទិកាសម្ពោធសមិទ្ធផលហេដ្ឋារចនាសម្ព័ន្ធផ្លូវ៣៧ខ្សែ និងអាងប្រព្រឹត្តកម្មទឹកកខ្វក់ទី១ និងទី២នៅថ្ងៃខាងមុខ។
លោក គួច ចំរើន អភិបាលខេត្តព្រះសីហនុ បានធ្វើការណែនាំដល់មន្ត្រីជំនាញត្រូវដាក់បុគ្គលិកប្រចាំការ ដើម្បីកាយយកសំរាមចេញពីមុខអាង ដើម្បីឱ្យទឹកហូរចូលក្នុងអាងប្រព្រឹត្តកម្មបានលឿន និងដាំដើមកោងកាងនៅតាមបណ្តោយអូរ ដើម្បីជួយកាត់បន្ថយការបំពុលបរិស្ថាន និងលើកស្ទួយសោភ័ណភាពបន្ថែមមួយកម្រិតទៀត។
នៅថ្ងៃដដែលនោះ អភិបាលខេត្តព្រះសីហនុក៏បានបន្តអញ្ជើញទៅពិនិត្យទីលានតេជោ ស្ថិតនៅសង្កាត់លេខ៤ ក្រុងព្រះសីហនុ ខេត្តព្រះសីហនុផងដែរ ដើម្បីត្រៀមរៀបចំវេទិកាសម្ពោធសមិទ្ធផលហេដ្ឋារចនាសម្ព័ន្ធផ្លូវ៣៧ខ្សែ និងអាងប្រព្រឹត្តកម្មទឹកកខ្វក់ទី១ និងទី២ ព្រមទាំងបានណែនាំដល់ក្រុមការងារបច្ចេកទេសត្រូវពន្លឿនការងារដែលនៅសេសសល់ឱ្យបានឆាប់ និងសម្អាតទីលានឱ្យបានស្អាតស្របតាមផែនការដែលបានគ្រោងទុក៕
