សៀមរាបៈ លោក ឃឹម ហ្វីណង់ អភិបាលស្រុកបន្ទាយស្រី ថ្លែងនៅថ្ងៃទី២៧ ខែវិច្ឆិកានេះថា ភូមិព្រះដាក់ស្អាតមិនមែនដោយសារមានអ្នកពូកែរើសសំរាមនោះទេ តែមកពីអ្នកភូមិខ្លួនឯងចាប់ផ្តើមមានការផ្លាស់ប្តូរឥរិយាបថជាវិជ្ជមានលើបញ្ហាអនាម័យ ព្រមទាំងបានបង្ហាញភាពជាគំរូនៅលើការគ្រប់គ្រងបរិស្ថានក្នុងភូមិ។
នៅល្ងាចថ្ងៃទី២៧ ខែវិច្ឆិកានេះ លោកឃឹម ហ្វីណង់ អភិបាលស្រុកបន្ទាយស្រី បានថ្លែង អបអរសាទរ«ភូមិព្រះដាក់»ដែលទទួលបានបណ្ណសរសើរ«មេត្រីភាពបរិស្ថាន»ពីក្រសួងបរិស្ថាន ក្នុងនាមជាប្រតិបត្តិករឆ្នើមលើការងារបរិស្ថានប្រចាំឆ្នាំ២០២១។ លោកបញ្ជាក់ថា បណ្ណសរសើរនេះត្រូវបានប្រគល់ជូនដល់លោកមេភូមិព្រះដាក់ ដោយលោករដ្ឋមន្ត្រី សាយ សំអាល់ នៅឯទីស្តីការក្រសួងបរិស្ថាន កាលពីថ្ងៃទី២៤ ខែវិច្ឆិកា ឆ្នាំ ២០២១។
លោកអភិបាលស្រុកបន្ទាយស្រីលើកឡើងថា ឆ្នាំនេះជាឆ្នាំទី២ហើយ ដែលស្រុកបន្ទាយស្រីទទួលបានការលើកទឹកចិត្តពីក្រសួងបរិស្ថាន ហើយវាជាការស័ក្តិសមបំផុតដែលបណ្ណសរសើរមេត្រីភាពបរិស្ថានក្នុងឆ្នាំនេះត្រូវបានប្រគល់ផ្ទាល់ទៅកាន់ភូមិព្រះដាក់តែម្តង។
លោកថ្លែងថា៖«ភូមិព្រះដាក់ស្អាតមិនមែនដោយសារមានអ្នកពូកែរើសសំរាមនោះទេ តែមកពីអ្នកភូមិខ្លួនឯងចាប់ផ្តើមមានការផ្លាស់ប្តូរឥរិយាបថជាវិជ្ជមានលើបញ្ហាអនាម័យ ព្រមទាំងបានបង្ហាញភាពជាគំរូនៅលើការគ្រប់គ្រងបរិស្ថានក្នុងភូមិ ដោយរក្សាបាននូវភាពជាម្ចាស់លើការគ្រប់គ្រងសំរាម មានទម្លាប់រស់នៅស្អាត មានការរៀបចំភូមិឋានបានយ៉ាងល្អ និងបងប្អូនប្រជាពលរដ្ឋមានការចូលរួមយ៉ាងសកម្ម ជាពិសេសនៅក្នុងគម្រោង "សហគមន៍ស្វ័យគ្រងគ្រងសំរាម"។
លោកអភិបាលស្រុកលើកឡើងថា ការទទួលស្គាល់របស់ក្រសួងបរិស្ថាននៅក្នុងថ្ងៃនេះ គឺជាការទទួលស្គាល់ជារួមទៅលើស្នាដៃដែលសម្រេចបានដោយសមាជិកគ្រប់រូបនៅក្នុងភូមិព្រះដាក់ទាំងមូល មិនមែនគ្រាន់តែសំដៅទៅលើមេភូមិ ឬអាជ្ញាធរមូលដ្ឋាននោះទេ ហើយការទទួលស្គាល់នៅក្នុងថ្ងៃនេះក៏ជាចំណងតភ្ជាប់ទៅនឹងការទទួលខុសត្រូវនៅក្នុងថ្ងៃស្អែកផងដែរ។
លោកថ្លែងថា៖«នៅសល់កិច្ចការជាច្រើនទៀតដែលយើងត្រូវបន្តធ្វើរួមគ្នានៅក្នុងក្របខ័ណ្ឌស្រុកទាំងមូល ហើយសង្ឃឹមថា បងប្អូនប្រជាពលរដ្ឋនៅក្នុងស្រុកទាំងអស់នឹងចូលរួមឱ្យរឹតតែបានទូលំទូលាយជាមួយរដ្ឋបាលស្រុក និងរដ្ឋបាលភូមិឃុំ ដើម្បីបុព្វហេតុនៃចីរភាពខាងផ្នែកបរិស្ថាននៃស្រុកបន្ទាយស្រីរបស់យើងទាំងអស់គ្នា»៕