ភ្នំពេញៈ មន្ត្រីការទូតជាន់ខ្ពស់វ័យក្មេងកម្ពុជា បង្ហាញជំនឿក្នុងវេទិកាអន្តរជាតិថា ការចូលរួមរបស់យុវជននៅគ្រប់តំបន់អាចនឹងពង្រឹងភាពធន់របស់សង្គមដើម្បីឱ្យមានភាពប្រសើរឡើងនៃពិភពលោក និងសង្គមសម្រាប់ជំនាន់ក្រោយៗទៀត។
លោក សុខ សូកេន រដ្ឋលេខាធិការក្រសួងការបរទេស បានថ្លែងថា យុវជនដើរតួសំខាន់ណាស់ក្នុងការលើកកម្ពស់ការអភិវឌ្ឍប្រកបដោយចីរភាព ជាពិសេសជំរុញការស្តារសង្គមសេដ្ឋកិច្ច ឡើងវិញក្រោយវិបត្តិកូវីដ ១៩។ នេះបើយោងតាមសេចក្តីប្រកាសព័ត៌មានក្រសួងការបរទេសនៅថ្ងៃទី២៧ ខែវិច្ឆិកា នេះ។
លោក ថ្លែងដូច្នេះនៅក្នុងកិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុបលើកទី៤កាលពីថ្ងៃទី២៦ ខែវិច្ឆិកា តាមរយៈការថតវីដេអូទុកជាមុន ដែលមានការចូលរួមពីលោក Ambassador Leon FABER នាយករងប្រតិបត្តិនៃមូលនិធិអាស៊ី-អឺរ៉ុប (ASEF) ព្រមទាំងយុវជន ASEF សរុបចំនួនប្រមាណ ២០០នាក់ ដែលមកពី៥១ប្រទេស ដោយក្នុងនោះយុវជនរបស់កម្ពុជា មានចំនួន ៣០រូប។
កិច្ចប្រជុំនេះគឺជាព្រឹត្តិការណ៍អមមួយក្នុងចំណោមព្រឹត្តិការណ៍អមទាំង៧ និងជាព្រឹត្តិការណ៍អមយុវជនផ្លូវការរបស់កិច្ចប្រជុំកំពូលអាស៊ី-អឺរ៉ុបលើកទី១៣ (ASEM13)។
លោក សុខ សូកេន បានថ្លែងអំណរគុណដល់ASEF ក៏ដូចជា ឥស្សរជនអាស៊ី-អឺរ៉ុបផ្សេងៗទៀត ដែលបានផ្ដល់ឱកាសដល់ថ្នាក់ដឹកនាំវ័យក្មេង ASEF ជាពិសេស យុវជនកម្ពុជាឱ្យបានចូលរួម និងស្វែងយល់ពីការងារសំខាន់ៗ ជាពិសេសកិច្ចការអភិវឌ្ឍប្រកបដោយចីរភាព ទាំងនៅថ្នាក់នយោបាយ និងបច្ចេកទេស ដែលអាចជួយពង្រីកវិសាលភាពចំណេះដឹងរបស់យុវជនកម្ពុជាជំនាន់ក្រោយថែមមួយកម្រិតទៀត។
សេចក្តីប្រកាសព័ត៌មានបញ្ជាក់ថា៖ «ឯកឧត្តមរដ្ឋលេខាធិការ [លោក សុខ សូកេន] បានលើកឡើងថា ការស្តែងឱ្យឃើញនូវផលប៉ះពាល់ជាច្រើនផ្នែកនៃនិន្នាការសកល បានបង្ហាញពីភាពផុយស្រួយរបស់ស្ថានភាពពិភពលោកក្នុងកម្រិតផ្សេងៗគ្នា។ ឯកឧត្តម ជឿជាក់យ៉ាងមុតមាំថាតាមរយៈការចូលរួមរបស់យុវជននៅគ្រប់តំបន់ អាចនឹងពង្រឹងភាពធន់របស់សង្គម ដើម្បីឱ្យមានភាពប្រសើរ ឡើងនៃពិភពលោកនិងសង្គមសម្រាប់ជំនាន់ក្រោយៗទៀត»៕