.jpg)
ក្រុមអ្នកធាក់ស៊ីក្លូក្នុងពេលទទួលអំណោយនៅថ្ងៃទី ២៨ វិច្ឆិកា ។ រូបថត រដ្ឋបាលរាជធានី
ភ្នំពេញៈរដ្ឋបាលរាជធានីភ្នំពេញនៅព្រឹកថ្ងៃទី ២៨ ខែវិច្ឆិកាឆ្នាំ ២០២១ បានចែកភួយអាវរងា ព្រមទាំងថវិកាមួយចំនួនដល់កម្មករធាក់ស៊ីក្លូ ប្រមាណ ៣០០ នាក់ ដែលភាគច្រើនជាជនចាស់ជរាក្រីក្រគ្មានទីពឹង ដើម្បីជាប្រយោជន៍ដល់ពួកគាត់ប្រើប្រាស់ទប់ទល់ទៅនឹងអាកាសធាតុត្រជាក់ដែលនឹងមកដល់នាប៉ុន្មានថ្ងៃខាងមុខដ៏ខ្លីនេះ ។
នៅក្នុងឱកាសនោះ លោក ឃួង ស្រេង អភិបាលរាជធានីភ្នំពេញ និងជាប្រធានក្រុមប្រឹក្សាភិបាលមូលនិធិត្រីចក្រយានកម្ពុជាបានថ្លែងថា នៅពេលដ៏ខ្លីខាងមុខនេះ អាកាសធាតុនឹងចុះត្រជាក់ខ្លាំងដែលអាចបង្កឲ្យប៉ះពាល់ដល់សុខុមាលភាពនៃការរស់នៅប្រចាំថ្ងៃ ពិសេសកុមារ និងមនុស្សចាស់ជរា។ បញ្ហានេះ ត្រូវបានលោកនាយករដ្ឋមន្ត្រី ហ៊ុន សែន កាលពីថ្ងៃទី ២៣ ខែវិច្ឆិកា បានណែនាំឲ្យគ្រប់អាជ្ញាធររាជធានី-ខេត្តនៅទូទាំងប្រទេស ផ្ដោតការយកចិត្តទុកដាក់អំពីសុខភាពមនុស្សចាស់ក្រីក្រគ្មានទីពំនាក់ ដោយត្រូវផ្ដល់ជូននូវអាវរងា ភួយ មុងជាដើមដល់ពួកគាត់ ដើម្បីប្រើប្រាស់និងរក្សាភាពកក់ក្ដៅនៅក្នុងរដូវរងាខាងមុខនេះ។
លោកស្រេងបានបញ្ជាក់ថា៖ «នៅពេលនេះ រដ្ឋបាលរាជធានីភ្នំពេញយើងនិងក្នុងនាមខ្ញុំជាប្រធានក្រុមប្រឹក្សាភិបាលមូលនិធិត្រីចក្រយានកម្ពុជាសូមផ្ដល់ជូនបងប្អូនអ្នកធាក់ស៊ីក្លូចំនួន ៣០០ នាក់ ដែលជាសមាជិក ក្នុងម្នាក់ៗទទួលបាននូវអាវរងា ១ ក្រមា ១ ភួយ ១ និងថវិកាចំនួន ៥ ម៉ឺនរៀលដែលជាអំណោយដ៏ថ្លៃថ្លារបស់សម្ដេចតេជោ និងសម្ដេចកិត្តិបណ្ឌិត យកទៅប្រើប្រាស់ក្នុងពេលអាកាសធាតុចុះត្រជាក់ខ្លាំងនៅពេលខាងមុខនេះ »។
លោកបន្ថែមថា៖ «សម្តេចតេជោតែងតែឈរលើជួរមុខជានិច្ច ចំពោះសុខុមាលភាពរបស់បងប្អូនប្រជាពលរដ្ឋមិនថាក្មេងឬមនុស្សចាស់ឡើយ»។
ជាមួយគ្នានេះ លោកបានណែនាំដល់អ្នកប្រកបមុខរបរធាក់ស៊ីក្លូទាំងនោះឲ្យបន្តចូលរួមអនុវត្តនូវវិធានការរបស់ក្រសួងសុខាភិបាល ដើម្បីការពារការឆ្លងរីករាលដាលនៃជំងឺកូវីដ ១៩ ពិសេសវិធានការ៣កុំនិង ៣ ការពារ របស់រាជរដ្ឋាភិបាលឲ្យបានខ្ជាប់ខ្ជួន។
ជាអ្នកស្រុកកោះធំ ខេត្តកណ្ដាល លោក លឹម ហេង អាយុ ៦ ៧ឆ្នាំដែលបានមកប្រកបមុខរបរធាក់ស៊ីក្លូ នៅក្នុងរាជធានីភ្នំពេញតាំងពីទសវត្សរិ៍ឆ្នាំ ១៩៩០ មកនោះ បានប្រាប់ភ្នំពេញប៉ុស្តិ៍ថា អំណោយទាំងនេះសម្រាប់គាត់គឺពិតជាមានតម្លៃថ្លៃថ្លាខ្លាំងណាស់ ព្រោះវានឹងជួយឲ្យគាត់មានភាពកក់ក្ដៅនៅពេលរដូវរងាមកដល់នាពេលដ៏ខ្លីខាងមុខនេះ។
លោក លឹម ហេង ដែលអះអាងថាជំងឺរាតត្បាតកូវីដ ១៩ បានធ្វើឲ្យជីវភាពរបស់ពួកគាត់ជាអ្នកធាក់ស៊ីក្លូ ស្ទើរតែរកអង្ករច្រកឆ្នាំងពុំបាន ដោយសារតែគ្មានអតិថិជនហៅជិះឬដឹកទំនិញនោះបាននិយាយថា៖ «ខ្ញុំពិតជាត្រេកអរណាស់ អំណោយជាអាវរងា ភួយ ក្រមា និង ថវិកានេះ គឺវាមានតម្លៃខ្លាំងណាស់សម្រាប់ខ្ញុំ ជាអ្នកប្រកបរបរធាក់ស៊ីក្លូ ដើម្បីចិញ្ចឹមជីវិត»។
បើតាមលោក លឹម ហេង ចាប់តាំងពីមានការរីករាលដាលនៃជំងឺកូវីដ១៩មក មានថ្ងៃខ្លះពួកគាត់រកលុយមិនបានសូម្បីតែ ៥ ០០០ រៀលសម្រាប់ទិញបាយហូបផង។ ប៉ុន្តែដោយសារគាត់ជាសមាជិករបស់មូលនិធិត្រីចក្រយានកម្ពុជា ដូច្នេះគាត់អាចទទួលបានប្រាក់ឧបត្ថម្ភចំនួន ៧ ០០០ រៀលក្នុង១ថ្ងៃ ពីមូលនិធិនេះ សម្រាប់ដោះស្រាយជីវភាពប្រចាំថ្ងៃបាន។
មូលនិធិត្រីចក្រយានកម្ពុជាត្រូវបានបង្កើតឡើងដោយប្រមុខរាជរដ្ឋាភិបាលកម្ពុជា កាលពីថ្ងៃទី ១៣ ខែមករា ឆ្នាំ ២០១៨ ក្នុងគោលបំណងថែរក្សានិងអភិរក្សអត្តសញ្ញាណស៊ីក្លូកម្ពុជា និងលើកស្ទួយជីវភាពអ្នកប្រកបមុខរបរធាក់ស៊ីក្លូ។បច្ចុប្បន្នមូលនិធិនេះមានសមាជិកអ្នកធាក់ស៊ីក្លូចំនួន ៣២០ នាក់។
យ៉ាងណាក៏ដោយ ចំនួនអ្នកប្រកបមុខរបរធាក់ស៊ីក្លូនៅក្នុងរាជធានីភ្នំពេញ ត្រូវបានគេប៉ាន់ប្រមាណថាមានចំនួនជិត ៤០០ នាក់ ក្នុងនោះមានអ្នកធាក់ស៊ីក្លូប្រមាណ ៦០ នាក់ នៅមិនទាន់បានចុះឈ្មោះនិងបំពេញលក្ខន្តិកៈ ដើម្បីចូលជាសមាជិកនៃមូលនិធិត្រីចក្រយានកម្ពុជានៅឡយទេ។ នេះបើតាមលោក អ៊ឹម សម្បត្តិ ប្រធានសមាគមអភិរក្សស៊ីក្លូ និងមុខរបរនៃសេដ្ឋកិច្ចក្រៅប្រព័ន្ធ៕
