ភ្នំុពេញៈ ចៅក្រមស៊ើបសួរ នៃតុលាការរាជធានីភ្នំពេញនៅថ្ងៃទី ២៨ វិច្ឆិកា បន្តសាកសួរជនត្រូវចោទឈ្មោះយឹង វណ្ណដា បន្ទាប់ពីតំណាងអយ្យការចោទប្រកាន់ចំនួន៤បទល្មើសពាក់ព័ន្ធជេរប្រមាថ គំរាមវាយនគរបាលចរាចរណ៍ រឿងជិះម៉ូតូបញ្ច្រាសទិសនៅស្ពានអាកាសស្ទឹងមានជ័យកាលពីថ្ងៃទី ២៥ វិច្ឆិកា។
លោកហេង សារិម នាយផ្នែកដោះស្រាយវិវាទគ្រោះថ្នាក់ចរាចរណ៍ នៃស្នងការដ្ឋាននគរបាលរាជធានីភ្នំពេញ ប្រាប់ភ្នំពេញប៉ុស្តិ៍នៅថ្ងៃទី ២៨ វិច្ឆិកា ថា ជនត្រូវចោទឈ្មោះយឹង វណ្ណដា ភេទប្រុស អាយុ ២៧ ឆ្នាំ មានរបរជាសន្តិសុខឯកជន។ ជននេះកំពុងត្រូវបានចៅក្រមស៊ើបសួរដំណើរការនីតិវិធីសាកសួរបន្តទៀត បន្ទាប់ពីតំណាងអយ្យការចោទប្រកាន់។
លោកប្រាប់ថា៖ «រឿងនេះ ក្នុងនាមយើងជាសមត្ថកិច្ចអនុវត្តច្បាប់ អ៊ីចឹងយើងគ្រាន់តែកសាងសំណុំរឿងជនត្រូវចោទទៅតុលាការទេ។ ជនត្រូវចោទត្រូវបានតំណាងអយ្យការគាត់សាកសួររួចហើយ។ ឥឡូវនេះកំពុងនៅដំណាក់កាលចៅក្រមសាកសួរ»។
លោក ប្លង់ សុផល អ្នកនាំពាក្យអយ្យការសាលាដំបូងរាជធានីភ្នំពេញប្រាប់ក្រុមអ្នកសារព័ត៌មានតាមតេឡេក្រាមកាលពីថ្ងៃទី ២៧ វិច្ឆិកា ថា ករណីនេះ តំណាងអយ្យការបានបើកការស៊ើបសួរ ពីបទបើកបរយានយន្តមិនព្រមបញ្ឈប់យានយន្តតាមបញ្ជារបស់មន្ត្រីនគរចរាចរណ៍ផ្លូវគោក។
លោកថ្លែងថា៖ «តំណាងអយ្យការបានចោទបទរារាំង ឬប្រើប្រាស់មធ្យោបាយណាមួយ ដើម្បីជាឧបសគ្គដល់ចរាចរសាធារណៈ។ បទហិង្សាដោយចេតនា បទប្រមាថ និងបទប្រឆាំងនឹងអ្នករាជការសាធារណៈ តាមមាត្រា ៧៦ និងមាត្រា ៨០ នៃច្បាប់ស្តីពីចរាចរណ៍ផ្លូវគោក និងមាត្រា ២១៧ មាត្រា ៥០២ និងមាត្រា ៥០៣ នៃក្រមព្រហ្មទណ្ឌ»។
លោកហេង សារិម បានរំឭកថា កាលពីវេលាម៉ោងជាង១រសៀលថ្ងៃទី ២៥ វិច្ឆិកា ឆ្នាំ ២០២១ ជនសង្ស័យឈ្មោះយឹង វណ្ណដា បានជិះម៉ូតូ១គ្រឿងតាមបណ្តោយផ្លូវលេខ ២១៧ កែងផ្លូវ ២៧១ ក្រោមស្ពានអាកាសស្ទឹងមានជ័យ ស្ថិតក្នុងសង្កាត់ ស្ទឹងមានជ័យ២ ខណ្ឌមានជ័យក្នុងទិសដៅស្របធម្មតា។ ប៉ុន្តែដោយសារកម្លាំងនគរបាលចរាចរណ៍ដែលកំពុងយាមនៅគោលដៅខាងលើឃើញម៉ូតូរបស់គាត់មិនមានលក្ខណៈគ្រប់គ្រាន់តាមច្បាប់ កម្លាំងសមត្ថកិច្ចហៅឱ្យឈប់។ ប៉ុន្តែបែរជាជនសង្ស័យបើកគេចត្រឡប់ក្រោយ។
លោកបន្តថា នៅពេលជនសង្ស័យបើកម៉ូតូបត់ត្រឡប់ក្រោយបែបនេះ បានទៅប៉ះជាមួយនឹងរថយន្ត ១ គ្រឿង និងប៉ះម៉ូតូ ១ គ្រឿង ដែលកំពុងធ្វើដំណើរក្នុងទិសស្រប។ ប៉ុន្តែម្ចាស់រថយន្ត និងម្ចាស់ម៉ូតូដែលត្រូវជនសង្ស័យជិះម៉ូតូបុកនោះមិនបានទាមទារសំណងអ្វីទេ។ ដោយសារតែឃើញបែបនេះ សមត្ថកិច្ចចរាចរណ៍បានហៅជនសង្ស័យសួរនាំ តែត្រូវជនសង្ស័យស្រែកសំឡុតដាក់កងកម្លាំងសមត្ថកិច្ចចរាចរណ៍ទៅវិញ។
លោកសារិម បញ្ជាក់ថា៖ «ប៉ុន្តែកម្លាំងនគរបាលចរាចរណ៍យើងមិនទាន់បានសួរគាត់ផង គាត់ក៏ជេរមកកម្លាំងតែម្តង។ គាត់មិនថែមទាំងជេរប្រមាថសមត្ថកិច្ចទេ តែសំឡុតរុញច្រាន និងគំរាមរកវាយមកសមត្ថកិច្ចយើងទៀត»។
លោក សេក សុជាតិ នាយកប្រតិបត្តិ អង្គការអភិវឌ្ឍន៍ផ្នត់គំនិត បានបញ្ចេញទស្សនៈជុំវិញបញ្ហាខាងលើនៅថ្ងៃទី ២៨ វិច្ឆិកា ថា សមត្ថកិច្ចមិនគួរប្ដឹងយុវជនរូបនោះទៅតុលាការទេ ព្រោះជាការអនុវត្តច្បាប់របស់មន្ត្រី។ រីឯយុវជនរូបនោះវិញ សមត្ថកិច្ចគួរយកទៅធ្វើការអប់រំ និងត្រឹមតែឱ្យធ្វើកិច្ចសន្យាបានហើយ។
លោកថ្លែងថា៖ «មួយវិញទៀត ក្រោយពេលអប់រំរួចហើយ ទាំងយុវជនរូបនោះ និងសមត្ថកិច្ចដែលអនុវត្តច្បាប់នៅពេលនោះ គួរផ្សះផ្សាគ្នា ហើយចេញវីដេអូរួមគ្នាមួយ ដើម្បីធ្វើជាគំរូសម្រាប់សមត្ថកិច្ចដទៃ និងមហាជនផ្សេងទៀតបានរៀនសូត្រតាម»៕
វីដេអូ៖