ភ្នំពេញៈ សហភាពសហព័ន្ធយុវជនកម្ពុជា (ស.ស.យ.ក) នៅថ្ងៃទី ២៨ ខែវិច្ឆិកា បានរៀបចំប្រារព្ធខួប ៤៣ ឆ្នាំនៃថ្ងៃកំណើតរបស់ខ្លួន ក្រោមប្រធានបទ «ស.ស.យ.ក ត្រៀមខ្លួនគ្រប់កាលៈទេសៈ ដើម្បីចូលរួមក្នុងបុព្វហេតុជាតិមាតុភូមិ ហើយបន្តប្តេជ្ញាថែរក្សា ជាតិ សាសនា ព្រះមហាក្សត្រ នៃព្រះរាជាណាចក្រកម្ពុជា ឱ្យបានគង់វង្សស្ថិតស្ថេរជាដរាបតរៀងទៅ»។
លោក ហ៊ុន ម៉ានី ប្រធាន ស.ស.យ.ក ថ្លែងនៅក្នុងឱកាសនោះថា នេះជាការរៀបចំដើម្បីរម្លឹកខួបនៃការបង្កើតសមាគមយុវជនសាមគ្គីសង្គ្រោះជាតិកម្ពុជាដែលជាផ្នែកមួយរបស់រណសិរ្សសាមគ្គីសង្គ្រោះជាតិកម្ពុជា ក៏ដូចជាអបអរសាទរដល់សមិទ្ធផលនានាដែលសម្រេចបានកន្លងមក និងបង្ហាញនូវស្មារតីសាមគ្គីភាព ឯកភាព និងការប្តេជ្ញា ក្នុងនាមជាសមាជិកសមាជិកា និងក្នុងនាមជាមហាគ្រួសារខ្មែរ ក្នុងការការពារអធិបតេយ្យភាព ស្ថេរភាព និងសុខសន្តិភាពប្រទេសកម្ពុជាមិនថាបច្ចុប្បន្ន និងទៅថ្ងៃអនាគត។
លោកបានថ្លែងរំលឹកថា ៖«ការតាំងចិត្ត ការពុះពារ និងពលិកម្មរបស់អតីតយុវជននាពេលនោះ ជាពិសេសសម្តេចតេជោ ប្រធានស្ថាបនិករបស់យើង គឺជាកត្តាកំណត់ឈានឆ្ពោះទៅរកការបង្កើតសមាគមយុវជនសាមគ្គីសង្គ្រោះជាតិកម្ពុជា ដែលជាផ្នែកដ៏សំខាន់មួយ នៃរណសិរ្សសាមគ្គីសង្គ្រោះជាតិកម្ពុជា ក្រោមការដឹកនាំជារួមរបស់ សម្ដេច ជា ស៊ីម សម្ដេច ហេង សំរិន និងសម្ដេច ហ៊ុន សែន ក្នុងបេសកកម្មតែមួយគត់គឺ រំដោះជាតិ និងប្រជាជនកម្ពុជាចេញពីរបប ៣ ឆ្នាំ ៨ ខែ ២០ ថ្ងៃ»។
បើតាម លោក ហ៊ុន ម៉ានី តាមរយៈរណសិរ្សសាមគ្គីសង្គ្រោះជាតិកម្ពុជានេះហើយ ដែលកម្ពុជាអាចឆ្លងផុតពីនរកអវចិយ៍ ហើយផ្ដល់កំណើតទី២ ដល់ប្រជាជនកម្ពុជាគ្រប់ស្រទាប់វណ្ណៈ និងអាចអនុញ្ញាតឱ្យកម្ពុជាងើបឡើងពីចំណុចសូន្យ ដោយខិតខំស្តារ កសាង និងអភិវឌ្ឍប្រទេសរហូត ដូចអ្វីដែលយើងឃើញនាពេល ៤៣ ឆ្នាំក្រោយនេះ។
ជាមួយគ្នានេះ លោកថ្លែងថា៖ «ស.ស.យ.ក បានចូលករួមបំពេញដើម្បីសង្គមគ្រប់កាលទេសៈ ទោះបីក្នុងស្ថានភាពនៃជំងឺរាតត្បាតនេះយ៉ាងណាក្ដី។ ការចូលរួមរបស់សមាជិក សមាជិកា ស.ស.យ.ក នៅពេលប្រទេសជួបវិបត្តិដូចក្នុងបរិបទកូវីដ ១៩ នេះ បានបញ្ជាក់យ៉ាងច្បាស់ថា យើងមិនមែននៅជួរមុខ ឬនៅជាប់ជាមួយប្រជាជន តែក្នុងកាលៈទេសៈសប្បាយរីករាយនោះទេ»។
លោក ស សុខា អនុប្រធាន សហភាពសហព័ន្ធយុវជនកម្ពុជា (ស.ស.យ.ក.) ថ្លែងឱ្យដឹងដែរថា ក្នុងរយៈពេលកន្លងមកនេះ លោក បានចូលរួមការងារជាច្រើន ស្របតាមចក្ខុវិស័យ និងបេសកកម្ម របស់ ស.ស.យ.ក. ក្រោមការដឹកនាំ និងចង្អុលបង្ហាញពីលោក ហ៊ុន ម៉ានី ព្រមទាំងមានកិច្ចសហការល្អពីថ្នាក់ដឹកនាំ ក៏ដូចជា សមាជិក សមាជិកាទាំងអស់ និយាយជារួម និងនិយាយដោយឡែកជាមួយថ្នាក់ដឹកនាំ និងសមាជិក សមាជិកា ស.ស.យ.ក ខេត្តព្រៃវែង បាត់ដំបង និងខេត្តបន្ទាយមានជ័យ។
លោកពិតជាមានមោទកភាព ដែលបានក្លាយជាមហាគ្រួសារ ស.ស.យ.ក ។
លោកបន្តថា ស.ស.យ.ក. អង្គការមនុស្សធម៌មួយនេះ បានរួមចំណែកជាមួយរាជរដ្ឋាភិបាល ក្នុងការងារសង្គម ការងារមនុស្សធម៌ សំដៅបម្រើឱ្យប្រយោជន៍យុវជន និងសង្គមជាតិទាំងមូល ហើយដែលសកម្មភាពទាំងអស់នោះគឺផុសចេញពីការលះបង់ពេលវេលា កម្លាំងកាយចិត្ត និងទ្រព្យធនផ្ទាល់ខ្លួន ពីសំណាក់ថ្នាក់ដឹកនាំគ្រប់លំដាប់ថ្នាក់ និងសមាជិក សមាជិកា ស.ស.យ.ក ទូទាំងប្រទេស ។
យោងតាមសេចក្តីប្រកាសព័ត៌មានរបស់ សសយក ពិធីអបអរសាទរខួបលើកទី ៤៣ នៃថ្ងៃកំណើត ស.ស.យ.ក នេះ ត្រូវបានរៀបចំឡើង ក្នុងគោលបំណងសំខាន់ចំនួន ៣ ទី១៖ ដើម្បីរំលឹកខួប នៃការបង្កើតសមាគមយុវជនសាមគ្គីសង្គ្រោះជាតិកម្ពុជាដែលជាផ្នែកមួយ របស់រណសិរ្សសាមគ្គីសង្គ្រោះជាតិកម្ពុជា។
ទី ២៖ អបអរសាទរដល់សមិទ្ធផលនានាដែលសម្រេចបានកន្លងមក និង ទី ៣៖ បង្ហាញនូវស្មារតីសាមគ្គីភាព ឯកភាព និងការប្តេជ្ញា ក្នុងនាមជាសមាជិក សមាជិកា និងក្នុងនាមជាមហាគ្រួសារខ្មែរ ក្នុងការការពារអធិបតេយ្យភាព ស្ថេរភាព និងសុខសន្តិភាពប្រទេសកម្ពុជាមិនថា បច្ចុប្បន្ន និងទៅថ្ងៃអនាគត។
សេចក្តីប្រកាសព័ត៌មាននេះបន្តថា ក្រោយមហាសន្និបាតលើកទី ៣ កាលពីថ្ងៃទី ២-៣ ខែវិច្ឆិកា ឆ្នាំ ២០១២ សមាគមយុវជនសាមគ្គីសង្គ្រោះជាតិកម្ពុជា និងសមាគមយុវជនកម្ពុជា បានប្រែឈ្មោះមកជា សហភាពសហព័ន្ធយុវជនកម្ពុជា (ស.ស.យ.ក.) ដើម្បីបន្តបុព្វហេតុ ការការពារ និងប្តេជ្ញារក្សាមិនឱ្យបាត់បង់នូវស្មារតី ២ ធ្នូ ដែលបន្សល់ទុកដោយយុវជនជំនាន់មុន និងបន្តការចូលរួមជាមួយសង្គមជាតិ ក្នុងការស្តារ កសាង និងបង្កើតសមិទ្ធផលនានាសម្រាប់កម្ពុជា។
បើតាម ស.ស.យ.ក ក្នុងរយៈពេល ៩ ឆ្នាំចុងក្រោយនេះ សហភាពសហព័ន្ធយុវជនកម្ពុជា បានបង្កើនការទទួលស្គាល់យ៉ាងទូលំទូលាយនូវកិត្តិនាមរបស់ខ្លួនទាំងក្នុង និងក្រៅប្រទេស និងមានការទទួលស្គាល់ពីសំណាក់ថ្នាក់ដឹកនាំ សាធារណៈជន ជាពិសេសយុវជន តាមរយៈសកម្មភាពរបស់ខ្លួន។
ផ្តើមចេញពីកិច្ចការងារសម្រាប់យុវជន ស.ស.យ.ក បានក្លាយជាវេទិកាមួយ ដែលផ្តល់ឱកាសដល់យុវជនគ្រប់រូបដែលមានចិត្ត និងគោលបំណងដូចគ្នាក្នុងការផ្តល់ក្តីស្រលាញ់ លះបង់ពេលវេលា ធនធានផ្ទាល់ខ្លួន ដើម្បីសង្គមជាតិ និងប្រជាជន៕